ដកហូតមុខតំណែងវរសេនីយ៍ទោ ហេង ហាប់ ពីស្នងការរង ដោយសារល្មើសវិន័យកងកម្លាំង

រដ្ឋមន្ត្រីក្រសួងមហាផ្ទៃ បានសម្រេចដកហូតមុខតំណែងលោកវរសេនីយ៍ទោ ហេង ហាប់ ពីស្នងការរង នៃស្នងការដ្ឋាននគរបាលខេត្តកំពត ដោយល្មើសវិន័យកងកម្លាំង។ លោកវរសេនីយ៍ទោ ហេង ហាប់ ត្រូវបានតែងតាំងមុខតំណែងជាស្នងការរង នៃស្នងការដ្ឋាននគរបាលខេត្តកំពត តាមរយៈប្រកាសចុះថ្ងៃទី ១១ ខែសីហា ឆ្នាំ ២០២៣កន្លងទៅនេះ។ 

បន្ទាប់ពីមានការតែងតាំងនេះមក មានអ្នកប្រើប្រាស់បណ្ដាញសង្គមហ្វេសប៊ុកមួយចំនួន បានរិះគន់ជាបន្តបន្ទាប់ ដោយ​សារតែមន្ត្រីនគរបាលរូបនេះ ធ្លាប់មានប្រវត្តិ​ប្រព្រឹត្តបទល្មើសលួច​ ដោយលួច​ IPad របស់អ្នកដទៃ កាលពីពេលកន្លង​មក។

ក្រោយពីទទួលបានព័ត៌មាននេះមក លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តាមរយៈប្រកាសចុះថ្ងៃទី ១២ ខែកញ្ញា ឆ្នាំ ២០២៣ បានសម្រេចដកហូតមុខតំណែង ចំពោះវរសេនីយ៍ទោ ហេង ហាប់ អត្តលេខ ៧៦២៩៥ ពីស្នងការរង នៃស្នងការដ្ឋាននគរបាលខេត្តកំពត ឲ្យមកជាមន្ត្រី។

តាមរយៈប្រកាសដដែល បានបញ្ជាក់ថា ការដកហូតមុខតំណែងមន្ត្រីនគរបាលរូបនេះ ដោយសារល្មើសវិន័យរបស់កងកម្លាំងនគរបាលជាតិ៕