ព័ត៌មានជាតិ
ជប៉ុនអរគុណកម្ពុជា ដែលមិនហាមការនាំចូលគ្រឿងសមុទ្រពីជប៉ុន ក្រោយការបង្ហូរទឹកកខ្វក់
តាមរយៈឯកអគ្គរាជទូតរបស់ខ្លួនប្រចាំនៅភ្នំពេញ រដ្ឋាភិបាលជប៉ុន បានអរគុណដល់រាជរដ្ឋាភិបាលកម្ពុជា ដែលមិនបានរឹតត្បិតលើការនាំចូលផលិតផលជលផលរបស់ជប៉ុន ក្រោយមានការបង្ហូរទឹកកាកសំណល់កខ្វក់ពីរោងចក្រថាមពល នុយក្លេអ៊ែរទៅក្នុងមហាសមុទ្រ នៅតំបន់ហ្វូគូស៊ីម៉ា។
កាលពីខែសីហា កន្លងទៅនេះ ជប៉ុនបានចាប់ផ្ដើមបង្ហូរទឹកកាកសំណល់ដែលសង្ស័យមានជាតិវិទ្យុសកម្មចេញពីរោងចក្រថាមពលនុយក្លេអ៊ែរហ្វូគូស៊ីម៉ា ចូលទៅក្នុងមហាសមុទ្រប៉ាស៊ីហ្វិក។ ក្រោយពីប្រទេសជប៉ុន បានបង្ហូរទឹកកខ្វក់ ដែលបានឆ្លងកាត់ការចម្រោះរួចហើយក្ដី តែការបញ្ចេញទឹកកាកសំណល់នេះ បានធ្វើឱ្យប្រទេសមួយចំនួនមិនពេញចិត្ត ជាពិសេស ចិន បានហាមឃាត់ការនាំចូលគ្រឿងសមុទ្រពីប្រទេសជប៉ុន ព្រមទាំងមានការតវ៉ានៅក្នុងប្រទេសជប៉ុនខ្លួនឯង និងកូរ៉េខាងត្បូង។ ដោយឡែក សម្រាប់កម្ពុជា គឺមិនបានហាមឃាត់ការនាំចូលផលិតផលជលផល ជាពិសេសផលិតផលគ្រឿងសមុទ្រដែលមានប្រភពពីប្រទេសជប៉ុននេះឡើយ។
នៅក្នុងកិច្ចពិភាក្សាតុមូល រៀបចំដោយក្លិបអ្នកកាសែតកម្ពុជា នៅព្រឹកថ្ងៃទី២៦ ខែកញ្ញានេះ លោក អ៊ូអិណូ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំនៅកម្ពុជា ជួសមុខឱ្យរដ្ឋាភិបាលទីក្រុងតូក្យូ បានថ្លែងអំណរគុណចំពោះរាជរដ្ឋាភិបាលកម្ពុជា ដែលមិនមានហាមឃាត់ការនាំចូលផលិតផលគ្រឿងសមុទ្រពីប្រទេសជប៉ុន ព្រោះតែហេតុផលនេះឡើយ។ លោកឯកអគ្គរាជទូត ថ្លែងដូច្នេះថា៖ «ពាក់ព័ន្ធនឹងការបញ្ចេញទឹកកាកសំណល់កខ្វក់ពីរោងចក្រអគ្គិសនីហ្វូគូស៊ីម៉ានេះ យើងពិតជាថ្លែងអំណរគុណចំពោះរាជរដ្ឋាភិបាលកម្ពុជា ដែលមិនបានហាមឃាត់ ឬដាក់ការរឹតត្បិតណាមួយលើផលិតផលជលផល ឬអាហារសមុទ្ររបស់ជប៉ុន»។
លោកឯកអគ្គរាជទូត បន្តថា ក្នុងនាមជាឯកអគ្គរាជទូតជប៉ុនប្រចាំកម្ពុជា លោក បានប្រាប់ព័ត៌មាននេះទៅកាន់ទីក្រុងតូក្យូ ដើម្បីឱ្យព័ត៌មាននេះបានដឹងដល់ថ្នាក់ដឹកនាំជប៉ុន ហើយក្រោយទទួលបានព័ត៌មានេះ ថ្នាក់ដឹកនាំជប៉ុន បានសម្ដែងការរីករាយចំពោះការសម្រេចចិត្តរបស់កម្ពុជា។ ឯកអគ្គរាជទូតរូបនេះ បានចាត់ទុកការសម្រេចរបស់កម្ពុជាពេលនេះ បានកើតចេញពីចំណងទំនាក់ទំនងដ៏ល្អរវាងប្រទេសទាំងពីរ កម្ពុជា-ជប៉ុន ហើយក៏បានឆ្លុះបញ្ចាំងអំពីជំហរមួយរបស់កម្ពុជា ដែលបានផ្ដល់នូវភាពកក់ក្ដៅ ភាពជិតស្និទ្ធដល់ជប៉ុន ក្នុងនាមប្រទេសទាំងពីរជាមិត្តល្អយូរលង់ណាស់មកហើយ។
គួរជម្រាបថា បើតាមលទ្ធផលវិភាគទៅលើទឹកសមុទ្រនៅជិតរោងចក្រថាមពលនុយក្លេអ៊ែរ នៅក្នុងតំបន់ហ្វូគូស៊ីម៉ា របស់ជប៉ុន ដោយទីភ្នាក់ងារថាមពលអាតូមិកអន្តរជាតិ (IAEA) បានរកឃើញថា សារជាតិសំណល់ដែលមានជាតិវិទ្យុសកម្មទ្រីទីយ៉ូម (Tritium) មានកម្រិតទាបជាងការកំណត់ ដែលផលប៉ះពាល់នៃវិទ្យុសកម្មតិចតួចបំផុតទៅលើមនុស្ស និងបរិស្ថាន៕
-
សន្តិសុខសង្គម១ សប្តាហ៍ agoទុរេនរាប់តោននៅផ្សារភូពុយ អនុញ្ញាតឱ្យបន្តលក់ ក្រោយមន្ត្រីជំនាញប្រមូលសំណាក និងសាកសួរប្រភពនាំចូល
-
សេដ្ឋកិច្ច៥ ថ្ងៃ agoរដ្ឋាភិបាលហាមឃាត់ក្រុមហ៊ុនផលិតស្រា និងភេសជ្ជៈផ្ដល់រង្វាន់តាមក្រវិលកំប៉ុង ចាប់ពីដើមខែតុលា ឆ្នាំនេះ
-
ព័ត៌មានជាតិ៤ ថ្ងៃ agoក្រសួងវប្បធម៌ ព្រមានចាត់វិធានការច្បាប់លើជនដែលនៅតែបន្តកែច្នៃ ប្រើគ្រឿងលម្អយកគំរូគ្រឿងឥស្សរិយយស«ព្រះរាជមហាកណ្ឋាភណ្ឌគ្រងរាជសម្បត្តិ»
-
ព័ត៌មានជាតិ១ ថ្ងៃ agoក្រសួងសុខាភិបាល ត្រៀមបង្ការ និង ទប់ស្កាត់ការនាំចូលជំងឺឆ្លង ហាន់តា នៅអាកាសយានដ្ឋានអន្តរជាតិតេជោ
-
ព័ត៌មានជាតិ៦ ថ្ងៃ agoអ្នកជំនាញ ទាញសញ្ញាបន្ទាត់ក្រហម វិបត្តិនយោបាយផ្ទៃក្នុងថៃអាចផ្ទេរមកជម្លោះព្រំដែនសារជាថ្មី
-
ព័ត៌មានជាតិ៤ ថ្ងៃ agoថៃលុបMoU 2001៖ សម្ដេចតេជោប្រាប់ថៃថា កុំបបួលកម្ពុជាចរចាទ្វេភាគីទៀត ត្រូវដឹកដៃគ្នាទៅរកយន្តការអន្តរជាតិ
-
ព័ត៌មានអន្ដរជាតិ២ ថ្ងៃ agoកូរ៉េខាងជើង ត្រៀមដាក់ពង្រាយកាំភ្លើងធំស៊េរីថ្មី នៅក្បែរព្រំដែន និងបង្អួតនាវាចម្បាំងខ្នាតយក្ស
-
ព័ត៌មានជាតិ១ ថ្ងៃ agoប្រព័ន្ធហ្វឹកហ្វឺនអាវុធជាអំណោយរបស់ឥណ្ឌា នឹងរួមចំណែកលើកកម្ពស់សមត្ថភាពកងទ័ពជើងគោកកម្ពុជា