ព័ត៌មានជាតិ

អ្នកនាំពាក្យ ៖ ពលរដ្ឋជាង ៥០០ គ្រួសារ ប៉ះពាល់ដោយជំនន់ទឹកភ្លៀងនៅខេត្តកំពង់ស្ពឺ

បានផុស

៣ years មុន

នៅ

ថ្ងៃចន្ទ ១៦ តុលា ២០២៣

ដោយ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅរសៀលថ្ងៃទី ១៦ តុលានេះថា ជំនន់ទឹកភ្លៀងនៅខេត្តកំពង់ស្ពឺបានប៉ះពាល់ប្រជាពលរដ្ឋប្រមាណជាង ៥០០ គ្រួសារ និងជម្លៀសទៅរកទីទួលសុវត្ថិភាពចំនួន ១៧ គ្រួសារ ព្រមទាំងហេដ្ឋារចនាសម្ព័ន្ធផ្សេងៗ ទៀត។

លោកបានបន្តថា ទឹកចាប់ផ្ដើមជន់លិចហូរកាត់ផ្លូវជាតិលេខ ៣ ត្រង់ចំណុចស្រុកគងពិសី នៅថ្ងៃទី ១៥ ខែតុលា បណ្តាលឲ្យអាជ្ញាធរផ្អាកការធ្វើចរាចរណ៍ជាបណ្ដោះអាសន្ន ដើម្បីចៀសវាងការខូចខាតផ្លូវ និងគ្រោះថ្នាក់ផ្សេងៗ ដល់អ្នកធ្វើដំណើរ។

លោកបានបន្តទៀតថា អាជ្ញាធរមូលដ្ឋាន និងគណៈកម្មាធិការជាតិគ្រប់គ្រងគ្រោះមហន្តរាយ បានចុះពិនិត្យ និងជួយសង្គ្រោះដល់ប្រជាពលរដ្ឋប៉ះពាល់ដោយជំនន់ទឹកភ្លៀងប្រមាណជាង ៥០០ គ្រួសារ និងជម្លៀសប្រជាពលរដ្ឋចំនួន ១៧ គ្រួសារ ទៅរកទីទួលសុវត្ថិភាពបានទាន់ពេលវេលា។

លោកបានបន្ថែមថា យ៉ាងណាក៏ដោយនៅព្រឹកថ្ងៃទី ១៦ តុលានេះ ទឹកបន្តស្រកជាបណ្តើរៗ ហើយ បានហូរធ្លាក់ទៅខេត្តកណ្តាល និងខេត្តតាកែវ បង្កឲ្យជន់លិចនៅតាមតំបន់មួយចំនួន នៃខេត្តទាំងពីរនេះផងដែរ៕

អត្ថបទ ៖ សំអឿន