ព័ត៌មានជាតិ

សហគ្រាសជាង១,៣០០បានបិទ និងកម្មករជាង១០ម៉ឺននាក់បាត់បង់ការងារ ដោយសារកូវីដ១៩

បានផុស

៥ years មុន

នៅ

ថ្ងៃសុក្រ ៥ កុម្ភៈ ២០២១

ដោយ

វិបត្តិជំងឺកូវីដ១៩ បានបណ្តាលឲ្យសហគ្រាសនៅកម្ពុជាជាង ១,៣០០កន្លែង ត្រូវបានបិទទ្វារលែងដំណើរការនិងធ្វើឲ្យកម្មករនិយោជិតបាត់បង់ការងារជាង ១០ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៉ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា នៅក្នុងឆ្នាំ២០២០កន្លងទៅនេះ មានសហគ្រាសចំនួន ១,៣៥៦ ទីតាំងបានបិទលែងដំណើរការ ដែលមានកម្មករនិយោជិតបាត់បង់ការងារចំនួន ១០៨,៨២៥ នាក់ ដោយសារវិបត្តិជំងឺកូវីដ-១៩។

បើតាមលោក រដ្ឋមន្ត្រីចំនួននេះ គឺច្រើនជាងឆ្នាំ២០១៩ ក្នុងរយៈពេលដូចគ្នា ដែលមានសហគ្រាសចំនួន ៩៦៩ និងកម្មករនិយោជិតបាត់បង់ការងារចំនួន ៨៥,៨៨៩ នាក់ ដែលភាគច្រើន គឺជាប្រភេទរោងចក្រសហគ្រាស ក្រៅពីវិស័យកាត់ដេរ។ លោក រដ្ឋមន្ត្រីបានបន្តថា គិតមកដល់ដំណាច់ខែធ្នូ ឆ្នាំ២០២០នេះ មានរោងចក្រ សហគ្រាសត្រឹមចំនួន ១៥០ ដែលស្មើនឹងកម្មករនិយោជិតចំនួន ២៣,៦៨២ នាក់ប៉ុណ្ណោះ កំពុងព្យួរកិច្ចសន្យាការងារមាន ការថយចុះពីចំណុចកំពូលនៅក្នុងខែមិថុនា ឆ្នាំ២០២០ ដែលនៅពេលនោះមានរោងចក្រ សហគ្រាសរហូតដល់ទៅចំនួន ៤៣៣ ដែលមានកម្មករនិយោជិតចំនួន ១៥៣,៣៣៦ នាក់។

យ៉ាងណាក៏ដោយ លោក រដ្ឋមន្ត្រីបានបញ្ជាក់ថា ទោះបីជានៅឆ្នាំ២០២០មានរោងចក្រសហគ្រាសបិទទ្វារ ក៏មានរោងចក្រសហគ្រាសចំនួន ១,១០៣ បានបើកថ្មី និងបានបង្កើតការងារបន្ថែមចំនួន ៦១,២៥៧ នាក់ ផងដែរ៕

អត្ថបទ៖ សំអឿន

សូមចុចអាន៖ ផ្ទះល្វែងជាច្រើន ប្រកាសដាក់ស្លាកលក់បន្តបន្ទាប់ នៅតំបន់ជន់លិចក្នុងខណ្ឌដង្កោ