ការប្រណាំងទូក២ថ្ងៃ៖ ខេត្តកំពង់ចាម ទទួលបានភ្ញៀវទេសចរជាង ៥០ម៉ឺននាក់

ពិធីប្រណាំងទូក “ង” បណ្តែតប្រទីប អុជកាំជ្រួច និងតាំងពិព័រណ៌ផលិតផលរយ:ពេល ២ថ្ងៃ ក្នុងក្រុងកំពង់ចាម មានភ្ញៀវទេសចរជាតិ និងអន្តរជាតិចូលរួមទស្សនាកម្សាន្តជាង៥០ម៉ឺននាក់ ក្រោមបរិយាកាសសប្បាយរីករាយ ពុំមានហេតុការណ៍មិនល្អកើតឡើងគួរឲ្យកត់សម្គាល់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ុន ចាន់ដា អភិបាលខេត្តកំពង់ចាម បានឲ្យដឹងថា ការប្រារព្ធពិធីប្រណាំងទូក “ង” បណ្តែតប្រទីប អុជកាំជ្រួច និងតាំងពិព័រណ៌ភូមិមួយផលិតផលមួយ នៅថ្ងៃទី២៨ ខែតុលា ឆ្នាំ ២០២៣ មានភ្ញៀវទេសចរចូលរួមទស្សនា ប្រមាណជិត ១៦ម៉ឺននាក់ ក្នុងនោះ ភ្ញៀវបរទេស ៧១នាក់។ ដោយឡែក ថ្ងៃទី២ ត្រូវនឹងថ្ងៃទី២៩ ខែតុលា ឆ្នាំ២០២៣ មានភ្ញៀវទេសចរជាតិ និងអន្តរជាតិប្រមាណជាង៣៥ម៉ឺននាក់ ក្នុងនោះ ភ្ញៀវបរទេស ៣១៨នាក់។ ដូច្នេះ សរុបភ្ញៀវទេសចរទាំង ២ថ្ងៃ មានចំនួនជាង ៥០ម៉ឺននាក់ ។

ទន្ទឹមនឹងនេះដែរ ចំពោះបញ្ហា សន្តិសុខ និងសណ្តាប់ធ្នាប់ក្នុងកម្មវិធីសប្បាយៗ ពិធីបុណ្យអុំទូកនៅឆ្នាំនេះ លោក ត្រី សោមរស់ ស្នងការរងទទួលបន្ទុកផ្នែកសណ្តាប់ធ្នាប់ និងចរាចរនៃស្នងការដ្ឋាននគរបាលខេត្តកំពង់ចាម បានបញ្ជាក់ថា រយៈពេលចាប់តាំងពីថ្ងៃទី២៣ រហូតថ្ងៃដល់ប្រណាំងទូក ថ្ងៃបញ្ចប់ គឺប្រព្រឹត្តទៅយ៉ាងរលូន ពុំមានហេតុការណ៍ណាមួយកេីតឡេីងគួរឲ្យកត់សម្គាល់ឡេីយ ពោល គឺ សន្តិសុខ សុវត្ថិភាព និងសណ្តាប់ធ្នាប់ គ្មានអំពេីហិង្សា ឬ គ្រោះថ្នាក់ដល់អាយុជីវិតឡេីយ៕

 អត្ថបទ និង រូបភាព ៖ ឡេក ចាន់ពេជ្រ