ទូកចំនួន៣៩ របស់ខេត្តកំពង់ចាម នឹងចូលរួមប្រកួតក្នុងព្រះរាជពិធីបុណ្យអុំទូក នៅភ្នំពេញ

នៅឆ្នាំនេះ ទូកស្ថិតក្នុងខេត្តកំពង់ចាម ដែលត្រូវចូលរួមក្នុងការប្រកួតក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាទន្លេចតុមុខ រាជធានីភ្នំពេញ មានចំនួន៣៩ទូក។

លោក ស្រី សុភ័ក្រ្ត អភិបាលរងខេត្ត និងជាអ្នកនាំពាក្យសាលាខេត្តកំពង់ចាម បានប្រាប់ «កម្ពុជាថ្មី» ឱ្យដឹងថា នៅក្នុងឆ្នាំ២០២៣នេះ ទូក «ង» ទូកមួង និងទូកខ្នាតអន្តរជាតិ ដែលត្រៀមទៅចូលរួមការអុំប្រណាំងក្នុងព្រះរាជពិធីបុណ្យអុំទូក  បណ្តែតប្រទីប និងសំពះព្រះខែ អកអំបុក នាចុងសប្តាហ៍នេះ មានទូកចំនួនសរុប៣៩ទូក។ ក្នុងនោះ ទូកខ្នាតអន្តរជាតិចំនួន១៤ទូក ទូកអុំបុរសចំនួន២៣ទូក និងទូកចែវចំនួន២ទូក ដែលមានកីឡាករសរុបចំនួន២៥៩៩នាក់។

លោក ស្រី សុភ័ក្រ្ត បានបញ្ជាក់ថា ទូក ដែលត្រូវអុំប្រណាំងក្នុងព្រះរាជពិធីបុណ្យអុំទូក នៅរាជធានីភ្នំពេញនេះ គឺមានជួយឧបត្ថម្ភជាស្បៀងអាហារ និងថវិកាពីរដ្ឋបាលខេត្តកំពង់ចាមមួយចំនួន និងមួយចំនួនទៀតគឺមានការគាំទ្រឧបត្ថម្ភពីសប្បុរសជន រួមទាំងព្រះចៅអធិការតាមបណ្តាវត្តរៀងៗខ្លួន។ លោក បន្តថា ចំពោះកន្លែងស្នាក់នៅសម្រាប់ចំណុះទូក រួមនឹងគណៈកម្មាធិការតាមទូកដែលចូលរួម ក៏ត្រូវបានរៀបចំជាបណ្តើរៗហើយនៅឯខណ្ឌជ្រោយចង្វារ  រាជធានីភ្នំពេញ៕

អត្ថបទ និងរូបភាព៖ ឡេក ចាន់ពេជ្រ