បេក្ខជនបាក់ឌុបជាប់និទ្ទេស A នៅបន្ទាយមានជ័យកើនឡើងទ្វេដង

លទ្ធផលប្រឡងសញ្ញាបត្រមធ្យមសិក្សាទុតិយភូមិឆ្នាំ ២០២៣ សម្រាប់ខេត្តបន្ទាយមានជ័យមានបេក្ខជនប្រឡងជាប់បាននិទ្ទេស A ចំនួន ៨២ នាក់ដែលចំនួននេះជាចំនួនច្រើនលើសឆ្នាំមុនមានតែចំនួន ៤៨ នាក់។

តាមការឱ្យដឹងពីលោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ ចំពោះលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៣ ដែលប្រព្រឹត្តទៅកាលពីថ្ងៃទី ៦ វិច្ឆិកា ២០២៣ និងបានប្រកាសលទ្ធផល​​សម្រាប់ខេត្តបន្ទាយមានជ័យនៅព្រឹកថ្ងៃទី ២៤ វិច្ឆិកា ២០២៣នេះមានបេក្ខជនជាប់សរុប ៤ ១៤៣ នាក់ក្នុងនោះមានបេក្ខជនជានារី ២ ៥០៥ គិតជាភាគរយ ៦៨.៣៩% លើបេក្ខជនដែលមកប្រឡងសរុប ៦ ០៥៨ នាក់។

សម្រាប់លទ្ធផលដែលជាប់ខាងលើមានបេក្ខជនទទួលបាននិទ្ទេស A ចំនួន ៨២ នាក់ ស្រី៤៣នាក់, និទ្ទេស B មានចំនួន៣៣១នាក់ ស្រី២០៧នាក់,និទ្ទេស C មានចំនួន៦៤៦ ស្រី៤៣៥នាក់,និទ្ទេស D មាន ១ ៤១៨ នាក់ស្រី ​៨៧១​នាក់, និទ្ទេសE មាន ១ ៦៦៦ នាក់ ស្រី៩៤៩ នាក់។

លោកបានបញ្ជក់ឱ្យដឹងទៀតថា ឆ្នាំនេះមានបេក្ខជនប្រឡងច្រើនជាងឆ្នាំមុន និងនិទ្ទេស A ក៏ច្រើនជាង ចំនួននាក់ជាប់ក៏ច្រើនជាង សបញ្ជក់ឱ្យឃើញថា វិស័យអប់រំនៅខេត្តបន្ទាយមានជ័យមានការរីកចម្រើនខ្លាំងស្របតាមគោលនយោបាយរបស់រដ្ឋាភិបាល និងការកែទម្រង់របស់ក្រសួងអប់រំដែលមានពាក្យថា ចេះជាប់តាមភាពជាក់ស្តែង​នៃការប្រកាស​លទ្ធផលនេះដែលមិនសូវមានបេក្ខជនមកស្តាប់ច្រើនទេ។

ជាក់ស្តែងការប្រកាសនេះនៅវិទ្យាល័យហ៊ុន សែន ខ្លាកូន ដែលមានលោក ហុឹល រ៉ាយ៉ា អភិបាលរងខេត្តបន្ទាយមាន​ជ័យ​រួមនឹងខាងមន្ទីរអប់រំបានអញ្ចើញប្រកាសផ្ទាល់មានបេក្ខជនជាអ្នកប្រឡងមកតិចតួចទោះបីជាមានបេក្ខជនជាប់និទ្ទេសAក៍ដោយក៍មិនបានមកស្តាបលទ្ធផលដែលដោយពួកគាត់អាងលើមើលតាមការប្រកាសតាមបណ្តាញសង្គមរបស់ក្រសួង ឬមន្ទីរអប់រំ៕

អត្ថបទ៖ អពៅ