កម្ពុជា-អឺរ៉ុប ប្រកាសបន្តគាំទ្រគ្នាទៅវិញទៅមកនៅលើឆាកអន្តរជាតិ

កម្ពុជា និងអឺរ៉ុប បានប្តេជ្ញាចិត្តថែរក្សាទំនាក់ទំនងល្អដែលមានស្រាប់ និងប្រកាសបន្តគាំទ្រគ្នាទៅវិញទៅមកនៅលើឆាកអន្តរជាតិ។ ការបញ្ជាក់បែបនេះធ្វើឡើងដោយប្រមុខការទូតកម្ពុជា និងលោកស្រីស្នងការសហភាពអឺរ៉ុបសម្រាប់ភាពជាដៃគូអន្តរជាតិ។

ក្នុងឱកាសនៃដំណើរទស្សនកិច្ចនៅកម្ពុជា លោកស្រី ជូតា អេភើលឡៃនីន (Jutta Urpilainen) ស្នងការសហភាពអឺរ៉ុបសម្រាប់ភាពជាដៃគូអន្តរជាតិ បានចូលជួបពិភាក្សាការងារជាមួយលោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា កាលពីថ្ងៃទី១៣ ខែមីនា ឆ្នាំ២០២៤។

ក្នុងជំនួបទ្វេភាគីនេះ លោកឧបនាយករដ្ឋមន្ត្រី សុខ ចិន្តាសោភា និងលោកស្រី ជូតា អេភើលឡៃនីន បានសម្ដែងនូវការពេញចិត្តចំពោះទំនាក់ទំនងដ៏យូរអង្វែង និងវាយតម្លៃខ្ពស់ចំពោះកិច្ចសហប្រតិបត្តិការដ៏រីកចម្រើនស្ទើរគ្រប់វិស័យរវាងកម្ពុជា និងសហភាពអឺរ៉ុប។ លោកប្រមុខការទូតកម្ពុជា និងលោកស្រីស្នងការសហភាពអឺរ៉ុប បានបញ្ជាក់ពីការប្តេជ្ញាចិត្តរបស់ខ្លួនក្នុងការថែរក្សាទំនាក់ទំនងល្អដែលមានស្រាប់ និងបន្តគាំទ្រគ្នាទៅវិញទៅមកនៅលើឆាកអន្តរជាតិបន្ថែមទៀត។

លោកឧបនាយករដ្ឋមន្ត្រី សុខ ចិន្តាសោភា ក៏បានសំដែងការអបអរសាទរចំពោះសហភាពអឺរ៉ុបក្នុងការរៀបចំធ្វើជាម្ចាស់ផ្ទះប្រកបដោយជោគជ័យនៃកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប លើកទី២៤ និងវេទិកាថ្នាក់រដ្ឋមន្រ្តីសហភាពអឺរ៉ុប-តំបន់ឥណ្ឌូប៉ាស៊ីហ្វិក លើកទី៣ កាលពីដើមខែកុម្ភៈ ឆ្នាំ២០២៤ កន្លងទៅ នៅទីក្រុងព្រុចសែល។  

លើសពីនេះ ភាគីទាំងពីរ ក៏បានពិភាក្សាគ្នាដោយផ្ដោតលើការផ្លាស់ប្តូរទស្សនៈលើការវិវត្តសភាពការណ៍នយោបាយនៅកម្ពុជា ក៏ដូចជាប្រធានបទសំខាន់ៗដទៃទៀត ដែលជាផលប្រយោជន៍ និងក្តីកង្វល់រួមពាក់ព័ន្ធនឹងបញ្ហាតំបន់ និងអន្តរជាតិផងដែរ៕