អគ្គនាយកដ្ឋានអត្តសញ្ញាណកម្ម ស្នើចាត់វិធានការបុគ្គលដែលកែសំបុត្រកំណើត ដោយដាក់ថានៅក្នុងប្រទេសវៀតណាម

អគ្គនាយកដ្ឋានអត្តសញ្ញាណកម្ម ច្រានចោលការផ្សាយថា មានសំបុត្រកំណើតដែលចេញដោយអាជ្ញាធរឃុំ នៃខេត្តស្វាយរៀង បានដាក់ថាមានទីកន្លែងស្ថិតក្នុងប្រទេសវៀតណាម។ អគ្គនាយកដ្ឋានជំនាញនេះ បានស្នើសមត្ថកិច្ចចាត់វិធានការលើបុគ្គលដែលបានកែ និងក្លែងទិន្នន័យនេះជាធរមាន។

ការចេញមកច្រានចោលនេះ ក្រោយអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានពិនិត្យឃើញថា ថ្មីៗនេះ មានការផ្សព្វផ្សាយ និងចែករំលែកបន្តតាមរយៈបណ្តាញសង្គមហ្វេសប៊ុក និងតិកតុក អំពីសំបុត្របញ្ជាក់កំណើតលេខ ១៥៣៧ ក្នុងសៀវភៅបញ្ជាក់កំណើតលេខ១៧/២០០៤ចុះថ្ងៃទី១៧ ខែវិច្ឆិកា ឆ្នាំ២០០៤ ចេញដោយមន្ត្រីអត្រានុកូល ដ្ឋានឃុំបាវិត ស្រុកចន្ទ្រា ខេត្តស្វាយរៀង ដោយបានបង្ហាញថា ស្ថិតក្នុងប្រទេសវៀតណាម។

ភ្លាមៗក្រោយឃើញការផ្សព្វផ្សាយបែបនេះ អគ្គនាយកដ្ឋានអត្តសញ្ញាណកម្ម បានចាត់ឱ្យមានការត្រួតពិនិត្យជាបន្ទាន់លើសៀវភៅភ្លោះជាគល់បញ្ជីច្បាប់ដើម ដែលតម្កល់ទុកនៅអគ្គនាយកដ្ឋានអត្តសញ្ញាណកម្ម និងនៅសាលាស្រុកចន្ទ្រា ខេត្តស្វាយរៀង។ តាមរយៈសេចក្ដីបំភ្លឺ នាថ្ងៃទី១១ ខែមេសា ឆ្នាំ២០២៤ អគ្គនាយកដ្ឋានអត្តសញ្ញាណកម្ម អះអាងថា សំបុត្របញ្ជាក់កំណើតដែលផ្សព្វផ្សាយតាមរយៈបណ្តាញសង្គមហ្វេសប៊ុក និងតិកតុក ខាងលើនេះ គឺជាឯកសារកែក្លែងខុសពីទិន្នន័យដើម ក្នុងចេតនាបំផ្លើសធ្វើឱ្យមានការយល់ច្រឡំ ញុះញង់ និងបំពុលសង្គម។​

បើតាមការបញ្ជាក់ឱ្យដឹងដោយអគ្គនាយកដ្ឋានអត្តសញ្ញាណកម្ម គឺ«ទិន្នន័យពិតប្រាកដអំពីទីកន្លែងកំណើតរបស់សាមីខ្លួន ឈ្មោះ ញ៉ែម ឈឿន ភេទស្រី ដែលបានចុះបញ្ជីកំណើតនៅឆ្នាំ២០០៤ គឺស្ថិតនៅភូមិតាពៅ ឃុំបាវិត ស្រុកចន្ទ្រា ខេត្តស្វាយរៀង ប្រទេសកម្ពុជា»។

ជុំវិញករណីនេះ អគ្គនាយកដ្ឋានអត្តសញ្ញាណកម្ម បានស្នើដល់សមត្ថកិច្ចពាក់ព័ន្ធចាត់វិធានការស្រាវជ្រាវរកមុខសញ្ញាដែលបានកែក្លែងទិន្នន័យខាងលើ ដើម្បីយកមកផ្តន្ទារទោសតាមច្បាប់ជាធរមាន។ ជាមួយគ្នានេះ អគ្គនាយកដ្ឋានអត្តសញ្ញាណកម្ម ក៏បានអំពាវនាវអ្នកប្រើប្រាស់បណ្តាញសង្គមទាំងអស់លុបចោលការផ្សព្វផ្សាយ និងបញ្ឈប់ការចែករំលែកបន្តឯកសារខាងលើនេះជាបន្ទាន់ ដើម្បីចៀសវាងពីការទទួលខុសត្រូវចំពោះមុខច្បាប់ពីបទផ្សព្វផ្សាយ និងចែករំលែកព័ត៌មានមិនពិត៕