នៅពេលខាងមុខ សម្ដេចតេជោ គ្រោងទៅទស្សនកិច្ចប្រទេស៤ ចិន អារ៉ាប៊ីសាអូឌីត កាតា តួកគី

តាមការគ្រោងទុក នាពេលខាងមុខនេះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា នឹងអញ្ជើញទៅបំពេញទស្សនកិច្ចនៅប្រទេសជាមិត្តចំនួន៤ ដើម្បីពង្រឹងបន្ថែមទៀតនូវទំនាក់ទំនងជាមិត្តភាពជាមួយបណ្ដាប្រទេសទាំងនោះ។ ប្រទេសទាំង៤ ដែលសម្ដេចតេជោ គ្រោងទៅទស្សនកិច្ច រួមមាន ចិន អារ៉ាប៊ីសាអូឌីត កាតា និងតួកគី។

ដំណឹងនៃដំណើរទស្សនកិច្ចនេះ ត្រូវបានបង្ហើបឱ្យដឹងដោយសម្ដេចតេជោ ហ៊ុន សែន ផ្ទាល់ នៅក្នុងឱកាសដែលសម្ដេចដឹកនាំសម័យប្រជុំពេញអង្គព្រឹទ្ធសភា លើកទី២ កាលពីរសៀលថ្ងៃទី២៥ ខែវិច្ឆិកា​ ឆ្នាំ២០២៤កន្លងទៅ។ ប៉ុន្តែមិនទាន់មានព័ត៌មានលម្អិតជុំវិញដំណើរទស្សនកិច្ចទាំងនេះឡើយ។

សម្ដេចតេជោ បង្ហើបឱ្យដឹងថា នៅពេលខាងមុខ សម្ដេចនឹងទៅកាន់ប្រទេសចិន និងបន្តទៅកាន់អារ៉ាប៊ីសាអូឌីត កាតា និងតួកគី។ សម្ដេចតេជោ៖ «នៅពេលខាងមុខនេះ ខ្ញុំដឹងកម្មវិធីរបស់ខ្ញុំ ទី១ គឺត្រូវធ្វើដំណើរទៅកាន់សាធារណរដ្ឋប្រជាមានិតចិន នៅថ្ងៃទី២ បន្តទៅ ខ្ញុំចេញដំណើរទៅកាន់អារ៉ាប៊ីសាអូឌីត កាតា និងតួកគី»។​

តែយ៉ាងណា ដំណើរទស្សនកិច្ចទៅចិនរបស់សម្ដេចតេជោ គឺត្រូវបានលើកយកមកពិភាក្សាក្នុងជំនួបសម្តែងការគួរសមរបស់លោកឯកអគ្គរដ្ឋទូតចិនប្រចាំកម្ពុជា ជាមួយឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា។ យោងតាមក្រសួងការបរទេស ក្នុងជំនួបកាលពីថ្ងៃទី២៦ ខែវិច្ឆិកា ឆ្នាំ២០២៤ លោក ប្រាក់​ សុខុន រដ្ឋមន្ត្រីការបរទេស និងលោក វ៉ាង វិនពីន ឯកអគ្គរដ្ឋទូតចិន បានជជែកគ្នាអំពីការត្រៀមរៀបចំដំណើរទស្សនកិច្ចផ្លូវការ នាពេលខាងមុខរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា ទៅកាន់សាធារណរដ្ឋប្រជាមានិតចិន។

ភាគីទាំងពីរ បានគូសបញ្ជាក់ពីតម្លៃនៃដំណើរទស្សនកិច្ចនេះ ថា ក្នុងគោលបំណងពង្រឹងបន្ថែមភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន ក្រោមក្របខណ្ឌកិច្ចសហប្រតិបត្តិការត្បូងពេជ្រ សំដៅឆ្ពោះទៅកាន់អនាគតរួមគ្នា ដើម្បីសន្តិភាព វិបុលភាព និងការអភិវឌ្ឍ៕