ព័ត៌មានជាតិ

គ្រួសារក្មេងស្រីដែលមានជំងឺប្រចាំកាយនៅស្រុកត្រាំកក់ទទួលអំណោយផ្ទះមួយខ្នង

បានផុស

៥ years មុន

នៅ

ថ្ងៃពុធ ១៧ មីនា ២០២១

ដោយ

តាកែវ ៖ លោក កែវ វ៉ាន្នី ប្រធានចលនាយុវជនកម្ពុជាក្រុម១៥៧ សាខាខេត្តតាកែវបន្ទាប់ពីទទួលព័ត៌មានថា ក្មេងស្រីដែលមានជំងឺពងបែកពេញរាងកាយ ត្រូវបានភ្លើងឆេះផ្ទះអស់គ្មានកន្លែងស្នាក់នៅនោះ នៅព្រឹកថ្ងៃពុធ ទី១៧ ខែមីនា ឆ្នាំ២០២០ លោកបានចាត់ឲ្យលោក អេង ប៉ជាក អនុប្រធានចលនាយុវជនកម្ពុជាក្រុម១៥៧ សាខាខេត្ត ជាតំណាង ដឹកនាំក្រុមការងារ ចុះសួរសុខទុក្ខ និងពិនិត្យមើលទីតាំងជាក់ស្តែង សម្រាប់ធ្វើការសាងសង់ផ្ទះមួយខ្នង ជូនគ្រួសារក្មេងស្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អេង ប៉ជាក អនុប្រធានចលនាយុវជនកម្ពុជាក្រុម១៥៧សាខាខេត្តតាកែវ បានពាំនាំនៅក្តីនឹករលឹក ផ្តាំផ្ញើសាកសួរសុខទុក្ខពីចំងាយពីសំណាក់ លោក ម៉ឹង ពន្លក ប្រធានចលនាយុវជនកម្ពុជាក្រុម១៥៧ និងលោក កែវ វ៉ាន្នី ប្រធានចលនាយុវជនកម្ពុជាក្រុម១៥៧ សាខាខេត្តតាកែវ មកជម្រាបជូនគ្រួសាររងគ្រោះ ដោយក្តីនឹករំលឹក និងសូមចូលរួមសម្ដែងការសោកស្ដាយចំពោះគ្រួសារប្អូនស្រី ដែលជួបគ្រោះអកុសលបែបនេះ ដែលបណ្ដាលឲ្យភ្លើងឆេះផ្ទះអស់ទាំងស្រុង កាលពីពេលថ្មីៗនេះ ។

លោកបន្តថា លោកប្រធានសាខាចលនាកម្ពុជាក្រុម១៥៧សាខាខេត្តតាកែវ បានផ្ដូចផ្ដើម សាងសង់ផ្ទះ មួយខ្នងជូនគ្រួសារប្អូនស្រី ដែលទំហំទទឹង ៤ម៉ែត្រ និងបណ្ដោយ ៥ម៉ែត្រ និងបន្ទប់ទឹកមួយ ដោយតសំយាបមុខ២ម៉ែត្រកន្លះនិងសំយាបទៅខាងក្រោយ២ម៉ែត្រព្រមទាំងសម្ភារៈមួយចំនួនដើម្បីអោយប្អូនស្រីបានស្នាក់នៅសមរមដោយជាងចាប់ផ្តើមសាងសង់ពីថ្ងៃនេះទៅឲ្យឆាប់រួចរាល់។

សូមរំលឹកថា ក្មេងស្រីឈ្មោះ រួន មាលី អាយុ១២ មានជំងឺពងបែករបកពេញខ្លួន តាំងពីអាយុ២ឆ្នាំ ដែលស្ថានភាពគ្រួសារក្រីក្រខ្វះខាតខ្លាំង មានឪពុកឈ្មោះ រួន ជក់ អាយុ៥៣ ឆ្នាំ ធ្វើការជាជាងសំណង់ និងម្តាយឈ្មោះ ហ៊ួន ស្រីសរ អាយុ ៣៨ ឆ្នាំ រស់នៅភូមិត្រពាំងក្រឡាញ់ ឃុំអូសារាយ ស្រុកត្រាំកក់ ខេត្តតាកែវ ដែលត្រូវបានអគ្គីភ័យឆេះផ្ទះអស់ខ្ទេចគ្មានសល់កាលពីថ្ងៃ១២ ខែមីនា ឆ្នាំ២០២១ កន្លងទៅថ្មីៗនេះ៕

ដោយ ៖ វីរៈ