ស្ថានទូតខ្មែរនៅជប៉ុនឱ្យពលរដ្ឋនៅតំបន់ OFUNATO ប្រយ័ត្នគ្រោះថ្នាក់ដោយភ្លើងឆេះព្រៃក្នុងតំបន់នោះ

ស្ថានទូតកម្ពុជានៅប្រទេសជប៉ុន អំពាវនាវប្រជាពលរដ្ឋកម្ពុជា ដែលកំពុងរស់នៅក្នុងទីក្រុង OFUNATO ប្រុងប្រយ័ត្នចំពោះគ្រោះថ្នាក់យថាហេតុបង្កឡើងដោយភ្លើងឆេះព្រៃក្នុងតំបន់ជាប់មាត់សមុទ្រ នៃក្រុង OFUNATO ប្រទេសជប៉ុន ដែលកំពុងបន្តរាលដាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មាន NHK របស់ជប៉ុន បានឱ្យដឹងថា ភ្លើងឆេះព្រៃនៅតំបន់ជាប់មាត់សមុទ្រនៃក្រុង OFUNATO ខេត្ត IWATE កាលពីថ្ងៃទី២៦ ខែកុម្ភៈ ឆ្នាំ២០២៥ បាននិងកំពុងបន្តរាលដាលរហូតដល់ថ្ងៃនេះ។ បើតាមការអះអាងរបស់មន្រ្តីមានសមត្ថកិច្ច គិតមកដល់ពេលនេះ មានផ្ទៃដីប្រមាណ២ ១០០ហិចតា ត្រូវបានបំផ្លិតបំផ្លាញដោយអគ្គិភ័យ ដែលក្នុងនោះ បានធ្វើឱ្យបាត់បង់ជីវិតមនុស្សម្នាក់ និងអគារចំនួន៨០ខ្នង។ ជាងនេះ ប្រជាពលរដ្ឋក្នុងតំបន់ប្រមាណ ១ ២០០នាក់ ត្រូវបានជម្លៀសទៅកាន់ជម្រកសុវត្ថិភាព។

ដោយភ្លើងបាននិងកំពុងបន្តឆេះដូច្នេះ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន បានអំពាវនាវដល់ប្រជាពលរដ្ឋខ្មែរទាំងអស់ដែលកំពុងរស់នៅ ធ្វើការ និងសិក្សានៅប្រទេសជប៉ុន  ជាពិសេសនៅតំបន់ខាងលើ មានការប្រុងប្រយ័ត្នខ្ពស់ ហើយតាមដាន និងស្តាប់តាមការណែនាំរបស់អាជ្ញាធរជប៉ុន។

ករណីមានប្រជាពលរដ្ឋខ្មែរ ដែលរងផលប៉ះពាល់ ស្ថានទូតកម្ពុជា ប្រាប់ឱ្យប្រញាប់ជូនដំណឹងមកកាន់ស្ថានទូតជាបន្ទាន់ តាមរយៈហ្វេសប៊ុកស្ថានទូត Royal Embassy of Cambodia in Japan ឬទូរសព្ទលេខ ០៨០ ៤៦៨៩ ៩៣៧៤ ៕