ជប៉ុន អញ្ជើញអ្នកនយោបាយ និងសកម្មជនវ័យក្មេងកម្ពុជា១០រូប ធ្វើទស្សនកិច្ច១សប្ដាហ៍ ស្វែងយល់ពីការបោះឆ្នោតរើសអភិបាលខេត្ត

ក្រសួងការបរទេសជប៉ុន អញ្ជើញអ្នកនយោបាយ ​និងសកម្មជនវ័យក្មេងកម្ពុជាចំនួន១០រូប ទៅកាន់ប្រទេសជប៉ុន ដើម្បីផ្លាស់ប្ដូរទស្សនៈ និងការបោះឆ្នោតជ្រើសរើសអភិបាលខេត្តChiba និងទស្សនាការអភិវឌ្ឍរបស់ក្រុមហ៊ុនឯកជន ដើម្បីលើកកម្ពស់ការអភិវឌ្ឍក្នុងតំបន់។

សេចក្ដីប្រកាសព័ត៌មាន ចេញនៅថ្ងៃទី១០ ខែមីនា ឆ្នាំ២០២៥ សរសេរដូច្នេះ៖«អ្នកនយោបាយ និងសកម្មជនវ័យក្មេងកម្ពុជាចំនួន១០រូប (២រូបមកពីគណបក្សប្រជាជនកម្ពុជា  ៧រូបមកពីគណបក្សប្រឆាំង និង ១រូបមកពីសង្គមស៊ីវិល) នឹងបំពេញទស្សនកិច្ចទៅប្រទេសជប៉ុនចាប់ពីថ្ងៃទី១២ ទៅដល់ថ្ងៃទី១៩ ខែមីនា ដែលទស្សនកិច្ចនេះជាផ្នែកនៃកម្មវិធី JENESYS 2024 ដែលជាកម្មវិធីផ្លាស់ប្តូរប្រជាជនទៅប្រជាជនដែលត្រូវបានគាំទ្រដោយក្រសួងការបរទេសជប៉ុន »។

សេចក្ដីប្រកាសព័ត៌មាន ឱ្យដឹងទៀតថា អ្នកនយោបាយ និងសកម្មជនវ័យក្មេងទាំង១០រូបនឹងអញ្ជើញទៅទស្សនាសភាជប៉ុន និងមានការផ្លាស់ប្ដូរទស្សនៈជាមួយសមាជិកសភាតំណាងរាស្ត្រជប៉ុន នៃសម្ព័ន្ធមិត្តភាពសភាជប៉ុន-កម្ពុជា ។ ពួកគេនឹងទៅទស្សនាទីក្រុង Ichihara នៃខេត្ត Chiba ដើម្បីទស្សនា ការបោះឆ្នោតជ្រើសរើសអភិបាលខេត្តChiba ក៏ដូចជាកិច្ចខិតខំប្រឹងប្រែងរបស់ក្រុមហ៊ុននានានៅក្នុងខេត្ត Chiba ដើម្បីលើកកម្ពស់ការអភិវឌ្ឍក្នុងតំបន់។

សេចក្ដីប្រកាសព័ត៌មាន ឱ្យដឹងបន្ថែមថា កម្មវិធីអញ្ជើញអ្នកនយោបាយ និងសកម្មជនវ័យក្មេងកម្ពុជាទៅទស្សនកិច្ចនៅជប៉ុន ចាប់ផ្ដើមធ្វើឡើងតាំងពីឆ្នាំ២០១៨ ក្នុងគោលបំណងជួយគាំទ្រការអភិវឌ្ឍតាមបែបប្រជាធិបតេយ្យរបស់ប្រទេសកម្ពុជាតាមរយៈការលើកម្ពស់កិច្ចសន្ទនារវាងគណបក្សកាន់អំណាច និងគណបក្សប្រឆាំង និងភាគីផ្សងៗ។ ដំណើរទស្សនកិច្ចនេះ នឹងជាដំណើរទស្សនកិច្ចលើកទី៧៕