ព័ត៌មានជាតិ

ផ្លូវក្រួសក្រហមជាង ៨ គីឡូម៉ែត្រនៅឃុំគោលាប់នឹងប្រែក្លាយជាផ្លូវកៅស៊ូ ខណៈសម្រេចការសាងសង់បានជាង ២៨%

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

ផ្លូវលំក្រាលក្រួសក្រហម ១ខ្សែ មានប្រវែង ៨១០០ ម៉ែត្រ ស្ថិតនៅក្នុងឃុំគោលាប់ ស្រុកចិត្របុរី ខេត្តក្រចេះ ក្រោមគម្រោងកែលម្អបណ្តាញតភ្ជាប់ផ្លូវថ្នល់កម្ពុជា “RCIP” សម្រេចការសាងសង់បានប្រមាណជា ២៨,២២ ភាគរយ។ នេះបើតាមការបញ្ជាក់ពី លោក កៅ វិបុល មន្រ្តីបច្ចេកទេសនៃមន្ទីរអភិវឌ្ឍន៍ជនបទខេត្តក្រចេះ។

គម្រោងសាងសង់ផ្លូវប្រវែង ៨ ១០០ ម៉ែត្រខាងលើនេះ ក្នុងនោះមានផ្លូវបេតុងប្រវែង ៥០ ម៉ែត្រ លូប្រអប់ ១ កន្លែង លូមូលមានចំនួន ១១ កន្លែង និងលូរំដោះទឹកតាមបណ្តោយផ្លូវមានប្រវែង ៣០៩ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កៅ វិបុល បានបញ្ជាក់ថា ផ្លូវមួយខ្សែខាងលើ ក្រុមហ៊ុនទទួលការសាង់សង់ក្នុងកំឡុងខែកុម្ភៈ ឆ្នាំ ២០២៥ និងកំពុងកែលម្អស្រទាប់គ្រឹះសម្រេចបានប្រមាណជា ៧៧ ភាគរយ ហេីយបើគ្មានអ្វីប្រែប្រួលគ្រោងនឹងបញ្ចប់ការសាងសង់នៅក្នុងឆ្នាំ ២០២៥ ខាងមុខនេះ។

បើតាមលោក កៅ វិបុល មានប្រជាពលរដ្ឋប្រមាណជា ៩០០ គ្រួសារ នឹងទទួលបានប្រយោជន៍ដោយផ្ទាល់លើការប្រើប្រាស់ផ្លូវមួយខ្សែនេះ រួមទាំងពលរដ្ឋ ២០០ គ្រួសារបន្ថែមទៀតនឹងទទួលបានផលប្រយោជន៍ដោយប្រយោល ដែលនឹងជួយសម្រួលដល់ការធ្វើដំណើរនិងដឹកជញ្ជូនកសិផលរបស់កសិករទៅទីផ្សារបានឆាប់រហ័ស។

សម្រាប់ខេត្តក្រចេះ តាមរយៈក្រសួងអភិវឌ្ឍន៍ជនបទមានខ្សែផ្លូវចំនួន ១៤ខ្សែ ស្មើនឹងប្រវែងសរុប ១៣៤.៤ គីឡូម៉ែត្រ ត្រូវបានជ្រើសរើសសម្រាប់គម្រោងកែលម្អ និងលើកកម្ពស់កម្រិតគុណភាព ដែលឆ្លងកាត់ភូមិចំនួន ៣៥ ភូមិ ស្ថិតនៅក្នុងឃុំចំនួន ១០ ឃុំ សង្កាត់ចំនួន ១ និងស្រុកចំនួន ៣ និងក្រុងចំនួន ១៕

អត្ថបទ៖ ប្រុញ វិធិន