កុមារីអាយុជាង ៤ឆ្នាំ មានជំងឺអុតស្វាយក្លាយដំបៅធ្ងន់ធ្ងរ ត្រូវបានមន្ទីរពេទ្យគន្ធបុប្ផា សង្គ្រោះបានដោយជោគជ័យ

ក្រុមគ្រូពេទ្យសង្រ្គោះបន្ទាន់នៅមន្ទីរពេទ្យគន្ធបុប្ផា បានជួយសង្រ្គោះជីវិតកុមារីម្នាក់ អាយុជាង ៤ឆ្នាំ មកពីខេត្តត្បូងឃ្មុំ ដែលមានជំងឺអុតស្វាយធ្ងន់ធ្ងរ ឱ្យជាសះស្បើយឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីទំព័រហ្វេសប៊ុក Dr. Beat Richner នៅថ្ងៃទី២៤ ខែមិថុនា នេះ បានឱ្យដឹងថា កុមារីអាយុ ៤ឆ្នាំកន្លះ មកពីខេត្តត្បូងឃ្មុំ មានជំងឺអុតស្វាយ ក្លាយដំបៅខ្លោចស្បែកពេញខ្លួនយ៉ាងធ្ងន់ធ្ងរបំផុត និងមានមេរោគបង្កក្នុងឈាមបណ្តាលឱ្យរលាកសួតយ៉ាងធ្ងន់ធ្ងរ ព្រមទាំងរលាកខួរក្បាលទៀតផង ត្រូវបានក្រុមគ្រូពេទ្យសង្រ្គោះបន្ទាន់នៅមន្ទីរពេទ្យគន្ធបុប្ផា ថែទាំព្យាបាលសង្គ្រោះអស់រយៈពេល ៣៣ថ្ងៃ ហើយថ្ងៃនេះបានជាសះស្បើយ និងបានត្រឡប់ទៅផ្ទះវិញ។

មន្ទីរពេទ្យគន្ធបុប្ផា ត្រូវបានទទួលស្គាល់ជាមន្ទីរពេទ្យគំរូមួយ ដែលបានចូលរួមយ៉ាងសកម្ម ក្នុងការកាត់បន្ថយអត្រាមរណភាពមាតា កុមារ និងទារកនៅកម្ពុជា ហើយរាល់ការព្យាបាលទាំងអស់ គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង៕