ក្រុមប្រឹក្សាជាតិភាសាខ្មែរ នឹងរៀបចំសិក្ខាសាលាស្តីពីពាក្យកម្ចីក្នុងភាសាចំនួន៤ ដើម្បីរកពាក្យកម្ចីថ្មីៗក្នុងភាសាខ្មែរ

នៅថ្ងៃព្រឹកថ្ងៃទី១៧ ខែកក្កដា ឆ្នាំ២០២៥ ខាងមុខ ក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា នឹងរៀបចំសិក្ខាសាលាស្តីពី «ពាក្យកម្ចីក្នុងភាសាថៃ ភាសាឡាវ ភាសាចិន និងភាសាជប៉ុន» ដោយមានការសម្របសម្រួលពី បណ្ឌិត ហ៊ាន សុខុម ប្រធានក្រុមប្រឹក្សាជាតិភាសាខ្មែរ និងមានការចូលរួមពីវាគ្មិនជំនាញមកពីសាកលវិទ្យាល័យភូមិន្ទភ្នំពេញ និងរាជបណ្ឌិត្យសភាកម្ពុជា ផងដែរ។  

បើតាមក្រុមប្រឹក្សាជាតិភាសាខ្មែរ បញ្ជាក់ថា សិក្ខាសាលានេះរៀបចំឡើងក្នុងគោលបំណងកំណត់ចំនួនសូរសព្ទ និងចំនួនតួអក្សរក្នុងភាសាខ្មែរដើម្បីស្វែងរកឯកភាពអក្ខរាវិរុទ្ធនៃពាក្យកម្ចីសូរសព្ទថ្មីៗ។ កម្មវិធីសិក្ខាសាលាខាងលើ រៀបចំចាប់ពីម៉ោង៨៖១៥នាទីព្រឹក ដល់ម៉ោង១១៖៣០នាទីព្រឹក នៅសាលទន្លេសាប អគារខេមរវិទូនៃរាជបណ្ឌិត្យសភាកម្ពុជា។

សម្រាប់វាគ្មិនជំនាញនឹងចែករំលែកបទពិសោធនៃការអនុវត្តកម្ចីពាក្យក្នុងភាសាថៃ ភាសាឡាវ ភាសាចិន និងភាសាជប៉ុន។ ក្នុងកម្មវិធីនេះ លោកបណ្ឌិត ហែម សម្ផស្ស ប្រធានដេប៉ាតឺម៉ង់ភាសាថៃ នៃសាកលវិទ្យាល័យភូមិន្ទភ្នំពេញ នឹងធ្វើបទបង្ហាញពី «ពាក្យកម្ចីក្នុងភាសាថៃ»។ បណ្ឌិត ចាន់ វណ្ឌី អនុប្រធានលេខាធិការដ្ឋានបណ្ឌិតសភាចារ្យ នៃរាជបណ្ឌិត្យសភាកម្ពុជា នឹងធ្វើបទបង្ហាញ «ពាក្យកម្ចីក្នុងភាសាឡាវ»។ ចំណែក «ពាក្យកម្ចីក្នុងភាសាចិន» ធ្វើបទបង្ហាញដោយ លោកស្រី សាន សូត្ររតនា សាស្ត្រាចារ្យដេប៉ាតឺម៉ង់ភាសាចិន នៃសាកលវិទ្យាល័យភូមិន្ទភ្នំពេញ។ រីឯ លោកស្រី ឡុច ល័ក្ខស្មី នាយិកាវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ នឹងធ្វើបទបង្ហាញ «ពាក្យកម្ចីក្នុង ភាសាជប៉ុន»។

បន្ទាប់ពីការផ្លាស់ប្តូរបទពិសោធទាក់ទងនឹងកម្ចីពាក្យ វាគ្មិន និងអ្នកចូលរួមទាំងអស់នឹងពិភាក្សាសំណួរ «តើភាសាខ្មែរគួរយករបៀបកម្ចីសូរសព្ទមួយណា ដើម្បីឱ្យជឿនលឿន? មូលហេតុអ្វី? តើមានគុណសម្បត្តិនិងគុណវិបត្តិអ្វីខ្លះ?» ក្រោមការសម្របសម្រួលរបស់ បណ្ឌិត ហ៊ាន សុខុម។  

សូមជម្រាបថា សិក្ខាសាលានេះ ប្រព្រឹត្តទៅដោយឱ្យសាធារណជនចូលរួមដោយសេរី។ សម្រាប់អ្នកដែលមានចំណាប់អារម្មណ៍ចូលរួម និងចង់ទទួលបានចំណេះដឹងថ្មីៗពីពាក្យកម្ចីក្នុងភាសាបរទេស អាចចុះឈ្មោះតាមរយៈតំណភ្ជាប់ខាងក្រោម៖ https://docs.google.com/forms/d/193qpw58sOacpKymMknN9azOLbQ_y11y-bh91Xk9VAGM/edit ៕