ក្រោយថៃប្រើគ្រាប់បែកចង្កោម អាជ្ញាធរមីនស្នើឱ្យពលរដ្ឋភៀសសឹកប្រុងប្រយ័ត្នខ្ពស់ និងដាក់​ចេញវិធានការអប់រំបន្ទាន់

អំឡុងពេលនៃសកម្មភាពឈ្លានពានរបស់យោធាថៃមកលើកម្ពុជា ដែលបានចាប់ផ្តើមពីថ្ងៃទី២៤ ខែកក្កដា ឆ្នាំ២០២៥ រហូតមកទល់ពេលនេះ យោធាថៃបានប្រើប្រាស់សព្វាវុធធុនធ្ងន់គ្រប់ប្រភេទបំពានធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងគោលការណ៍ជាមូលដ្ឋាននៃច្បាប់អន្តរជាតិ ដូចជា យន្តហោះទម្លាក់គ្រាប់បែកគ្រាប់បែកចង្កោម ផ្សែងពុល និងយុទ្ធភណ្ឌមិនទាន់ផ្ទុះផ្សេងៗដែលបានបង្កគ្រោះថ្នាក់យ៉ាងធ្ងន់ធ្ងរ និងប៉ះពាល់ជាអវិជ្ជមានដល់ប្រជាពលរដ្ឋ។ លើសពីនេះ បំផ្លាញបេតិកភណ្ឌពិភពលោក ហេដ្ឋារចនាសម្ព័ន្ធសាធារណៈ វត្តអារាម ប្រាសាទបុរាណ សាលារៀន មណ្ឌលសុខភាព លំនៅដ្ឋាន និងប៉ះពាល់សុខភាពធ្ងន់ធ្ងរ។ ផលវិបាកនៃការប្រើប្រាស់សព្វាវុធទាំងនោះ បានបង្ខំឱ្យប្រជាពលរដ្ឋរាប់ម៉ឺនគ្រួសារ ជម្លៀសទៅកាន់ទីតាំងសុវត្ថិភាពជាច្រើនកន្លែងតាមបណ្តាខេត្តនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីណែនាំរបស់ទេសរដ្ឋមន្រ្តីទទួលបន្ទុកបេសកកម្មពិសេស លោក លី ធុជ អនុប្រធានទី១ អាជ្ញាធរមីន ចុះថ្ងៃទី ២៩ ខែកក្កដា ឆ្នាំ ២០២៥ បញ្ជាក់ថា ដើម្បីបង្ការនិងទប់ស្កាត់គ្រោះថ្នាក់ដែលអាចកើតមានជាយថាហេតុដល់ប្រជាពលរដ្ឋភៀសសឹក អាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(អាជ្ញាធរមីន) សូមស្នើដល់ភាគីពាក់ព័ន្ធសកម្មភាពមីនទាំងអស់ រួមមាន គណៈកម្មាធិការសកម្មភាពមីនខេត្ត ក្រុមការងាររៀបចំផែនការសកម្មភាពមីន ខេត្ត ដៃគូអភិវឌ្ឍន៍ និងប្រតិបត្តិករសកម្មភាពមីន ផ្តល់កិច្ចសហការ និងចូលរួមអនុវត្តនូវវិធានការមួយចំនួន។

វិធានការទាំងនោះរួមមាន ពិនិត្យលទ្ធភាពដាក់បញ្ចូលការងារអប់រំផ្សព្វផ្សាយគ្រោះថ្នាក់ដោយសារគ្រាប់បែកចង្កោមនិងយុទ្ធភណ្ឌ គ្រឿងផ្ទុះ និងការបោសសម្អាត នៅក្នុងកម្មវិធីរបស់ស្ថាប័ន អង្គភាពនានានៅតាមទីតាំងសុវត្ថិភាព និងទីតាំងរងផលប៉ះពាល់ដោយសារគ្រាប់បែកចង្កោម និងយុទ្ធភណ្ឌគ្រឿងផ្ទុះ។ ដឹកនាំការរៀបចំកម្មវិធីអប់រំផ្សព្វផ្សាយការយល់​ដឹងដោយសារគ្រាប់បែកចង្កោម និងយុទ្ធភណ្ឌគ្រឿងផ្ទុះ ដល់ប្រជាពលរដ្ឋដែលកំពុងស្នាក់នៅនៅតាមទីតាំងសុវត្ថិភាព ក្រោមកិច្ចសហការជាមួយអាជ្ញាធរ ដែនដីគ្រប់លំដាប់ថ្នាក់។

អាជ្ញាធរមីន ក៏ស្នើសុំឱ្យប្រជាពលរដ្ឋ អាជ្ញាធរមូលដ្ឋាន និងអង្គភាពពាក់ព័ន្ធ ផ្តល់កិច្ចសហការនិងរាយការណ៍នូវ ទីតាំងរងផលប៉ះពាល់ដោយសារគ្រាប់បែកចង្កោមនិងយុទ្ធភណ្ឌគ្រឿងផ្ទុះដល់អាជ្ញាធរមីន ឬប្រតិបត្តិករសកម្មភាពមីន ដើម្បីពិនិត្យវាយតម្លៃ និងធ្វើការបោសសម្អាតជាមុន ដូចជា លំនៅដ្ឋាន សាលារៀន មណ្ឌលសុខភាព វត្តអារាម ប្រាសាទ​បុរាណ និងដឹកសិកម្ម ជាដើម មុននឹងការវិលត្រលប់ របស់ប្រជាពលរដ្ឋភៀសសឹក ដើម្បីធានាសុវត្ថិភាពជូនពួកគាត់សម្រាប់ការស្នាក់នៅ ការបំពេញ សកម្មភាពការងារប្រចាំថ្ងៃ និងការបង្កបង្កើនផល៕