ព័ត៌មានជាតិ

សាកលវិទ្យាល័យ និងសាលារៀនធំៗ ផ្តល់អាហារូបករណ៍ ១០០% ដល់កូនៗ យុទ្ធជនពលីជីវិតក្នុងសមរភូមិ

បានផុស

៩ ខែ មុន

នៅ

ថ្ងៃសុក្រ ១ សីហា ២០២៥

ដោយ

សាកលវិទ្យាល័យ និងសាលារៀនធំៗ មួយចំនួន បានផ្តល់អាហារូបករណ៍ ១០០% ដល់កូនៗ យុទ្ធជនពលីជីវិតក្នុងសមរភូមិ ដើម្បីជួយសម្រាលបន្ទុកហិរញ្ញវត្ថុក្នុងគ្រួសារយុទ្ធជនដែលបានពលីជីវិតដើម្បីបុព្វហេតុការពារជាតិ។

លោក តែ ឡូរិន ប្រធានក្រុមប្រឹក្សាភិបាលសាកលវិទ្យាល័យវេស្ទើន បានលើកឡើងថា សាកលវិទ្យាល័យ នឹងផ្ដល់ជូនអាហារូបករណ៍ ១០០% រយៈពេល ២ និង ៤ ឆ្នាំ រហូតដល់ចប់កម្មវិធីសិក្សាទាំងថ្នាក់បរិញ្ញាបត្ររង និងថ្នាក់បរិញ្ញាបត្រ គ្រប់ជំនាញទាំងអស់ ជូនដល់កូនៗ របស់យុទ្ធជនពលីជីវិតដើម្បីបុព្វហេតុការពារជាតិ។

លោកបានបន្តថា ការផ្តល់អាហារូបករណ៍ដល់ក្រុមគ្រួសារយុទ្ធជនពលីជីវិតក្នុងបុព្វហេតុការពារជាតិនេះគឺដើម្បីចូលរួមចំណែកជាមួយរាជរដ្ឋាភិបាលកម្ពុជា និងដើម្បីសម្រាលបន្ទុកហិរញ្ញវត្ថុក្នុងគ្រួសារយុទ្ធជនដែលបានពលីជីវិតក្នុងបុព្វហេតុការពារជាតិនាពេលកន្លងមកនេះ។

សាកលវិទ្យាល័យបច្ចេកវិទ្យា និងសហគ្រិនភាព បានផ្តល់អាហារូបករណ៍ ១០០% សម្រាប់ថ្នាក់បរិញ្ញាបត្រគ្រប់ជំនាញចំនួន ៥០ កន្លែង ជូនដល់បុត្រធីតា នៃគ្រួសារវីរយោធិន ក្នុងបុព្វហេតុការពារជូនជាតិមាតុភូមិកម្ពុជា។

ក្រៅពីនេះ សាកលវិទ្យាល័យភ្នំពេញអន្តរជាតិ ក៏បានផ្តល់អាហារូបករណ៍ ១០០% ជូនកូនវីរកងទ័ពដែលបានពលីជីវិតក្នុងបុព្វហេតុការពារទឹកដីកម្ពុជា។ លើសពីនេះសាកលវិទ្យាល័យ នឹងផ្តល់អាហារូបករណ៍ដល់និស្សិតកម្ពុជាបោះបង់ការសិក្សាពីប្រទេសថៃដែលបានត្រលប់មកប្រទេសកម្ពុជាវិញផងដែរ ខណៈគិតត្រឹមថ្ងៃទី ២៩ កក្កដា ឆ្នាំ ២០២៥ មាននិស្សិតកម្ពុជាចំនួន ៤១០ នាក់ បានចាកចេញពីប្រទេសថៃមកកម្ពុជាវិញ។

ចំណែក សម្ដេចអគ្គមហាសេនាបតីតេជោ ហ៊ុន សែន បានផ្តល់អាហារូបករណ៍ដល់និស្សិតខ្មែរមកពីប្រទេសថៃចំនួន ១៧២ នាក់ ដើម្បីចូលរៀននៅកម្ពុជាវិញ។

រីឯ សាលា ASEAN INTERNATIONAL SCHOOL បានផ្តល់អាហារូបករណ៍ ១០០% ដល់ចប់ថ្នាក់ទី ១២ និងសាលារៀនសុវណ្ណភូមិ បានផ្តល់អាហារូបករណ៍ ១០០% ដល់ចប់ថ្នាក់ទី ១២ ទាំងភាសាខ្មែរ និងអង់គ្លេស ជូនកូនវីរកងទ័ពដែលបានពលីជីវិតក្នុងបុព្វហេតុការពារទឹកដីកម្ពុជាផងដែរ។

សាកលវិទ្យាល័យ និងសាលារៀនទាំងនោះ ជឿជាក់ថា តាមរយៈការផ្តល់អាហារូបករណ៍ ១០០% ជូនកូនវីរកងទ័ពដែលបានពលីជីវិតក្នុងបុព្វហេតុការពារទឹកដីកម្ពុជា នឹងរួមចំណែកជួយសម្រាលបន្ទុកផ្នែកអប់រំសម្រាប់អនាគតដ៏ភ្លឺស្វាង នៃបុត្រធីតារបស់គ្រួសារវីរយោធិន៕

អត្ថបទ ៖ សំអឿន