ព័ត៌មានជាតិ

ជប៉ុនបដិសេធព័ត៌មានដែលថាមានការផ្គត់ផ្គង់ Drone ទៅឱ្យថៃ

បានផុស

១២ ខែ មុន

នៅ

ថ្ងៃពុធ ៦ សីហា ២០២៥

ដោយ

ស្ថានទូតជប៉ុនបានបដិសេធទៅលើពាក្យចចាមអារ៉ាមមួយដែលថាប្រទេសនេះបានផ្ដល់ Drone ចម្បាំងទៅប្រទេសថៃ ដោយបានចាត់ទុកការផ្សព្វផ្សាយទាំងនោះថាជាព័ត៌មានមិនពិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីថ្លែងការណ៍នៅព្រឹកថ្ងៃទី៦ ខែសីហា ឆ្នាំ២០២៥នេះ ស្ថានទូតជប៉ុនប្រចាំកម្ពុជាបានបញ្ជាក់ថា រដ្ឋាភិបាលជប៉ុន ពុំដែលមានគម្រោងផ្តល់គ្រឿងយន្តបែបនេះដល់ប្រទេសថៃ ហើយក៏មិនធ្លាប់បានទទួលសំណើបែបនេះពីប្រទេសថៃដែរ។

ក្នុងសេចក្ដីថ្លែងការណ៍នោះសរសេរថា៖ «ជំនួយរបស់ប្រទេសជប៉ុនត្រូវបានកំណត់យ៉ាងតឹងរ៉ឹងចំពោះផ្នែកដែលមិនពាក់ព័ន្ធដោយផ្ទាល់ទៅនឹងជម្លោះអន្តរជាតិ»។

ស្ថានទូតក៏បានអះអាងសារជាថ្មីនូវការប្តេជ្ញាចិត្តរបស់ប្រទេសជប៉ុនចំពោះសន្តិភាពក្នុងតំបន់ ជាពិសេសកិច្ចព្រមព្រៀងឈប់បាញ់ដែលសម្រេចបានរវាង កម្ពុជានិងថៃ ដែលបានចូលជាធរមាននៅថ្ងៃទី២៨ ខែកក្កដា ឆ្នាំ ២០២៥ និងសង្ឃឹមថាប្រជាជនកម្ពុជានឹងអាចវិលទៅរកជីវភាពប្រចាំថ្ងៃដោយសុខសាន្តឱ្យបានឆាប់។

ការចេញមកបញ្ជាក់របស់ជប៉ុននៅពេលនេះក៏ស្របគ្នានឹងការបញ្ជាក់របស់ស្ថានទូតចិននៅទីក្រុងបាំងកកផងដែរ ដោយបានច្រានចោលព័ត៌មានដែលថាចិនបានផ្ដល់ Drone ឱ្យកម្ពុជា។ ស្ថានទូតចិនប្រចាំប្រទេសថៃបានសរសេរថា ប្រទេសចិនមិនស្វែងរកប្រយោជន៍អាត្មានិយមលើបញ្ហាជម្លោះប្រដាប់អាវុធកម្ពុជា-ថៃនោះទេ ដោយគាំទ្រក្នុងការសម្របសម្រួលដំណោះស្រាយតាមរយៈយន្តការអាស៊ាន និងត្រៀមខ្លួនដើម្បីបន្តទំនាក់ទំនងជាមួយប្រទេសកម្ពុជា ថៃ និងម៉ាឡេស៊ី ដើម្បីដើរតួរស្ថាបនាសម្រាប់ពង្រឹងបទឈប់បាញ់ និងការស្ដារសន្ដិភាព និងស្ថិរភាពឡើងវិញផងដែរ៕

អត្ដបទដោយ ហ៊ុន សិរីវឌ្ឍន៍