ព័ត៌មានជាតិ

កម្ពុជាអាមេរិករម្លឹកខួប៧៥ឆ្នាំនៃទំនាក់ទំនងជាមួយផ្លូវជាតិលេខ៤

បានផុស

១១ ខែ មុន

នៅ

ថ្ងៃសៅរ៍ ៣០ សីហា ២០២៥

ដោយ

អភិបាលខេត្តព្រះសីហនុលោក ម៉ាង ស៊ីណេត និងភារៈធារីស្ដីទីនៃស្ថានទូតអាមេរិកប្រចាំកម្ពុជាលោកស្រី ប្រ៊ីដហ្គេត អិលវ៉កឃើ បានអញ្ជើញលើកស្លាកអបអរសាទរខួប៧៥ឆ្នាំនៃទំនាក់ទំនងមិត្តភាពកម្ពុជាអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លាកថ្មីនេះត្រូវបានលើកកាលពីថ្ងៃទី២៨ ខែសីហាកន្លងទៅដោយសរសេរថា អបអរសាទរខួប៧៥ឆ្នាំនៃមិត្តភាពកម្ពុជា-អាមេរិក សហរដ្ឋអាមេរិកមានមោទនភាពដែលបានឧបត្ថម្ភការសាងសង់ផ្លូវមិត្តភាពខ្មែរ-អាមេរិក (ផ្លូវជាតិលេខ៤) នៅទស្សវត្សរ៍ ១៩៥០ ដើម្បីជានិមិត្តរូបនៃមិត្តភាព និងភាពជាដៃគូរចីរកាល។

ផ្លូវជាតិលេខ៤គឺជាផ្លូវជាតិសំខាន់មួយរបស់កម្ពុជាដែលភ្ជាប់ពីរាជធានីភ្នំពេញទៅកាន់កំពង់ផែខេត្តព្រះសីហនុ ផ្លូវនេះត្រូវបានស្ថាបនាស្របពេលនឹងការសាងសង់កំពង់ផែខេត្តព្រះសិហនុ ដោយចំណាយពេល៥ឆ្នាំដើម្បីសាងសង់(ឆ្នាំ១៩៥៥-ឆ្នាំ១៩៦០) ក្រោមមូលនិធិរបស់សហរដ្ឋអាមេរិក។

សហរដ្ឋអាមេរិកបានបង្កើតទំនាក់ទំនងការទូតដោយផ្ទាល់របស់ខ្លួនជាលើកតំបូងជាមួយប្រទេសកម្ពុជានៅថ្ងៃទី២៩ ខែមិថុនា ឆ្នាំ១៩៥០ ដោយបានតែងតាំងលោក Donald R. Heath អោយធ្វើជាតំណាងវិសាមញ្ញ និងពេញសមត្ថភាព។ លោក Heath បានថ្វាយសារតាំងទៅព្រះករុណាសម្តេចព្រះបាទនរោត្តមសីហនុ នៅថ្ងៃទី១១ ខែកក្កដា ឆ្នាំ១៩៥០។ ការិយាល័យតំណាងសហរដ្ឋអាមេរិក បានបើកនៅភ្នំពេញ នៅថ្ងៃទី១៤ ខែវិច្ឆិកាឆ្នាំដដែល ដោយយកសណ្ឋាគារឡឺរ៉ូយ៉ាល់ជាកន្លែងធ្វើការតំបូងរបស់ស្ថានទូត។

ក្នុងឱកាសនៃការរម្លឹកខួប៧៥ឆ្នាំនៃទំនាក់ទំនងនៅឆ្នាំ២០២៥ ស្ថានទូតអាមេរិកមានកម្មវិធីជាច្រើនដើម្បីរម្លឹកខួបនេះ ហើយនៅខែសីហានេះស្ថានទូតមានកម្មវិធីមួយដែលហៅថាសប្ដាហ៍ស្ថានទូតនៅខេត្តព្រះសីហនុដែលរម្លឹកការចូលរួមរបស់អាមេរិកលើតម្លៃរួម និងចក្ខុវិស័យសម្រាប់អនាគត ជំរុញកាលានុវត្តភាព សេដ្ឋកិច្ច និងការលើកកម្ពស់សុខភាព និងសន្ដិសុខ ដល់ការអភិរក្សបេតិកភណ្ឌ វប្បធម៌ និងការផ្ដល់សិទ្ធិអំណាចដល់យុវជនកម្ពុជា៕