ផ្ទុះអាវុធ២គ្រាប់ ក្នុងផ្ទះវិឡាមួយកន្លែង បង្កការភ្ញាក់ផ្អើលទាំងកណ្តាលអធ្រាត្រ

ស្នូរផ្ទុះអាវុធចំនួន២គ្រាប់បានបន្លឺឡើងនៅក្នុងវិឡាដ៏ស្កឹមស្កៃមួយកន្លែង ស្ថិតតាមបណ្ដោយផ្លូវបេតុងក្នុងភូមិដំណាក់ សង្កាត់គោកឃ្លាង ខណ្ឌសែនសុខ បង្កអោយមានការភ្ញាក់ផ្អើលឡើងកាលពីវេលាម៉ោង១២ និង៤០នាទីរំលងអាធ្រាត្រ ឈានចូលថ្ងៃទី០១ ខែមីនា ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីកន្លែងកើតហេតុបានឲ្យដឹងថា មុនកើតហេតុគេឮសូរសំឡេងឈ្លោះប្រកែកគ្នាក្នុងផ្ទះកើតហេតុខាងលើ ដោយមិនដឹងថាមានរឿងអ្វីអោយប្រាកដឡើយ លុះមកដល់ម៉ោងកើតហេតុ ក៏ស្រាប់តែលឺស្នូរសំឡេងផ្ទុះអាវុធ២គ្រាប់បង្កឲ្យមានការភ្ញាក់ផ្អើលដល់ប្រជាពលរដ្ឋរស់នៅក្បែរខាង រាយការណ៍ទៅសមត្ថកិច្ចមូលដ្ឋានចុះអន្តរាគមន៍ និងសួរនាំនៅកន្លែងកើតហេតុភ្លាមៗផងដែរ ។

ក្រោយកើតហេតុគេឃើញមានរថយន្តឡង់គ្រឺស័រពណ៌ខ្មៅមួយគ្រឿងពាក់ស្លាកលេខ កម្ពុជា-V-8989-V បើកចេញពីផ្ទះកន្លែងកើតហេតុមកចូលក្នុងបុរីពិភពថ្មីក្បែរបុរីសូនី ក្នុងសង្កាត់ស្ទឹងមានជ័យទី៣ ខណ្ឌមានជ័យ ដោយគេដាក់ការសង្ស័យទៅលើរថយន្តខាងលើនោះ។ ទោះជាយ៉ាងណានៅយប់ថ្ងៃខែដដែល កម្លាំងសមត្ថកិច្ចដែលចុះអន្តរាគមន៍បានឈរនៅខាងក្រៅប៉ុណ្ណោះ​ដោយមិនទាន់អាចចូល​ទៅ​ក្នុងបានឡើយ ដោយរង់ចាំគោលការណ៍ពីថ្នាក់លើ ។

ពាក់ព័ន្ធនឹងករណីផ្ទុះអាវុធចំនួន២គ្រាប់ដដែលនេះ សមត្ថកិច្ចកំពុងធ្វើការស្រាវជ្រាវបន្តដើម្បីកំណត់បានថា ជាករណីអ្វីអោយប្រាកដដែលបណ្ដាលអោយឈានដល់មានការផ្ទុះអាវុធបែបនេះ៕

អត្ថបទ៖ លីហេង