ក្រសួងស្នើ​ចាត់វិធានការ​ច្បាប់​ជនក្លែង​បន្លំ​ជាមន្ត្រី​អនុវត្តច្បាប់​រៃអង្គាស​ប្រាក់​តាមរោងចក្រ​

ក្រសួងសង្គមកិច្ច អតីតយុទ្ធជន និងយុវនីតិសម្បទា បានស្នើឱ្យសមត្ថកិច្ចចាត់វិធានការ​តាមផ្លូវច្បាប់​ចំ​ពោះជនក្លែងបន្លំជាមន្ត្រីអនុវត្ត ច្បាប់ស្ដីពីកិច្ចការពារ និងលើកកម្ពស់សិទ្ធិជនពិការតាមរោងចក្រ សហគ្រាស ដើម្បីរៃអង្គាសថវិកាតាមរោងចក្រ សហគ្រាសធ្វើជាប្រយោជន៍ផ្ទាល់ខ្លួន។

លោក យៀប ម៉ាលីណូ ប្រធាននាយកដ្ឋានសុខុមាល​ភាព​ជនពិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា បានជម្រាបជូនក្រុមហ៊ុន រោងចក្រ សហគ្រាសថា កន្លងមកនេះមានជនខិលខូច មួយចំនួនជាពិសេស ឈ្មោះ ហ៊ុន សារ៉ាក់ និងបក្សពួក បានក្លែងបន្លំជាមន្ត្រីក្រសួងសង្គមកិច្ច និងយកសេចក្តីជូនដំណឹងរបស់ក្រសួង​ស្តីពីការអនុវត្តកាតព្វ​កិច្ច​ច្បាប់ស្តីពីកិច្ចការពារ និងលើកកម្ពស់សិទ្ធិជនពិការសម្រាប់វិស័យឯកជន ទៅទារលុយ​ពីរោងចក្រ​ និងបោកប្រាស់ យកលុយជនមានពិការភាព ដោយសន្យាថា នឹងទទួលបានអត្ថ​ប្រយោជន៍​ពីរាជរដ្ឋាភិបាល ដូចជា ប្រាក់សោធនិវត្ដន៍ ប្រាក់ឧបត្ថម្ភរបបនយោបាយ​ចំពោះជន​ពិការក្រីក្រតាមសហគមន៍។

លើសពីនេះទៅទៀត កន្លងមកក្រុមនេះ ធ្លាប់បានចុះហត្ថលេខា និងប្រថាប់ត្រា ក្លែងបន្លំជាប្រធាន​ការិយាល័យ​ក្រុង/ស្រុកខណ្ឌនៃមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីខេត្ត ក្នុងរូបភាពជាក្រុមកីឡាករទៅប្រកួតប្រណាំងរទេះ និង កីឡាបាល់ទះ ដើម្បីប្រមែលប្រមូលថវិកាសប្បុរសធម៌ ដែលផ្ទុយពីការពិត។

ក្នុងន័យនេះ នាយកដ្ឋានសុខុមាលភាពជនពិការសុំធ្វើការបដិសេធ ពោះសកម្មភាព និងលិខិតសុំជំនួយទាំងឡាយដែលក្រុមខិលខូចខាងលើ បានប្រព្រឹត្តនិងសូមឲ្យសមត្ថកិច្ចពាក់ព័ន្ធចាត់វិធានការតាមផ្លូវច្បាប់។

ជាមួយគ្នានេះដែរ​នាយកដ្ឋានសុខុមាលភាពជនពិការបានណែនាំថា ដើម្បីជៀស​​វាងការចាញ់បោកបញ្ឆោតសូមឱ្យក្រុមហ៊ុន រោងចក្រ សហគ្រាស មុនពេលមន្ត្រីចុះ​ត្រួតពិនិត្យឬទំនាក់ទំនងការងារត្រូវមានលិខិតផ្លូវការជម្រាបជូននាយកក្រុមហ៊ុន រោងចក្រ សហ​គ្រាស ជាមុនសិន។

គ្រប់មន្ត្រីទាំងអស់ ត្រូវមានកាតសម្គាល់មន្រ្តីរាជការនិងមានលិខិតឧទ្ទេសនាម ដែលចេញដោយក្រសួងឬមន្ទីរសង្គមកិច្ច អតីតយុទ្ធជន និងយុវនីតិសម្បទា។ ឯកសារចុះបញ្ជីកាដែលបានដាក់ជូនក្រសួងឬមន្ទីរសង្គមកិច្ច អតីតយុទ្ធជន និងយុវនីតិសម្ប​ទា​ហើយរាល់ការចុះត្រួតពិនិត្យ និងបញ្ជីកាដោយឥតគិតថ្លៃ។

នាយកដ្ឋានសុខុមាលភាពជនពិការបានណែនាំទៀតថា ក្នុងករណីដែលមានករណីសង្ស័យបញ្ជាក់ថាទោសដែលបញ្ញាត្តិ ក្នុងច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ត្រង់មាត្រា៥៣ អំពើទាញយកប្រយោជន៍ដោយចេតនា ដោយរំលោភលើភាពល្ងង់ខ្លៅ ឬភាពទន់ខ្សោយ នៃបុគ្គលនេះ បណ្ដាលមកពីស្ថានភាពពិការភាព ដោយបង្ខំបុគ្គលនេះប្រព្រឹត្តអំពើ ឬមិនប្រព្រឹត្តអំពើដែលធ្វើ ឱ្យខូចប្រយោជន៍យ៉ាងធ្ងន់ធ្ងរ របស់បុគ្គលនេះ ត្រូវផ្តន្ទាទោស​ដាក់ពន្ធ​នាគារពី ១ ឆ្នាំ ទៅ ៣ ឆ្នាំ និងពិន័យជាប្រាក់ពី ពីរលានរៀល ទៅប្រាំមួយលានរៀល។

មាត្រា៥៦ “ត្រូវផ្តន្ទាទោសដាក់ពន្ធនាគារពី ១ ឆ្នាំ ទៅ ៣ ឆ្នាំ និងពិន័យជាប្រាក់ពី ពីរលានរៀល ទៅប្រាំមួយលានរៀល អំពើជ្រៀតជ្រែកដោយខុស ច្បាប់ ទៅក្នុងការអនុវត្តមុខងារ​សាធារណៈ​ណាមួយ ដោយបំពេញកិច្ចណាមួយ ក្នុងចំណោមកិច្ចទាំងឡាយ ដែលសម្រាប់តែអ្នកមាន​សិទ្ធិក្នុង​មុខងារនេះ”៕

អត្ថបទ៖ សំអឿន