កីឡា

ក្រុម Arkadag ត្រៀមប៉ះ Al Nassr នៅតែមិនប្រើកីឡាករបរទេស

បានផុស

៤ ខែ មុន

នៅ

ថ្ងៃសុក្រ ២ មករា ២០២៦

ដោយ

ក្រុមបាល់ទាត់របស់ប្រទេសតួកមេនីស្ថាន FK Arkadag បានឈានដល់វគ្គ ១៦ ក្រុមចុងក្រោយពានរង្វាន់ AFC Champions League Two ដោយមិនប្រើប្រាស់កីឡាករបរទេសសោះ។

ក្រុម FK Arkadag កំពុងទទួលបានជោគជ័យដោយមិនប្រើប្រាស់កីឡាករបរទេសសោះ។ ពួកគេប្រើកីឡាករតួកមេនីស្ថានសុទ្ធទាំងការប្រកួតពានរង្វាន់ក្នុងស្រុក និងពានរង្វាន់អន្តរជាតិ។ បង្កើតឡើងនៅខែមេសា ឆ្នាំ ២០២៣ ទើបមានអាយុកាលជាង ២ ឆ្នាំ ប៉ុណ្ណោះ ប៉ុន្តែកំពុងក្លាយជាក្រុមដ៏ជោគជ័យឆាប់រហ័សបំផុត។

អ្វីដែលគួរឲ្យកត់សំគាល់ ក្រុម FK Arkadag ប្រៀបដូចជាក្រុមបាល់ទាត់ជម្រើសជាតិតួកមេនីស្ថាន។ កីឡាកររបស់ពួកគេភាគច្រើនសុទ្ធតែជាប់ជម្រើសជាតិតួកមេនីស្ថាន ដូច្នេះពួកគេលេងយល់ចិត្តគ្នាណាស់ ដោយសារពួកគេលេងជាមួយគ្នាទាំងនៅក្លិប និងជម្រើសជាតិ។

បើក្រឡេកមើលបញ្ជីឈ្មោះចុងក្រោយរបស់ក្រុមជម្រើសជាតិតួកមេនីស្ថានគឺមានកីឡាកររបស់ក្រុម FK Arkadag ស្ទើរតែទាំងអស់ ហើយមានតែ ២ នាក់ប៉ុណ្ណោះដែលមិនមែនជាកីឡាកររបស់ក្លិប FK Arkadag។

ក្រុម FK Arkadag បានឈ្នះជើងឯកលីគបាល់ទាត់កំពូលតួកមេនីស្ថាន ៣ រដូវកាលជាប់គ្នាគឺ ឆ្នាំ ២០២៣ ២០២៤ និង ២០២៥។ ជាពិសេសទៀតនោះ ពួកគេបានយកឈ្នះ ក្រុមព្រះខ័នរាជស្វាយរៀង ដោយលទ្ធផល ២-១ ដើម្បីឈ្នះជើងឯកពានរង្វាន់អន្តរជាតិ AFC Challenge League រដូវកាល ២០២៤-២៥ ហើយទទួលបានកៅអី ឡើងទៅប្រកួតពានរង្វាន់កម្រិតទី២ AFC Champions League Two រដូវកាល ២០២៥-២៦។

ក្រុម Arkadag ឈ្នះជើងឯក AFC Challenge League

នៅវគ្គសន្សំពិន្ទុក្នុងពូល ក្រុម FK Arkadag បានឈ្នះ ១ ប្រកួត ស្មើ ៤ ប្រកួត និងចាញ់ ១ ប្រកួត ស្ថិតនៅចំណាត់ថ្នាក់លេខ ២ ក្នុងពូល B បានឡើងទៅកាន់វគ្គ ១៦ ក្រុមចុងក្រោយដោយត្រូវជួបក្រុម Al Nassr ដែលសំបូរទៅដោយកីឡាករលំដាប់ពិភពលោក៕