កីឡា

អបអរសាទរ U23 កម្ពុជា បើកឆាកពូល K ឈ្នះ ហុងកុង ៤-២ បាន៣ពិន្ទុ

បានផុស

២ years មុន

នៅ

ថ្ងៃសៅរ៍ ២៣ តុលា ២០២១

ដោយ

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) បើកឆាកទទួលបាន៣ពិន្ទុពូល K បន្ទាប់ពីបានយកឈ្នះ U23 ហុងកុង ដោយលទ្ធផល ៤-២ នៅប្រទេសជប៉ុន ថ្ងៃសៅរ៍ ទី២៣ ខែតុលានេះ ក្នុងយុទ្ធនាការណ៍ជម្រុះសន្សំពិន្ទុក្នុងពូលជើងឯកយុវជនទ្វីបអាស៊ី AFC U23 Asian Cup ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការប្រកួតវគ្គទី១ ទាំងកម្ពុជា និង ហុងកុងមានឱកាសល្អសម្រុកគ្នាទៅវិញទៅមកដូចគ្នា ប៉ុន្តែហុងកុងមានឱកាសមាសពីរបីលើក តែធ្វើមិនបានសម្រេចដោយស៊ុតប៉ះរបាទី ខណៈកម្ពុជាគ្រប់គ្រងបាល់បានច្រើន។ ការប្រកួតអូសបន្លាយរហូតដល់នាទីទី៤០ទើបគ្រាប់បាល់កើតមានដោយការវាយបកនៅស្លាបឆ្វេងជាការសម្រេចទីរបស់ខ្សែប្រយុទ្ធ សៀង ចន្ធា ដើម្បីនាំមុខ ១-០ ។

ដោយឡែកការប្រកួតវគ្គទី២ ហុងកុងបានដាក់សម្ពាធខ្លាំងនៅដើមវគ្គ ប៉ុន្តែគ្មានសំណាងទម្លាយសំណាញ់ទីខ្មែរ បើទោះជាមានឱកាសល្អពីរលើកក៏ដោយ។ ផ្ទុយទៅវិញ ការវាយបករបស់កម្ពុជាពិតជាមានប្រសិទ្ធភាពដោយគ្រាន់តែដើមវគ្គរកបាន៣គ្រាប់បន្ថែមទៀតក្នុងនោះ សៀង ចន្ធា រកគ្រាប់បាល់ទី២នៅនាទី៥៤ ហើយ ស៊ីន កក្កដា រកបាននៅនាទី៥៦ ដែលជាការបញ្ជូនបាល់ពី ចន្ធា។ ជាពិសេសគ្រាប់បាល់ទី៤ពិតជាអស្ចារ្យមែនទែនដែលជាការស៊ុតពីចម្ងាយរបស់ មិន រតនៈ ផុតដៃអ្នកចាំទីហុងកុងចូលយ៉ាងស្អាតនៅនាទីទី៦២។

យ៉ាងណា កម្ពុជាមិនអាចរក្សាសំណាញ់ទីរបស់ខ្លួនឲ្យនៅសូន្យបានទេ បន្ទាប់ពីហុងកុងបានបំប៉ោងសំណាញ់ទីនៅនាទី៨២ដើម្បីតាមពីក្រោយ ៤-១ និងរកបានគ្រាប់ទី២ដោយការស៊ុតប៉េណាល់បានសម្រេចតាមពីក្រោយ ៤-២ រហូតចប់ការប្រកួត។