U-19 កម្ពុជា និងក្រុមជម្រើសជាតិនារី ត្រូវបំពេញបេសកកម្មរៀងៗខ្លួនថ្ងៃនេះជាមួយគ្នា

ក្រុមបាល់ទាត់ជម្រើសជាតិនារីកម្ពុជា នឹងបើកយុទ្ធនាការប្រកួតពានរង្វាន់ជើងឯកនារីអាស៊ាន (AFF Women’s Championship 2022) ទល់នឹង នារីឡាវ ខណៈជាមួយគ្នានេះ U-19 កម្ពុជា ត្រូវជួប U-19 ម៉ាឡេស៊ី នាល្ងាចថ្ងៃទី០៥ កក្កដា នេះ។

ការប្រកួតរបស់ជម្រើសជាតិនារីកម្ពុជា ជាមួយ ឡាវ គឺជាប្រកួតដំបូងក្នុងពូល B ដែលគ្រោងចាប់ផ្ដើមនៅវេលាម៉ោង ៦ល្ងាច នាកីឡដ្ឋាន Binan Stadium។ នេះក៏ជាការជួបគ្នាលើកដំបូងផងដែររវាងក្រុមទាំង ២ ចាប់តាំងពីក្រុមនារីកម្ពុជា ចូលរួមពានរង្វាន់នេះ នៅឆ្នាំ២០១៨។

ដោយឡែក U-19 កម្ពុជា ត្រូវជួបជាមួ U-19 ម៉ាឡេស៊ី ក្នុងជំនួបទី២ ប្រចាំពូល B ផងដែរ ដោយការប្រកួតនឹងធ្វើឡើងនោវេលាម៉ោង ៣:០០រសៀល នៅកីឡដ្ឋាន Gelora Bung Karno Madya Stadium រដ្ឋធានី Jakarta។

ប្រកួតនេះគឺជាប្រកួតទី២ របស់ U-19 កម្ពុជា ក្រោយប្រកួតទី១ បានយកឈ្នះ U-19 សិង្ហបុរី ខណៈម៉ាឡេស៊ី វិញនេះជាប្រកួតទី១ របស់គេ បន្ទាប់ពីប្រកួតទី១ ពុំមានការប្រកួតនិងបានសម្រាក។

គួររំឮកថា ពានរង្វាន់ជើងឯកនារីអាស៊ាន (AFF Women’s Championship) ចាប់ផ្ដើមពីថ្ងៃទី០៤ ដល់ថ្ងៃទី១៧ ខែកក្កដា។ ក្រុមនារីកម្ពុជា ស្ថិតនៅពូល B ជាមួយវៀតណាម, មីយ៉ាន់ម៉ា, ឡាវ និងទីម័រខាងកើត។ ដោយឡែកពានយុវជនអាស៊ីអាគ្នេយ៍អាយុក្រោម ១៩ឆ្នាំ (AFF U-19 Championship) គ្រោងធ្វើពីថ្ងៃទី០២ ដល់ថ្ងៃទី១៥ នៅខែកក្កដា ឆ្នាំ២០២២។ ក្រុមជម្រើសជាតិកម្ពុជា អាយុក្រោម ១៩ឆ្នាំ ស្ថិតនៅពូល B ជាមួយ ម៉ាឡេស៊ី, ឡាវ, ទីម័រខាងកើត និងសិង្ហបុរី៕

អត្ថបទ៖ មន្នីរ័ត្ន