សុន ថាវីស៊ីវ តាំងចិត្តជាថ្មីដើម្បី U-16 និង U-19 កម្ពុជា ក្រោយធ្វើមិនបានល្អ ក្នុងពានប្រចាំតំបន់អាស៊ាន

ក្រុមបាល់ទាត់​ជម្រើសជាតិ​យុវជន​កម្ពុជា អាយុ​ក្រោម ១៦​ ឆ្នាំ និង ១៩ ​ឆ្នាំ នៅ​ពាក់កណ្ដាល​ឆ្នាំ​ ២០២២ ​នេះ បាន​ជ្រុះ​ចេញពី​ពានរង្វាន់ ២ ​ផ្សេងៗ​ពីគ្នា​ក្នុង​តំបន់​អាស៊ាន ខណៈ​យុវជន​វ័យ ១៦ ​ឆ្នាំ​មួយរូប​ ដែល​ជាប់​ឈ្មោះ​ទាំងពីរ​ឈុត​បាន​សម្ដែង​ការសោកស្ដាយ​ ដ្បិត​មិន​អាចជួយ​ក្រុម​បាន​។​

សុន ថាវីស៊ីវ ជាយុវជនរបស់សាលាបាល់ទាត់ជាតិបាទី ឆ្នាំនេះរូបគេបានជាប់ជម្រើសជាតិយុវជន ២ ឈុត ទាំង U-16 និង U-19 ចេញទៅប្រកួតពាន AFF U-16 និង U-19 នៅឥណ្ឌូណេស៊ី ទាំង​ពីរលើក​ដូចគ្នា ប៉ុន្តែ​ខកចិត្ត​ដូចៗ​គ្នា​។​

​វី​ស៊ីវ បាន​ប្រាប់ ‘​កម្ពុ​ជាថ្មី​’ ក្រោយ​ចប់​ព្រឹត្តិការណ៍ AFF U-16 ថា​៖ «​ក្រោយ​ចប់​ប្រកួត​ពាន AFF U-16 ខ្ញុំ​មាន​អារម្មណ៍​សោកស្ដាយ​ខ្លាំង ហើយក៏​អន់ចិត្ត​ខ្លួនឯង​ដែល​អត់​អាច​ខំប្រឹង​ឱ្យ​ឡើងទៅ​វគ្គ​បន្តបាន ព្រោះ​អីយើ​ង​ឃើញថា ​យើង​ខំប្រឹង​ប្រកួត​ទី​ ២ ទោះ​ប្រកួត​ទី ​១ យើង​ធ្វើ​មិនសូវ​បានល្អ​ក៏ពិតមែន ប៉ុន្តែ​ប្រកួត​ទី​ ២ យើង​ខំប្រឹង​ឈ្នះ​អូស្ត្រាលី ដើម្បី​យកជ័យ​ជម្នះ​នៅ​ប្រកួត​ទី ​៣ តែ​ប្រកួត​ទី ​៣ ​យើង​ធ្វើ​អត់​សូវ​បានល្អ អ៊ីចឹង​យើង​អត់​អាច​បន្តទៅ​វគ្គ​ ៤ ​ក្រុម​បាន​។​»

​យុវជន​រូបនេះ ​បាន​បង្ហើប​ថា​នៅ​ប្រកួត​ទី ​៣ កីឡាករ​មួយចំនួន​នៅក្នុង​ក្រុម​ហាក់​ថមថយ​កម្លាំង បន្ទាប់ពី​បាន​ប្រកួត​ជាប់ៗ​គ្នា ហើយ​ជាពិសេស​ គឺ​ឆាប់​បាត់​បាល់​បន្ទាប់ពី​ប្រជែង​បាល់​បាន​ហើយ ប៉ុន្តែ​បែ​ជា​បាត់​បាល់​វិញ​ភ្លាមៗ​។​

​បើតាម​អាយុ​បច្ចុប្បន្ន ១៦​​ ឆ្នាំ​ គត់ សុន ថា​វី​ស៊ីវ គឺ​បាន​លេង​ត្រឹម U-16 ទេ ប៉ុន្តែ​គេ​មានឈ្មោះ​នៅ U-19 ផងដែរ ខណៈ​សាមីខ្លួន​ក៏​មិន​នឹកស្មាន​ដល់​ដែល​អាច​ជាប់ U-19​។ យ៉ាងណាមិញ គេ​អាច​នឹក​ដល់​ថា​ដោយសារតែ​ទទួលបាន​ឱកាស​លេង​នៅ​លី​គ​ទី​ ២ កម្ពុជា ជា​ញឹកញាប់​ទើប​ឈានទៅដល់​អាចជា​ប់​ជម្រើសជាតិ U-19​។

​មាន​យោបល់​ពី​ការលេង​ស៊ីសង្វាក់​គ្នា​រវាង​ឈុត​ទាំងពីរ វី​ស៊ីវ បាន​បញ្ជាក់ថា​៖ «​បើតាម​ខ្ញុំ​គិត ២​ ឈុត​ហ្នឹង​លេង​ស៊ីសង្វាក់​គ្នា​ទាំងពីរ ប៉ុន្តែ​ឈុត​ដែល​ខ្ញុំ​គិតថា​ ខ្ញុំ​លេង​ចូល​ គឺ​ឈុត U-16 ព្រោះ​ខ្ញុំ​អាច​លេង​បាន​ ២ ​ប្រកួត​ហើយ​ប្រកួត​ទី ​២ គឺថា​ល្អ​ខ្លាំង លេង​យល់ចិត្ត​គ្នា គ្រប់គ្រង​ស្ថានភាព​ក្នុងការ​ប្រកួត​បាន មានការ​ទំនាក់ទំនង​គ្នា​នៅលើ​ទីលាន ហើយនឹង​ចេះ​ដោះស្រាយ​ស្ថានភាព​ខ្លួនឯង​នៅពេលដែល​ជួប​បញ្ហា​នៅលើ​ទីលាន​។​»

​យ៉ាងណាមិញ ឆ្នាំ​ ២០២២​ នេះ យុវជន​កម្ពុជា នៅសល់​ការប្រកួត​ជម្រុះ​ជើងឯក​យុវជន​អាស៊ី ២​ លើក​ទៀត ដែល​ល​រួមមាន AFC U-17 និង AFC U-20 ខណៈ សុន ថា​វិ​ស៊ីវ បានដាក់​ការតាំង​ចិត្តជា​ថ្មី ដើម្បី​ជួយ​ក្រុម ប្រសិនបើ​ទទួលបាន​ឱកាស​ជាប់​ជម្រើសជាតិ​យុវជន​ជាថ្មី​។ «​សម្រាប់​ពាន AFC U-17 និង U-20 នាពេលខាងមុខ បើសិន​ខ្ញុំ​នៅមាន​ឈ្មោះ​ធ្វើតេស្ត​បន្តទៀត ខ្ញុំ​នឹង​តាំងចិត្ត​ថា​នឹង​រៀបចំ​ខ្លួនឯង​ឱ្យ​បានល្អ​ក្នុងការ​ធ្វើតេស្ត​ដំណាក់កាល​នីមួយៗ ហើយ​នៅពេលដែល​ខ្ញុំ​មានឈ្មោះ​ជាប់ ខ្ញុំ​នឹង​តាំងចិត្ត​ខ្លួនឯង​សារជាថ្មី​ដើម្បី​ជួយ​ក្រុម​ឱ្យបាន​។​» សម្ដី​របស់ សុន ថា​វី​ស៊ីវ​។​

​សូមបញ្ជាក់ថា បាន​រង្វាន់​ជម្រុះ​ជើងឯក​យុវជន​អាស៊ី​អាយុ​ក្រោម ២០​ឆ្នាំ (AFC U-20 Asian Cup) នឹងធ្វើ​ពីថ្ងៃ​ទី​ ១៤-២៨ ខែកញ្ញា ឆ្នាំ​ ២០២២ ដោយ U-19 កម្ពុជា នៅ​ពូ​ល I ជាមួយ​ម្ចាស់ផ្ទះ​តាជី​គី​ស្ថាន​, លី​បង់ និង​សិង្ហ​បុរី​។ ដោយឡែក​ពាន (AFC U-17 Asian Cup) នឹងធ្វើ​ពីថ្ងៃ​ទី​ ០៥-២០ ខែតុលា ឆ្នាំ​២០២២ ដោយ U-16 កម្ពុជា នៅ​ពូ​ល G ជាមួយ​ម្ចាស់ផ្ទះ​អូស្ត្រាលី​, ចិន និង​កោះ​ម៉ា​រី​ណា​ខាងជើង​៕

​អត្ថបទ​៖ មន្នី​រ័ត្ន​