រួមពូលជាមួយកម្ពុជា គ្រូព្រុយណេថា «យើង​ត្រៀម​ខ្លួន​រួចរាល់​សម្រាប់ការ​ប្រកួតប្រជែង»

ព្រុយណេ កំពុងស្វែងរកការប្រកួតប្រជែងដ៏ល្អមួយ នៅពេលដែលពួកគេប្រកួតក្នុងពានរង្វាន់ជើងឯកអាស៊ីអាគ្នេយ៍ (AFF Mitsubishi Electric Cup 2022) នាពេលខាងមុខ។

ក្រុមបាល់ទាត់ជម្រើសជាតិព្រុយណេ ស្ថិតក្នុងដំណាក់កាលចុងក្រោយនៃការរៀបចំក្រុម ហើយក្រុមដែលមានសមាជិក ២៣នាក់នឹងត្រូវសម្រេចនៅនៅថ្ងៃសុក្រនេះ។

គ្រូបង្វឹក លោក Mario Campesino បាននិយាយនៅក្នុងបទសម្ភាសន៍ជាមួយសារព័ត៌មានព្រុយណេ ‘BruSports News’ កាលពីថ្ងៃព្រហស្បតិ៍ថា “យើងត្រៀមខ្លួនជាស្រេចដើម្បីប្រកួតប្រជែង ប៉ុន្តែសម្រាប់ពួកយើងវាគឺជាពេលដែលត្រូវរៀន និងពិនិត្យមើលថាតើកម្រិតរបស់យើងនៅទីណា”។

“គោលដៅដំបូងរបស់យើងគឺឆ្លងផុតវគ្គជម្រុះ MEC (ពាន Mitsubishi Electric Cup) ហើយយើងធ្វើវាបានហើយ”។ លោកបានបន្ថែមថា៖ ”ឥឡូវនេះរឿងសំខាន់គឺត្រូវធ្វើឲ្យប្រសើរឡើង និងរីករាយក្នុងការប្រកួត ខណៈពេលដែលយើងក៏កំពុងតែអភិវឌ្ឍកីឡាករ”។

ព្រុយណេបានឡើងមកវគ្គចែកពូលនេះ ក្រោយប្រកួតជម្រុះឈ្នះ ទីម័រខាងកើត លទ្ធផលទាំងពីរជើង ៦-៣។ ដូច្នេះការឡើងមកវគ្គនេះ ព្រុយណេដែលជាក្រុមមានចំណាត់ថ្នាក់ទាបជាងគេ និង​ស្ថិតនៅក្នុងពូល A ជួប កម្ពុជា នៅប្រកួតទី៣ ត្រូវនឹងថ្ងៃទី២៩ ខែធ្នូ ឆ្នាំ២០២២ នៅលើទឹកដីរាជធានីភ្នំពេញ ខណៈគេក៏ត្រូវជួបក្រុម ៣ ផ្សេងទៀត រួមមានថៃ, ហ្វីលីពីន និងឥណ្ឌូនេស៊ី៕

អត្ថបទ៖ មន្នីរ័ត្ន