ក្រុមបញ្ជាការដ្ឋានអង្គរក្ស A ដាក់គោលដៅយកជើងឯក ក្រោយហាត់នៅឥណ្ឌូណេសុី

ការប្រកួត​កីឡាបាល់ទះពានរង្វាន់សម្ដេចក្រឡាហោម ស ខេង រដូវកាលទី៣ ឆ្នាំ២០២៤ ក្លិបបាល់ទះបញ្ជាការដ្ឋានអង្គរក្សមាន២ក្រុមចូលរួម​ប្រកួតក្នុងឆ្នាំនេះ​គឺ ក្រុម A និង B បន្ទាប់​ពី​ពួក​គេ​បាន​ទៅ​ហ្វឹក​ហាត់​រយៈ​ពេល​វែង​នៅ​ប្រទេស​ឥណ្ឌូណេស៊ី។

មុនការប្រកួតពានរង្វាន់សម្ដេចក្រឡាហោម ស ខេង រដូវកាលទី៣ មកដល់ ក្រុមបញ្ជាការដ្ឋានអង្គរក្ស បានចេញទៅហ្វឹកហាតនៅ​ប្រទេស ឥណ្ឌូណេសុី ដើម្បី​ប្រជែងតំណែងម្ចាស់ជើងឯកក្នុងឆ្នាំ២០២៤។ ក្នុងការប្រកួតពានរង្វាន់សម្ដេចក្រឡាហោម ស ខេង រដូវកាលទី២ កាលពីឆ្នាំមុន ក្លិបបាល់ទះបញ្ជាការដ្ឋានអង្គរក្ស ដណ្ដើមបានត្រឹមចំណាត់ថ្នាក់លេខ៣ ក្រោយយកឈ្នះក្រុមស្នងការនគរបាលខេត្តពោធិ៍សាត់ ក្នុងលទ្ធផល ៣-១ កាលពីថ្ងៃទី១៦ ខែវិច្ឆិកា ឆ្នាំ២០២៣។

គ្រូជំនួយបញ្ជាការដ្ឋានអង្គរក្ស A លោក​ ជួន នាង បានប្រាប់«កម្ពុជាថ្មី»ថា៖«ចំពោះក្រុមរបស់ខ្ញុំគោលដៅគឺជ័យលាភីលេខ១ ព្រោះកាលពីឆ្នាំមុនក្រុមខ្ញុំបានត្រឹមលេខ៣ ហើយឆ្នាំនេះត្រូវតែបេ្ដជ្ញាធ្វើមិចឲ្យបានលេខ១ឬលេខ២»។

ក្រុមបញ្ជាការដ្ឋានអង្គរក្ស A បានត្រៀមខ្លួនល្អក្នុងឆ្នាំនេះ ក្រោយសហព័ន្ធកីឡាបាល់ទះកម្ពុជាបានកែប្រែលក្ខខណ្ឌមួយ​ចំនួន​ដោយតម្រូវឲ្យក្រុមនីមួយៗ អាចដាក់កីឡាករកម្រិត A លេងនៅក្នុងទីលាន បានចំនួន២នាក់ និងកីឡាករបរទេសបាន១នាក់ ដូច្នេះក្រុមបញ្ជាការដ្ឋានអង្គរក្សអាចដាក់កីឡាករមានគុណភាពនិងកីឡាករបរទេសដើម្បីជួយក្រុមបន្ថែម។

លោក​ ជួន នាង បានបន្ថែមថា៖«ក្រុមកីឡាកររបស់ខ្ញុំទើបតែត្រឡប់មកពីហ្វឹកហាត់នៅឥណ្ឌូណេសុី ប៉ុន្តែអ្នកប៉ះសេក្នុងក្រុមនៅខ្ចី។ ចំពោះបច្ចេកទេសហ្វឹកហាត់នៅឥណ្ឌូណេសុីល្អ បន្ទាប់ហាត់សមត្ថភាព ពួកគេក៏មានការកើនឡើង»។

ក្រុមបាល់ទះបញ្ជាការដ្ឋានអង្គរក្ស A ស្ថិតក្នុងពូល B រួមមានក្លិបកីឡាបាល់ទះលោកតាឌីខេត្តព្រះវិហារ, ក្លិបបាល់ទះស្នងការដ្ឋាននគរបាលខេត្តរតនគិរី និងបបាល់ទះស្នងការដ្ឋាននគរបាលខេត្តកណ្ដាល៕

អត្ថបទ៖ ផា រតនា​