ប្រធាន​ក្រុម​បាល់ទះ​ម៉ាឡេស៊ី​ Sim Jian ចូលរួមជាមួយខេត្តតាកែវ ក្នុង​សម្ដេចក្រឡាហោម ស ខេង

ប្រធាន​ក្រុម​បាល់ទះ​ជម្រើស​ជាតិ​ម៉ាឡេស៊ី កីឡាករ Sim Jian Qin ​បាន​ចូល​រួម​ជា​ក្រុម​​​កីឡា​បាល់ទះ​ខេត្ត​តាកែវ ដើម្បី​ចូល​រួម​ប្រកួតពានរង្វាន់សម្តេចក្រឡាហោម ស ខេង លើក​ទី​៣ ឆ្នាំ២០២៤។

បើការតាមប្រកាសពីសហព័ន្ធកីឡាបាល់ទះម៉ាឡេសុី ប្រធាន​ក្រុម​បាល់ទះ​ជម្រើស​ជាតិ​ម៉ាឡេស៊ី Sim Jian Qin ​សម្រេច​ចូល​រួម​ជាមួយ​ក្លិប​​បាល់ទះ​ខេត្ត​តាកែវ ចូលរួមការប្រកួតពានរង្វាន់សម្តេចក្រឡាហោម ស ខេង ឆ្នាំ២០២៤។ ក្នុងឆ្នាំ២០២៤ កីឡាករ Sim បានមកកម្ពុជាម្ដងរួចមកហើយ ក្នុងការប្រកួតពាន​រង្វាន់​ SEA V. League Challenge។

បន្ទាប់ពីបង្ហាញសមត្ថភាពជាមួយក្រុមជម្រើសជាតិម៉ាឡេសុីបានយ៉ាងល្អ ឥឡូវរូបគេទទួលបាន​ឱកាស​មកលេងនៅទឹកដីកម្ពុជាលើកទី៣ គិតចាប់តាំងពី​ព្រឹត្តិការណ៍ស៊ីហ្គេម ឆ្នាំ​២០២៣ និងការប្រកួតដណ្ដើមកៅអី SEA V. League។

Sim Jian Qin ធ្លាប់ឆ្លើយ​តប​នឹង​អ្នក​សារព័ត៌មានចោទ​សួរ​ថា គិត​យ៉ាង​ណា​ ប្រសិន​បើ​​មាន​ក្លិប​បាល់ទះ​នៅ​កម្ពុជា​ចាប់​អារម្មណ៍​​ កីឡាករ​លេខ​​១២​ប្រធាន​ក្រុម​ជម្រើស​ជាតិ​ម៉ាឡេស៊ី​​​​​​​បាន​ឆ្លើយ​ថា រូប​គេ​​ពេញ​ចិត្ត​​ក្នុង​ការ​មកលេង​នៅ​កម្ពុជា​​ដោយ​មាន​​ហេតុផល​ពីរ​យ៉ាង។

កីឡាករ Sim Jian Qin បាន​និយាយ​ថា ៖«សប្បាយចិត្តសម្រាប់ការមកលេងនៅទីនេះ ពីព្រោះខ្ញុំដឹងថា ការលេងបាល់ទះនៅកម្ពុជាគឺអាចធ្វើឲ្យយើងលេងដើម្បីជីវិតរស់នៅបាន»។ ប្រការ​នេះ​ទំនង​ជា​រូប​គេ​សំដៅ​ទៅ​លើ​អាជីព​​បាល់ទះ​​នៅ​កម្ពុជា​​​អាច​រក​ចំណូល​ចិញ្ចឹម​គ្រួសារ​បាន។

ម្យ៉ាង​វិញ នៅ​ប្រទេស​ម៉ាឡេស៊ី​មិន​ទាន់មាន​កម្មវិធី​ប្រកួត​សំខាន់​​ណា​មួយ​ឡើយ ដូច្នេះ​រូប​គេ​ទំនេរ​​ដែល​ចេញ​ទៅ​ក្លិប​ណា​ក៏​បាន។ កីឡាករ​បាន​និយាយ​ថា ៖«ការប្រកួត​បាល់​ទះ​នៅ​​កម្ពុជា​ពិត​ជា​គួរឲ្យចាប់អារម្មណ៍​ណាស់។​ អ្នកគាំទ្រស្រឡាញ់បាល់ទះយ៉ាងខ្លាំង។ ជាក់ស្តែង អ្នកគាំទ្រ​បាន​ថតរូបជាមួយកីឡាករយ៉ាងសប្បាយរីករាយ។ ជាមួយគ្នានេះនៅម៉ាឡេស៊ី លីគមិនទាន់ចាប់ផ្តើមទេ ដូច្នេះខ្ញុំពិតជារីករាយក្នុងការចូលរួមជាមួយក្លិបណាមួយដែលចាប់អារម្មណ៍ខ្ញុំ។ ខ្ញុំរីករាយចូលរួមនៅទីនេះ»។

អត្ថបទ៖ ផា រតនា​