កីឡា

តើគ្រូ និងកីឡាករសិង្ហបុរី និយាយអ្វីខ្លះពីការប្រកួតឈ្នះ កម្ពុជា យប់មិញ?

បានផុស

១ year មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

គ្រូបង្វឹក និងកីឡាករល្អប្រចាំការប្រកួតរបស់សិង្ហបុរី មិនសប្បាយចិត្តទេចំពោះទម្រង់លេងរបស់ខ្លួន បើទោះបីជាទទួលបានជ័យជម្នះលើកម្ពុជាដោយលទ្ធផល ២-១ ដើម្បីទទួលបាន៣ពិន្ទុដ៏មានសារសំខាន់ វគ្គសន្សំពិន្ទុក្នុងពូល A ពានរង្វាន់ ASEAN Mitsubishi Electric Cup យប់ថ្ងៃទី១១ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Tsutomu Ogura គ្រូបង្វឹកសិង្ហបុរី បាននិយាយក្នុងសន្និសីទសារព័ត៌មានក្រោយការប្រកួតថា ៖«ខ្ញុំមិនសប្បាយចិត្តនឹងទម្រង់លេងរបស់ក្រុមថ្ងៃនេះទេ។ ពួកយើងបានខំប្រឹងហ្វឹកហាត់ និងអភិវឌ្ឍរបៀបលេងរបស់យើងល្អ តែបែរជាធ្វើមិនបានល្អដូចការគ្រោងទុក ពីព្រោះយើងលេងបាល់វែងច្រើនពេក បន្ទាប់ពីនាំមុខគេ»។

លោកបាននិយាយថា កូនក្រុមរបស់លោកប្រយុទ្ធបានល្អ ប៉ុន្តែមានចន្លោះប្រហោងច្រើនដែលត្រូវកែលំអ។ «ខ្ញុំទទួលខុសត្រូវសម្រាប់ការហ្វឹកហាត់ និងជួបប្រជុំជាមួយក្រុម ដូច្នេះនេះប្រហែលជាកំហុសរបស់ខ្ញុំ។ ពួកយើងទាំងអស់គ្នាត្រូវតែកែឲ្យល្អជាងនេះ»។

លោកបានរៀបរាប់ទៀតថា លោកបាននិយាយទៅកាន់កីឡាករអំពីរឿងនេះដូចគ្នាទៅនឹងរឿងដែលបានកើតឡើងសម្រាប់ការប្រកួតទី១របស់កម្ពុជា ដែលពួកគេតាមពីក្រោយម៉ាឡេស៊ី រហូតនាំមុខ។ កីឡាករទាំងអស់ត្រូវតែប្រុងប្រយ័ត្នចំពោះចំណុចគ្រោះថ្នាក់នេះ ប៉ុន្តែអ្វីដែលបាននិយាយគ្នា បែរជាមិនបានយកទៅអនុវត្តជាក់ស្តែង។

លោកសង្កត់ធ្ងន់ថា ៖«ប្រសិនបើយើងលេងជាប់គាំង ជម្រើសល្អបំផុតគឺត្រូវលេងគ្រប់គ្រងបាល់ពីក្រោម។ យើងត្រូវការពារយ៉ាងណាឲ្យនៅឆ្ងាយពីតំបន់គ្រោះថ្នាក់ ហើយបង្កើតឱកាសឲ្យបានច្រើន តែផ្ទុយទៅវិញ ខុសស្រឡះ»។

កីឡាករ Faris Rami ដែលបានក្លាយជាកីឡាករល្អប្រចាំការប្រកួតក៏មិនសប្បាយចិត្តនឹងទម្រង់លេងដែរ។

កីឡាករបាននិយាយថា ៖«បាន៣ពិន្ទុពិតជាសំខាន់ តែការលេងរបស់យើងមើលទៅសាមញ្ញ មិនគ្រប់គ្រាន់ទេ។ យើងត្រូវផ្តោតលើការលេងទាំងស្រុង។ អ្វីៗទាំងអស់ជាប់គាំង។ យើងត្រូវរៀបចំក្រុមឡើងវិញឲ្យបានលឿន និងផ្តោតយកចិត្តទុកដាក់សម្រាប់ការប្រកួតបន្ទាប់។

កាលពីយប់មិញ គ្រាប់បាល់២គ្រាប់របស់សិង្ហបុរីកើតឡើងដោយសារតែកំហុសអ្នកចាំទីកម្ពុជា វីរៈ ដារ៉ា នៅដើមវគ្គទី១ ខណៈការប្រកួតត្រូវបានគ្រប់គ្រងដោយកម្ពុជា។ ជាពិសេសនៅវគ្គទី២ដែលសិង្ហបុរីការពារស្ទើរពាក់កណ្តាលតារាង៕