ចិន​បញ្ចូន​អតីត​មន្ត្រី​បាល់ទាត់​កំពូល​២រូប​ទៀត​ចូលពន្ធនាគារ​ពី​បទពុក​រលួយ

ប្រទេសចិនបានកាត់ទោសអតីតមន្ត្រីបាល់ទាត់កំពូល២រូបទៀតពី​បទ​អំពើ​ពុក​រលួយ​ បន្ទាប់ពីមានការបើកយុទ្ធនាការបង្រ្កាបយ៉ាងខ្លាំង​នៅ​ក្នុង​ពិភព​បាល់​ទាត់។

តុលាការមួយខេត្ត Hubei កណ្តាលបាននិយាយថា លោក Liu Yi អគ្គលេខាធិការនៃសមាគមបាល់ទាត់ចិន (CFA) ត្រូវបានកាត់ទោសឲ្យជាប់ពន្ធនាគាររយៈពេល១១ឆ្នាំ និងពិន័យជាប្រាក់ចំនួន ៣.៦លានយ័ន (ប្រមាណ​៤៩៧,០០០​ដុល្លារ) ពីបទទទួលយក​សំណូក។ តុលាការមួយទៀតនៅក្នុងខេត្តដដែលនេះបាននិយាយថា បុរស​ឈ្មោះ Tan Hai អតីតប្រធានការិយាល័យគ្រប់គ្រងអាជ្ញាកណ្តាលរបស់សមាគមបាល់ទាត់ចិន ត្រូវបាន​កាត់​ទោស​ឲ្យ​ជាប់​ពន្ធធនាគារ​៦​ឆ្នាំ​កន្លះ និងពិន័យជាប្រាក់ ២០០,០០០យ័ន (ប្រមាណ​២៧៥៣៤ដុល្លារ)។

ក្នុងសេចក្តី​ថ្លែងការណ៍​ទាំង​ពីររបស់តុលាករ​បាន​លើកឡើងថា​ ៖ «​ទ្រព្យ​សម្បត្តិ​ដែលពួក​គេ​​ទទួល​បាន​នឹង​ត្រូវ​តម្កល់​មក​វិញ​តាម​ច្បាប់​ហើយ​ប្រគល់​ទៅ​រតនាគារ​រដ្ឋ​»។

តុលាការមួយផ្សេងទៀតកាលពីថ្ងៃអង្គារបាននិយាយថា លោក Qi Jun អតីតប្រធានផ្នែកផែនការយុទ្ធសាស្រ្តរបស់សមាគមបាល់ទាត់ចិន (CFA) ត្រូវបានកាត់ទោសឲ្យជាប់គុក៧ឆ្នាំ និងពិន័យជាប្រាក់ ៦០០,០០០យន់ (ប្រមាណ​៨២៦១០ដុល្លារ) ពីបទស៊ីសំណូក។ ប្រធានាធិបតី​ចិន លោក ស៊ី ជីនពីង បាន​​បើក​យុទ្ធនាការ​មិន​ឈប់ឈរ​ប្រឆាំង​នឹង​អំពើ​ពុករលួយ​ចាប់​តាំង​ពី​ឡើង​កាន់​អំណាច​ជាង​មួយ​ទសវត្សរ៍​​ចុង​ក្រោយ។

អតីតប្រធាន CFA លោក Chen Xuyuan ត្រូវបានជាប់ពន្ធនាគារអស់មួយជីវិតកាលពីខែមីនា ពីបទទទួលសំណូក។ ក្នុងខែដដែលនោះ​ អតីតគ្រូបង្វឹកក្រុមជម្រើសជាតិ និងជាអតីតកីឡាករធ្លាប់លេងនៅ Premier League លោក Li Tie បានសារភាពកំហុសចំពោះបទឧក្រិដ្ឋដូចគ្នា។

តាម​រយៈ​អំពើ​ពុក​រលួយបាន​ធ្វើ​ឲ្យ​ក្រុម​បាល់ទាត់​ជម្រើស​ជាតិ​ចិន​មិន​សូវ​រីក​ចម្រើន​​ទៅ​មុខ​ទេ​ទាំង​ការ​ប្រកួត​បាល់ទាត់​កម្រិត​អាស៊ី និង​ជើង​ឯក​ពិភព​លោក ហើយ​ពេល​ខ្លះ​ត្រូវ​បាន​ដៃ​គូ​ស៊ុត​ចូល​ច្រើន​គ្រាប់​​ដែល​ពាក់​ព័ន្ធ​នឹង​អំពើ​ពុក​រលួយ៕

ប្រែសម្រួល៖ ផា រតនា