Connect with us

កីឡា

លោក Koji បាន​លើក​​​ ផលចំណេញ ២​យ៉ាង​ នឹង​ជួយ U23 កម្ពុជា ធ្វើបានល្អក្នុងវគ្គជម្រុះ U23 Asian Cup

បានផុស

នៅ

គ្រូបង្គោលរបស់ក្រុមជម្រើសជាតិ កម្ពុជា អាយុក្រោម ២៣ ឆ្នាំ លោក Koji Gyotoku បានបង្ហើបពីកត្តា ២ ដែល​នឹង​ជួយឱ្យ ក្រុម​ម្ចាស់​ផ្ទះ​កម្ពុជា មានប្រៀបលើក្រុមគូប្រជែងទាំង ៣ ក្នុងពូល G ហើយអាចធ្វើបានល្អសម្រាប់ការប្រកួតវគ្គជម្រុះពានរង្វាន់ AFC U23 Asian Cup™ Saudi Arabia 2026។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
លោក Koji Gyotoku

ថ្លែងនៅក្នុងសន្និសីទសារព័ត៌មាន នាព្រឹកថ្ងៃ អង្គារ៍ ទី២ ខែ កញ្ញា ឆ្នាំ ២០២៥ គ្រូបង្គោលសញ្ជាតិ ជប៉ុន វ័យ ៦០ ឆ្នាំបានមានប្រសាសន៍ ថា៖ «ផលចំណេញរបស់ពួកយើង គឺយើងមិនចាំបាច់ធ្វើដំណើរ។ ចំណែកមួយទៀត គឺពួកយើងបានស៊ាំជាមួយអាកាសធាតុនៅក្នុងស្រុករបស់ពួកយើងស្រាប់។ ផលចំណេញគឺមាន ២ ចំណុចហ្នឹងខ្ញុំសង្ឃឹម ថា កីឡាកររបស់ខ្ញុំ នឹងធ្វើបានល្អគ្រប់ការប្រកួត»

ជុំវិញការលើកឡើងខាងលើ លោក Koji បានមើលឃើញពីផលចំណេញ ២ ដែល កម្ពុជា ធ្វើជាម្ចាស់ផ្ទះវគ្គជម្រុះពាន AFC U23 Asian Cup™ Saudi Arabia 2026 ទី ១ គឺមិនបាច់ធ្វើដំណើរ និងទី ២ គឺការស៊ាំជាមួយអាកាសធាតុស្រាប់។ ដូច្នេះកត្តាទាំងនេះ នឹងជួយឱ្យ កម្ពុជា អាចធ្វើបានល្អក្នុងការប្រកួតវគ្គជម្រុះនេះ។

ខ្សែបម្រើបុង សាំយូអ៊េល

ដោយឡែកខ្សែបម្រើបុង សាំយូអ៊េល វិញ ក៏បានមើលឃើញពីផលផលចំណេញ ដែលកម្ពុជាធ្វើជាម្ចាស់ផ្ទះនេះផងដែរ ហើយគេជឿជាក់ ថា ក្រុមរបស់ខ្លួននឹងធ្វើបានល្អសម្រាប់ការប្រកួតក្នុងវគ្គជម្រុះពាន AFC U23 Asian Cup នេះ។ ខ្សែបម្រើដ៏មានទេពកោសល្យរបស់ ភ្នំពេញក្រោន បាននិយាយថា៖ «ខ្ញុំគិតថា ពួកយើងធ្លាប់លេងនៅទឹកដីរបស់យើងច្រើនដងហើយ។ អ៊ីចឹងខ្ញុំគិតថា ទីលានក៏មានភាពងាយស្រួល។ ដូច្នេះជួបជាមួយក្រុមខ្លាំង ខ្ញុំគិតថា ពួកយើងនឹងធ្វើបានល្អ»

កីឡាករជម្រើសជាតិ កម្ពុជា អាយុក្រោម ២៣ ឆ្នាំ

គួរបញ្ជាក់ថា កម្ពុជា គឺទទួលបានសិទ្ធិធ្វើជាម្ចាស់ផ្ទះពានរង្វាន់ AFC U23 Asian Cup សម្រាប់ជម្រុះ​ពូល G។ ក្នុងនោះការប្រកួតដំបូង ក្រុម កម្ពុជា អាយុក្រោម ២៣ ឆ្នាំ នឹងត្រូវជួបជាមួយក្រុម អូម៉ង់ នៅថ្ងៃទី ៣ ខែ កញ្ញា។ ប្រកួតទី ២ ត្រូវជួបជាមួយក្រុម ប៉ាគីស្ថាន នៅថ្ងៃទី ៦ ខែ កញ្ញា និងការប្រកួតទី ៣ ត្រូវជួបក្រុម អ៊ីរ៉ាក់ នៅថ្ងៃទី ៩ ខែ កញ្ញា៕

កាលវិភាគប្រកួត

អត្ថបទ៖ សេម កុសល

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម