Apple នឹងបន្ថែមមុខងារស្កេនរករូបភាពអាសអាភាសសម្រាប់គណនីក្មេងក្រោម ១៨ឆ្នាំ

ក្រុមហ៊ុន Apple បានបញ្ជាក់ថា មុខងារថ្មីរបស់ខ្លួននៅលើទូរសព្ទ iPhone ដែលអាចស្កេនរករូបភាពអាសអាភាស គឺសម្រាប់តែគណនីក្មេងៗអាយុក្រោម ១៨ឆ្នាំ ហើយវានឹងដំណើរការទៅបានដោយតម្រូវឱ្យមានការឯកភាពពីអាណាព្យាបាល។

ការស្រាយបំភ្លឺនេះបានធ្វើឡើង ក្រោយមានក្រុមអ្នកឃ្លាំមើលបង្ហាញការព្រួយបារម្ភទាក់ទងនឹងការការពារព័ត៌មានឯកជនភាពរបស់អ្នកប្រើប្រាស់ជាមួយនឹងមុខងារថ្មីរបស់ក្រុមហ៊ុន Apple ដែលអាចស្កេនរករូបភាពអាសអាភាសដែលផ្ញើតាមរយៈ iMessage ជាមួយនឹងទូរសព្ទ iPhone ដែលមានប្រព័ន្ធប្រតិបត្តិការ iOS 15 ។

ពាក់ព័ន្ធនឹងករណីនេះក្រុមហ៊ុនបានឱ្យដឹងថា សម្រាប់គណនីដែលមានក្មេងក្រោមអាយុ ១៣ ឆ្នាំ នៅពេលដែលក្រុមហ៊ុនស្កេនឃើញរូបភាពអាសអាភាសនៅក្នុងសារ ក្រុមហ៊ុនមិនត្រឹមតែធ្វើឱ្យរូបភាពព្រិលទេ ថែមទាំងបង្ហាញនូវពាក្យពេចន៍ព្រមានទាក់ទងនឹងរូបភាពទាំងនោះផងដែរ។

ប្រសិនបើកុមារបើកមើលរូបភាពទាំងនោះ ក្រុមហ៊ុនអាចនឹងផ្ដល់ដំណឹងទៅអាណាព្យាបាល ប្រសិនបើពួកគេបានបើកប្រើមុខងារនេះ។ សម្រាប់គណនីដែលមានក្មេងពីអាយុ ១៣ ដល់ ១៧ឆ្នាំ ក្រុមហ៊ុនគ្រាន់តែបង្ហាញសារព្រមាន និងធ្វើឱ្យរូបភាពព្រិលតែប៉ុណ្ណោះ។

គួរបញ្ជាក់ផងដែរថា អ្នកប្រើប្រាស់អាចបើកប្រើឬបិទមុខងារនេះបាន។ ម្យ៉ាងវិញទៀតក្រុមហ៊ុនបានប្រើកុំព្យូទ័រដើម្បីស្កេនរករូបភាពដែលមាននៅក្នុង iMessage ជាមួយនឹងប្រព័ន្ធសុវត្ថិភាព end-to-end encryption ដូច្នេះពុំមានអ្នកណាអាចចូលទៅមើលរូបភាពទាំងនោះបានឡើយ៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា

ចុចអាន៖ ជនខិលខូចបញ្ចេញស្នៀតបោកបញ្ឆោតថ្មី ចំពោះអ្នកប្រើប្រាស់សេវាកម្ម PayPal

ចុចអាន៖ ទិញទំនិញអនឡាញបង់ប្រាក់មុន ប្រយ័ត្នអស់លុយមិនដឹងខ្លួន