ជប៉ុនផ្ដល់ហិរញ្ញប្បទានឥតសំណងជាង១៨លានដុល្លារលើគម្រោងបោសសម្អាតមីន និងកំពង់ផែក្រុងព្រះសីហនុ

រដ្ឋាភិបាលជប៉ុន បានផ្ដល់ហិរញ្ញប្បទានឥតសំណងជាង១៨លានដុល្លារអាម៉េរិកដល់រាជរដ្ឋាភិបាលកម្ពុជា សម្រាប់អនុវត្តលើគម្រោងចំនួន២ដូចជាគម្រោងបោសសម្អាតមីន និងគម្រោងកំពង់ផែក្រុងព្រះសីហនុ។ ពិធីចុះហត្ថលេខាលើលិខិតប្តូរសារសម្រាប់គម្រោងហិរញ្ញប្បទានឥតសំណងចំនួនពីរនេះ ធ្វើឡើង នៅថ្ងៃទី១២ ខែមករា ឆ្នាំ២០២៦ ក្រោមវត្តមានឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនៃកម្ពុជា និងឯកអគ្គរាជទូតជប៉ុនប្រចាំកម្ពុជា UENO Atsushi។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្ដីប្រកាសព័ត៌មានរបស់ក្រសួងការបរទេសគឺជប៉ុន គម្រោងទី១ រដ្ឋាភិបាលជប៉ុនបានផ្ដល់ទឹកប្រាក់ចំនួន ១.៧០០.០០០.០០០ យ៉េន ឬប្រមាណ ១១.៣ លានដុល្លារអាម៉េរិក  សម្រាប់អនុវត្តគម្រោងសមាហរណកម្មការបោសសម្អាតគ្រាប់មីន និងសង្គ្រោះជនពិការ ដោយសារគ្រាប់មីនដំណាក់កាលទី៣។

សម្រាប់គម្រោងទី២ រដ្ឋាភិបាលជប៉ុនផ្ដល់ទឹកប្រាក់ចំនួន ១.១៤២.០០០.០០០ យ៉េន ឬប្រមាណ ៧.៦ លានដុល្លារអាម៉េរិក សម្រាប់អនុវត្តគម្រោងជំនួយម៉ាស៊ីនស្កែនកុងតឺន័រនៅចំណតកុងតឺន័រថ្មីកំពង់ផែក្រុងព្រះសីហនុ។

ក្រសួងការបរទេសកម្ពុជា ចាត់ទុកហិរញ្ញប្បទានឥតសំណងនេះ បង្ហាញពីការគាំទ្រយ៉ាងខ្ជាប់ខ្ជួនរបស់ប្រទេសជប៉ុនសម្រាប់ ការអភិវឌ្ឍសង្គម-សេដ្ឋកិច្ចកម្ពុជា ដោយជំរុញកំណើនប្រកបដោយចីរភាព។ ហិរញ្ញប្បទាននេះក៏ ជាសក្ខីភាពមួយនៃការធ្វើឱ្យកាន់តែស៊ីជម្រៅនៃទំនាក់ទំនងទ្វេភាគីរវាងកម្ពុជា និងជប៉ុន ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ។

កម្ពុជា និងជប៉ុន​ បានចាប់ផ្ដើមបង្កើតទំនាក់ទំនងការទូតជាមួយគ្នាជាផ្លូវការនៅ ថ្ងៃទី៩ ខែមករា ឆ្នាំ១៩៥៣ ដែលគិតមកទល់ឆ្នាំ២០២៦ នេះ ទំនាក់ទំនងប្រទេសទាំងពីរឈានដល់ខួប៧៣ឆ្នាំហើយ។ ថ្នាក់ដឹកនាំ​កម្ពុជា​ និង​ជប៉ុន​ បាន​ព្រម​ព្រៀង​គ្នា​ដំឡើងកម្រិតទំនាក់ទំនងការទូតទ្វេភាគីទៅជា​«ភាពជាដៃគូ​យុទ្ធ​សាស្ត្រ​គ្រប់​ជ្រុង​ជ្រោយ» ដែលជាកម្រិតខ្ពស់បំផុត ​នៅដើមឆ្នាំ២០២៣ ចំគ្រាដែលទំនាក់ទំនងប្រទេសទាំងពីរគ្រប់អាយុ៧០ឆ្នាំគត់៕

ដោយ៖ ង៉ិល ណារ៉ាត់