យូនីសេហ្វ ផ្ដើមយុទ្ធនាការ “ខ្ញុំធូរចិត្តពេល…” ដើម្បីលើកកម្ពស់សុខភាពផ្លូវចិត្តនៅកម្ពុជា

អង្គការយូនីសេហ្វប្រចាំកម្ពុជា បានចាប់ផ្ដើមយុទ្ធនាការថ្មីមួយឈ្មោះថា “ ខ្ញុំធូរចិត្តពេល..” ក្នុងគោលបំណងដើម្បីជំរុញឲ្យមានការលើកកម្ពស់ និងយល់ដឹងពីសុខុមាលភាពផ្លូវចិត្ត នៅក្នុងប្រទេសកម្ពុជា។ ការដាក់ចេញនូវយុទ្ធនាការនេះ ធ្វើឡើងបន្ទាប់ពីអង្គការយូនីសេហ្វ និងដៃគូពាក់ពាក់រកឃើញថា ​បញ្ហា​សុខភាពផ្លូវចិត្ត ​ក្លាយជា​បញ្ហាអាទិភាពមួយ ​នៃអាទិភាពសកលសំខាន់ៗ​របស់ខ្លួន ស្របពេលដែលពិភពលោក កំពុងស្ដារឡើងវិញពី​ជំងឺរាតត្បាតកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការយូនីសេហ្វ បញ្ជាក់ទៀតថា យុទ្ធនាការនេះ អនុវត្តដោយផ្អែកលើព័ត៌មានដែលបាន​ពី​ការសិក្សាស្រាវជ្រាវ និងដែលបានរកឃើញថា ជំងឺរាតត្បាតកូវីដ-១៩ បាន​ធ្វើឲ្យ​វិបត្តិសុខភាពផ្លូវចិត្ត ដែលកំពុងកើតមានរួចហើយនោះ កាន់តែមានសភាពធ្ងន់ធ្ងរប៉ះពាល់ដល់យុវជន ​នៅទូទាំងពិភពលោក រួមទាំង​នៅកម្ពុជាផង។​

បើតាមការឲ្យដឹងរបស់អង្គការនេះ យុវវ័យ​ម្នាក់ក្នុងចំណោម ៧នាក់ នៅទូទាំងសកលលោក ​ត្រូវបានគេរកឃើញថា កំពុងរស់នៅជាមួយ​វិបត្តិផ្លូវចិត្ត។ ដោយឡែកនៅកម្ពុជា យូនីសេហ្វរកឃើញថា ក្នុងចំណោមយុវវ័យ ៤៥%​ ដែលបានចូលរួម​នៅក្នុងការអង្កេត មានការព្រួយបារម្ភអំពីសុវត្ថិភាពរបស់ពួកគេ ក្នុងអំឡុង​នៃជំងឺរាតត្បាតកូវីដ-១៩ និង ១៦%ទៀត មានបញ្ហាថប់បារម្ភ និងធ្លាក់ទឹកចិត្ត ចាប់តាំងពីពេលចាប់​ផ្ដើមនៃ​វិបត្តិកូវីដ-១៩នេះ។

អង្គការដដែល បញ្ជាក់ទៀតថា តាមការវាយម្លៃរួមគ្នា ស្ដីពី តម្រូវការការអប់រំ ធ្វើឡើងដោយ​ក្រសួង​អប់រំ យុវជន និងកីឡា ក្រុមការងារវិស័យ​អប់រំ និងយូនីសេហ្វ បានរកឃើញថា ៥៨% នៃ​សិស្សមធ្យមសិក្សា​ ត្រូវបានរាយការណ៍ថា ​បានជួបប្រទះនឹង​បញ្ហាផ្លូវចិត្ត ​យ៉ាងហោចណាស់មួយដង។

អង្គការអន្តរជាតិមួយនេះ ក៏បានលើកទឹកចិត្ត និងជំរុញឲ្យដៃគូពាក់ព័ន្ធ សាលារៀន ព្រមទាំងអង្គការសង្គមស៊ីវិលទាំងអស់នៅកម្ពុជា ដែលមានការព្រួយបារម្ភអំពីសុខភាពផ្លូវចិត្តរបស់យុវជន ចូលរួមប្រើប្រាស់មាតិកា និងសម្ភារនានាដែលខ្លួនកំពុងផលិត សម្រាប់យុទ្ធនាការថ្មីនេះ ខណៈមាតិកា និងសម្ភារទាំងនេះ នឹងត្រូវផ្សព្វផ្សាយតាមរយៈបណ្ដាញទំនាក់ទំនងសង្គម របស់យូនីសេហ្វកម្ពុជា។

យុទ្ធនាការ “ខ្ញុំធូរចិត្ត ពេល…” ត្រូវបានប្រកាសឡើង កាលពីថ្ងៃទី ១៥ ខែមិថុនា ឆ្នាំ ២០២២ ដោយផ្ដើមជា​មួយវីដេអូ ដែលបង្ហាញអំពីយុវជនកម្ពុជា កំពុងប្រើប្រាស់យន្តការដោះស្រាយបញ្ហា ឬវិបត្តិផ្លូវចិត្តបែបវិជ្ជមានដូចជា៖ ការលេងកីឡាបែបមិត្តភាព និងសកម្មភាពច្នៃប្រឌិត ដើម្បីពង្រឹងសុខភាពផ្លូវចិត្តរបស់ពួកគេ ខណៈពួកគេនឹងបន្តរយៈពេល ៣ខែទៀត ជាមួយនឹងសកម្មភាពអនទ្បាញជាប្រចាំ ដើម្បីលើកកម្ពស់​ការយល់ដឹង ក៏ដូចជាការផ្ដល់​គន្លឹះ និងសេចក្ដីណែនាំដល់យុវជនជាច្រើនផ្សេងទៀត៕

អត្ថបទ៖ លន់ សេនី