ភាគខាងកើត ឥណ្ឌូណេស៊ី ជួបគ្រោះរញ្ជួយដីខ្លាំងក្លាកម្រិត ៦.២ រ៉ិចទ័រ

ទីភ្នាក់ងារឧតុនិយម អាកាសធាតុ និងភូគព្ភសាស្ត្ររបស់ប្រទេសឥណ្ឌូណេស៊ីបាននិយាយថា គ្រោះរញ្ជួយដីកម្រិត ៦.២ រ៉ិចទ័របានវាយប្រហារខេត្ត Papua ភាគខាងកើតនៃប្រទេសឥណ្ឌូណេស៊ីនៅព្រឹកថ្ងៃសៅរ៍នេះ ប៉ុន្តែមិនបានបង្កជារលកយក្សស៊ូណាមិនោះទេ ។

ទីភ្នាក់ងារបាននិយាយថា ការរញ្ជួយដីនេះត្រូវបានចាត់ថ្នាក់ថាជាការរញ្ជួយដ៏ខ្លាំងក្លាមួយ បន្ទាប់ពីមានការរញ្ជួយដីជាបន្តបន្ទាប់ដែលមានកម្រិត ៦.០ រ៉ិចទ័រ, ៥.៩ រ៉ិចទ័រ និង ៥.៥ រ៉ិចទ័រក៏បានអង្រួនខេត្តនេះកាលពីប៉ុន្មានម៉ោងមុនផងដែរ ។

ការរញ្ជួយដីនេះបានកើតឡើងនៅម៉ោង ៧ និង ០៥ នាទីព្រឹក (ម៉ោងនៅទីក្រុងហ្សាការតា) ជាមួយនឹងចំណុចកណ្តាលនៅចម្ងាយ ៣៧ គីឡូម៉ែត្រភាគពាយព្យនៃស្រុក Memberamo Tengah និងជម្រៅ ១០ គីឡូម៉ែត្រនៅក្រោមផែនដី ។ ជាចុងក្រោយទីភ្នាក់ងារនេះបានឲ្យដឹងថា ទោះជាយ៉ាងណាការរញ្ជួយដីនេះមិនមានសក្តានុពលអាចបង្កឲ្យមានរលកយក្សស៊ូណាមិនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Xinhua

ចុចអាន ៖ ការសិក្សាថ្មី ៖ ផែនដីកំពុងស្ថិតក្នុងហានិភ័យ ៤ ចំណុច អាចជាមហន្តរាយ​សម្រាប់មនុស្សជុំវិញពិភពលោក