អតីត “ក្មេងស្រីស្អាតជាងគេលើលោក” ​ក្លាយជាសេដ្ឋីនីក្នុងវ័យ ១៧ឆ្នាំ

តារា​ម៉ូដែល​​ជនជាតិ​រុស្ស៊ី​ Kristina Pimenova ដែលធ្លាប់ជាប់ឈ្មោះជា “ក្មេងស្រី​ស្អាត​បំផុត​ក្នុង​ពិភពលោក” កាលពីប៉ុន្មានឆ្នាំមុន ពេលនេះកេរ្តិ៍ឈ្មោះរបស់នាងកាន់តែល្បីល្បាញ ​និងបានក្លាយជាសេដ្ឋីនីក្នុងវ័យត្រឹមតែ ១៧ឆ្នាំ។

កាលពី ៨ឆ្នាំមុន Kristina Pimenova ធ្លាប់បង្កភាពល្បីល្បាញស្ទើរពាសពេញពិភពលោក ក្រោយពេលនាងបង្ហាញខ្លួនជាសាធារណៈជាលើកដំបូង។ ដោយសារសម្រស់ដ៏ស្រស់ស្អាតប្រៀបដូចទេពធីតា Kristina ត្រូវបានប្រព័ន្ធផ្សព្វផ្សាយ និងម៉ាកយីហោនានា ដាក់រហ័ស្សនាមថា “កុមារីម៉ូដែលស្រស់ស្អាតបំផុតលើលោក” ហើយតាំងពីពេលនោះ នាងបានក្លាយជាតារាបង្ហាញម៉ូដដ៏មានប្រជាប្រិយភាពនៅក្នុងប្រទេសរុស្ស៊ី ព្រមទាំងជាមុខសញ្ញានៃម៉ាកយីហោល្បីៗលំដាប់អន្តរជាតិ ។

បន្ទាប់ពីបង្ហាញខ្លួន Kristina អាចរកប្រាក់ចំណូលបានខ្ពស់កប់ពពក ពីការដើរម៉ូដឱ្យម៉ាកសម្លៀកបំពាក់កុមាររុស្ស៊ី។ មិនតែប៉ុណ្ណោះអាយុត្រឹមតែ ៩ឆ្នាំ នាងបានបង្ហាញខ្លួននៅលើក្របទស្សនាវដ្តី Vogue ដ៏ល្បីល្បាញថ្នាក់ពិភពលោកបាត់ទៅហើយ។

នៅឆ្នាំ២០១៥ Kristina ត្រូវបានម្តាយនាំទៅកាន់រដ្ឋកាលីហ្វ័រញ៉ា សហរដ្ឋអាមេរិក ដើម្បីតាំងលំនៅ ហើយវាជំរុញនាងឱ្យឆក់បានឱកាសការងារពីវិស័យហ្វេសស្សិនបន្ថែមទៀត។ មកដល់សហរដ្ឋអាមេរិក នាងនៅតែរក្សាតំណែងជា “កុមារីម៉ូដែលស្រស់ស្អាតបំផុតលើលោក” ដដែល ហើយបន្តលេចមុខក្នុងវិស័យម៉ូដជាហូរហែ។ នៅឆ្នាំ២០១៦ ភាពយន្តឯកសារនិយាយអំពីខ្សែជីវិត Kristina Pimenova ត្រូវបានបង្ហាញនៅលើប៉ុស្តិ៍ RTL ដែលវាជួយរកចំណូលទ្វេដងឱ្យនាង។

យ៉ាងណាមិញ មួយរយៈក្រោយមក Kristina ហាក់មានភាពឯកជនជាងមុន ដោយមិនសូវលេចមុខលើវិថីសិល្បៈទៀតទេ ដែលគេដឹងថានៅពេលនោះនាងផ្តោតសំខាន់លើការសិក្សា។

បច្ចុប្បន្ន “តារាម៉ូដែលវ័យក្មេងដែលស្អាតជាងគេលើលោក” រូបនេះ ឈានចូលវ័យ ១៧ឆ្នាំ ចំណែកសម្រស់របស់នាងហាក់ប្រែប្រួលច្រើន ប៉ុន្តែនៅតែស្រស់ស្អាត និងទាក់ទាញដូចមុន ជាពិសេសឆ្នាំនេះ នាងមានទ្រព្យសម្បត្តិកាន់កាប់ប្រមាណ ២៤៥លានដុល្លារអាមេរិក ក្លាយជាសេដ្ឋីនីវ័យក្មេង នៅក្នុងវិស័យម៉ូដ៕

ប្រែសម្រួល៖ សន្យា

ចុចអាន៖ ព្រះជន្មទើបតែ ៧វស្សា ព្រះនាងម្ចាស់ប្រទេសវេលស៍ ក្លាយជាក្មេងស្រីមានទ្រព្យសម្បត្តិច្រើនជាងគេបំផុតលើលោក

ចុចអាន៖ ក្រោយបញ្ចាំងចប់ ២១ឆ្នាំ តួស្រីរឿង “Harry Potter” ពេលនេះក្លាយជាសេដ្ឋីនីវ័យក្មេង