របបយោធាមីយ៉ាន់ម៉ា វាយប្រហារ​១១០លើក ​ក្នុងអំឡុង​បទ​ឈប់​បាញ់​២០ថ្ងៃ​

ក្នុងអំឡុងពេលបទឈប់បាញ់រយៈពេល ២០ថ្ងៃចាប់ពីថ្ងៃទី ២ដល់ថ្ងៃទី២២ខែមេសា ​មាន​ការ​​កត់ត្រា​ឃើញ​ថា របបយោធាមីយ៉ាន់ម៉ា បានធ្វើការវាយប្រហារតាមអាកាស និងកាំភ្លើងធំប្រហែល១១០លើក លើគោលដៅលើជនស៊ីវិលនៅក្នុងទឹកដីសហភាពជាតិ Karen (KNU)។ នេះបើយោងតាមការចេញផ្សាយរបស់សារព័ត៌មាន​ The Irrwaddy នៅថ្ងៃទី២៩ខែមេសានេះ។

សហភាពជាតិ Karen (KNU) ដែលគ្រប់គ្រងតំបន់មួយដែលគេស្គាល់ថា Kaw Thoo Lei និងផ្នែកខ្លះនៃរដ្ឋ Karen, Mon និង Tanintharyi និងតំបន់ Bago ភាគខាងកើត បានរាយការណ៍ថា របបយោធា​​គ្រប់គ្រង​​ប្រទេស​មីយ៉ាន់​ម៉ា​​តាម​រយៈ​ការ​ធ្វើ​រដ្ឋ​ប្រហារ​ បានវាយប្រហារតាមផ្លូវអាកាស និងយន្តហោះគ្មានមនុស្សបើកចំនួន៦៣លើកទៅ​លើតំបន់ជនស៊ីវិល KNU ក្នុងអំឡុងពេលបទឈប់បាញ់ សម្លាប់មនុស្ស ១៥នាក់ រួមទាំងព្រះសង្ឃមួយអង្គ និងរបួស ៣៧នាក់។ ការទម្លាក់គ្រាប់បែកពីលើអាកាសបានបំផ្លាញវត្តពុទ្ធសាសនាចំនួនប្រាំ និងផ្ទះជនស៊ីវិលចំនួនប្រាំពីរ។

ទន្ទឹមនឹងនេះ របបយោធាក៏បានធ្វើការវាយប្រហារដោយកាំភ្លើងធំចំនួន ៤៣លើកសម្លាប់មនុស្ស ៥នាក់ និងរបួស ១៨ នាក់ ខណៈបំផ្លាញផ្ទះចំនួន ១៦ ខ្នង។ ទាហាន​របប​នេះ​ក៏​បាន​ដុត​ផ្ទះ​បួន​ខ្នង និង​ព្រះវិហារ​មួយ​ផង​ដែរ ក្នុង​អំឡុង​ពេល​វាយឆ្មក់​លើ​ភូមិ​មួយ។

គួរបញ្ជាក់ថា របបយោធាបានប្រកាសបទឈប់បាញ់ពីរបីថ្ងៃបន្ទាប់ពីអង្គការប្រដាប់អាវុធជនជាតិភាគតិចជាច្រើន រួមជាមួយនឹងកងកម្លាំងការពារប្រជាជនរបស់រដ្ឋាភិបាលរួបរួមជាតិបានប្រកាសបទឈប់បាញ់ដោយឯកតោភាគីដើម្បីជួយសម្រួលដល់ប្រតិបត្តិការជួយសង្គ្រោះ និងការកាន់ទុក្ខ ប៉ុន្តែនៅតែបន្តទម្លាក់គ្រាប់បែកលើជនស៊ីវិលនៅតាមភូមិ និងទីប្រជុំជនដែលគ្រប់គ្រងដោយក្រុមប្រឆាំងរបប។

ក្រោយមក របបនេះបានប្រកាសពន្យារពេលបទឈប់បាញ់មួយសប្តាហ៍នៅថ្ងៃទី ២៣ ខែមេសា នៅតែបន្តការវាយប្រហារតាមអាកាសរបស់ខ្លួនប្រឆាំងនឹងគោលដៅជនស៊ីវិលភាគច្រើន ដោយកាល​ពី​ថ្ងៃ​អាទិត្យ យន្តហោះ​ចម្បាំងរបស់យោធា​បាន​ទម្លាក់​គ្រាប់បែក​លើ​ទីប្រជុំជន Sintgu ​គ្រប់គ្រង​ដោយកម្លាំងការពារប្រជាជន( PDF) នៅ​ក្នុង​តំបន់ Mandalay ដោយ​បាន​បំផ្លាញ​អគារ​មួយ​ចំនួន។

ក្រៅពីនេះការវាយប្រហារតាមអាកាសរបស់របបជាង ១០០ ក៏ត្រូវបានរាយការណ៍នៅទូទាំងតំបន់ និងរដ្ឋចំនួន ១០ ហួសពីរដ្ឋRakhine និងទឹកដី KNU ក្នុងអំឡុងពេលបទឈប់បាញ់។ ការវាយប្រហារទាំងនេះផ្តោតសំខាន់ទៅលើតំបន់ជនស៊ីវិល ដោយបានសម្លាប់មនុស្សរាប់សិបនាក់ និងរបួសជាង ១០០ នាក់៕

អត្ថបទ៖ ប៊ុន សុភាព