ទិន្នផលអំបិលបានតិច ប៉ុន្ដែមិនប៉ះពាល់ដល់ការផ្គត់ផ្គង់ក្នុងស្រុក

លោក ប៊ុន ណារិន ប្រធានសមាគមអ្នកផលិតអំបិលកំពត-កែប បានឱ្យដឹងថា ទោះបីឆ្នាំនេះទិន្នផលអំបិលប្រមូលផលបានតិចដោយសារតែមានភ្លៀងធ្លាក់ច្រើនក៏ពិតមែន ប៉ុន្តែវាមិនប៉ះពាល់អ្វីដល់ការផ្គត់ផ្គង់ក្នុងស្រុកនោះឡើយ។

ថ្លែងប្រាប់ កម្ពុជាថ្មី​ នៅថ្ងៃទី០៧ ខែឧសភានេះ លោក ប៊ុន ណារិន ប្រធានសមាគមអ្នកផលិតអំបិលកំពត-កែប បានប្រាប់ឱ្យដឹងថា ដ្បិតតែឆ្នាំនេះមានភ្លៀងធ្លាក់ច្រើន នាំ​ឱ្យការប្រមូលផលអំបិលមិនបានច្រើនក៏ពិតមែន តែវាមិនប៉ះពាល់អ្វីដល់ការផ្គត់ផ្គង់សម្រាប់តម្រូវការទីផ្សារក្នុងស្រុក នោះឡើយ។

លោក បញ្ជាក់ថា​ ៖ «មូលហេតុដែលលោកហ៊ានថាមិនខ្វះអំបិលសម្រាប់បរិភោគនោះ ដោយតែនៅក្នុងឃ្លាំងនៅសល់អំបិលពីឆ្នាំមុន ប្រមាណជាង៥តោន។ ចំណែកការប្រមូលផលឆ្នាំនេះ គិតចាប់ពីថ្ងៃទី២៥ ខែមេសា ឆ្នាំ២០២៥ មកដល់ ថ្ងៃទី០៧ ខែឧសភា ឆ្នាំ២០២៥នេះ កសិករប្រមូលផលអំបិលបានចំនួន ១ម៉ឺន ៨ពាន់តោន សរុបទៅអាចចាត់ទុកថាគ្រប់គ្រាន់សម្រាប់ការផ្គត់ផ្គង់ក្នុងស្រុក»។

ទោះជាយ៉ាងណា ស្របពេលដែលការប្រមូលផលអំបិលពុំសូវបានច្រើនដូចឆ្នាំកន្លងទៅ លោក ប៊ុន ណារិន ក៏បានបង្ហើបឱ្យដឹងដែរថា ចំពោះតម្លៃអំបិលវិញ ហាក់កើនឡើនជាងមុនបន្ដិច ដោយអំបិលលេខ១ អាចលក់ចេញបានចន្លោះពី ១១ ០០០រៀល ទៅ១២ ០០០រៀល ក្នុង១បាវ ទម្ងន់៥០គីឡូ ចំណែក អំបិលលេខ២ និង លេខ៣វិញ លក់ចេញក្នុងតម្លៃចន្លោះពី ៧ ០០០រៀល ទៅ ៨ ០០០រៀល ក្នុង១បាវ។

យោងតាមក្រសួងឧស្សាហកម្ម ផលិតកម្មអំបិលកម្ពុជាសម្រេចបានជាង ១៦ ម៉ឺនតោន (១៦៨ ៨៨២) នៅក្នុងឆ្នាំ ២០២៤ លើ​ផ្ទៃ​ដីស្រែអំបិលជិត ៤ ពាន់ហិកតា (៣ ៩៨៧) (កំពត ៣ ៤៨៩ហិកតា កែប ៤៩៧​ហិក​តា)។

គួរជម្រាបថា កម្ពុជាមានក្រុមផលិតអំបិលចំនួន ១៩១ ក្រុម ក្នុងនោះខេត្តកំពតផលិតបាន ១២៨ ៤៧៤ តោន ខេត្តកែប ផលិតបាន ៤០ ៤០៨ តោន​។ ការលក់ចេញបានចំនួន ៧៤ ១៨៥ តោន។

ក្នុង​មួយ​ឆ្នាំៗ​ កម្ពុជា​ត្រូវការ​អំបិល​ចន្លោះ​ពី​ ៧-១០​ ម៉ឺន​តោន ​ដើម្បី​បំពេញតម្រូវការ​​ក្នុងស្រុក​។ ក្រៅពី​ផល​អំបិល​ក្នុងស្រុក បណ្តា​ខេត្ត​នៅជាប់​ព្រំដែន​ថៃ និង​វៀតណាម ក៏​តែង​នាំចូល​អំបិល​មក​ដាក់លក់​ផងដែរ​ ប៉ុន្តែនៅឆ្នាំ ២០២៤ ពុំមាន​ការ​នាំអំបិលចូលពីបរទេសនោះទេ៕

អត្ថបទ ៖ សួស សិត