តើឥណ្ឌា ប្រើអាវុធអ្វី វាយប្រហារ ប៉ាគីស្ថាន ?

ជាការសងសឹកចំពោះអំពើភេរវកម្មនៅតំបន់កាស្មៀរដែលសម្លាប់ទេសចរមួយក្រុមកាលពីថ្ងៃទី២២ខែមេសា ឥណ្ឌាក៏សម្រេចចិត្តបើកប្រតិបត្តិការ «Sindoor» វាយប្រហារតំបន់កាស្មៀរខាងប្រ​ទេសប៉ាគីស្ថានវិញ ជាលទ្ធផលបណ្តាលឲ្យជនស៊ីវិលជាច្រើននាក់បាត់បង់ជីវិត នៅថ្ងៃទី៧ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតតែមានសេចក្តីរាយការណ៍ថា ប៉ាគីស្ថានបានបាញ់ទម្លាក់យន្តហោះចម្បាំងឥណ្ឌាចំនួន៥គ្រឿងក៏ពិតមែន ប៉ុន្តែទីក្រុងញូវដែលីបានប្រកាសពីជោគជ័យ ក្នុងការកម្ទេចជំរំភេរវករក្នុងទឹកដីប៉ាគីស្ថាន ជាមួយនឹងមីស៊ីល SCALP និងគ្រាប់បែក AASM Hammer ដែលបាញ់និងទម្លាក់ចេញពីយន្តហោះចម្បាំង Rafale ផលិតនៅប្រទេសបារាំង។

SCALP ជាមីស៊ីលផលិតដោយក្រុមហ៊ុនបារាំង MBDA មានសមត្ថភាពបាញ់នៅលើអាកាស ជាមួយរយៈចម្ងាយ៥៦០គីឡូម៉ែត្រ។ វាមានទម្ងន់ ១ ៣០០គីឡូក្រាម អាចបំពាក់ក្បាលគ្រាប់ BROACH ទម្ងន់៤៥០គីឡូក្រាម ដែលបង្កការផ្ទុះធំធេង។ ចំពោះតម្លៃវិញ មីស៊ីលនេះ មានតម្លៃប្រហែល ១.៨លានដុល្លារអាមេរិកក្នុងមួយគ្រាប់។

ចំពោះគ្រាប់បែក AASM Hammer វិញ, គ្រាប់បែកនេះផលិតនៅបារាំងដូចគ្នា ប៉ុន្តែដោយក្រុមហ៊ុន Safran Electronics & Defense។ វាជាប្រភេទគ្រាប់បែក ទម្លាក់ចំគោលដៅចំៗ ជាពិសេសចាប់សញ្ញាអគារនិងយានយន្តបានច្បាស់។ សម្រាប់តម្លៃ គ្រាប់បែកនេះមានតម្លៃចន្លោះពី ២០ទៅ៣០ម៉ឺនដុល្លារអាមេរិក ក្នុងមួយគ្រាប់៕

អត្ថបទ៖ សុខ សុវណ្ណ

ចុចអាន៖ ឥណ្ឌា បញ្ជាឲ្យពលរដ្ឋកាស្មៀរ ជម្លៀសចេញជាបន្ទាន់ ឯខាងប៉ាគីស្ថាន អ្នកភូមិរត់ចោលផ្ទះសម្បែង ព្រោះសង្គ្រាម