ឧស្សាហកម្មអាកាសចរណ៍សកល រំពឹងបន្ត​ទទួល​ផលចំណេញ ទោះ​សេដ្ឋកិច្ចសកលមិនសូវស្រួល

ឧស្សាហកម្មអាកាសចរណ៍សកល រំពឹងពីទស្សនវិជ្ជមានសម្រាប់វិនិយោគិន ទោះបីជាសេដ្ឋកិច្ចសកល​ធ្លាក់ចូលទៅក្នុងភាពមិនប្រាកដប្រជាខ្លាំង ជុំវិញបញ្ហា​ភូមិសាស្រ្តនយោបាយ និងសង្រ្គាមពាណិជ្ជកម្ម​ក៏ដោយ​។ នេះបើតាមការចុះផ្សាយរបស់បណ្ដាញទូរទស្សន៍ CNBC។

យោងតាមសមាគមដឹកជញ្ជូនផ្លូវអាកាសអន្តរជាតិ (IATA ) ប្រាក់ចំណេញនៃឧស្សាហកម្មអាកាសចរណ៍ត្រូវបានគេរំពឹងថានឹងប្រសើរឡើងនៅឆ្នាំ ២០២៥ ទោះបីជាកំណើនផលិតផលក្នុងស្រុកសរុប (GDP) របស់ពិភពលោក រំពឹង​ថានឹង​ធ្លាក់ចុះមកត្រឹម ២,៥ ភាគរយ នៅឆ្នាំ​ដដែលនេះ ពី ៣,៣ ភាគរយ នៅឆ្នាំមុនក៏ដោយ។

ក្នុងរបាយការណ៍ដែលបានចេញផ្សាយកាលពីថ្ងៃចន្ទ IATA បាននិយាយថា ប្រាក់ចំណូល ប្រាក់ចំណេញប្រតិបត្តិការ និងប្រាក់ចំណេញសុទ្ធនៃឧស្សាហកម្មអាកាសចរណ៍ ​រំពឹងថានឹងកើនឡើងពីឆ្នាំ ២០២៤ ទោះបីជាខ្លះ​មាន​កម្រិតទាបជាងការព្យាករកាលពីខែធ្នូឆ្នាំមុនក្ដី។ ​

ជាឧទាហរណ៍ ប្រាក់ចំណេញសុទ្ធសម្រាប់ឧស្សាហកម្ម​នេះ ត្រូវបានគេព្យាករថាមានចំនួន ៣៦ ​ប៊ីលានដុល្លារសម្រាប់ឆ្នាំ ២០២៥ កើនឡើងពី ៣២,៤ ប៊ីលាន​ដុល្លារ នៅឆ្នាំ ២០២៤ ប៉ុន្តែវាទាបជាងការព្យាករ​ខែធ្នូ ៣៦,៦ ប៊ីលាន​ដុល្លារ។

ប្រាក់ចំណេញសុទ្ធរបស់ឧស្សាហកម្មអាកាសចរណ៍ ក៏ត្រូវបានព្យាករ​ថានឹងកើនឡើងដល់ ៣,៧ ភាគរយ នៅឆ្នាំ ២០២៥ ពីប្រមាណ ៣,៤ ភាគរយ ឆ្នាំមុន។ ​ប្រាក់ចំណូលសរុប ​រំពឹងថានឹងឈានដល់កម្រិតខ្ពស់បំផុត ៩៧៩ ប៊ីលាន​ដុល្លារ កើនឡើង ១,៣ ភាគរយ ធៀប​នឹង​ឆ្នាំមុន ប៉ុន្តែធ្លាក់ចុះពី ១ ទ្រីលានដុល្លារ ក្នុងការព្យាករកាលពីខែធ្នូ។ ​

បើតាម IATA ​លទ្ធផលល្អប្រសើរនេះបណ្ដាលមកពីកត្តា​ចម្បងសំខាន់ៗ២ រួមមាន​ ​តម្លៃប្រេងយន្តហោះទាប និងភាពប្រសើរឡើងនៃប្រតិបត្តិការ។ IATA បានកត់សម្គាល់ថា តម្លៃប្រេងឥន្ធនៈ​រំពឹងថានឹងមាន​តម្លៃជាមធ្យម ៨៦ ដុល្លារ/បារ៉ែលនៅឆ្នាំ ២០២៥ ធ្លាក់ចុះពី ៩៩​ ដុល្លារ/បារ៉ែល ឆ្នាំមុន។ ​

ការផ្ទុកអ្នកដំណើរ រំពឹងថានឹងឡើងដល់កម្រិតខ្ពស់បំផុត ៨៤ ភាគរយ នៅឆ្នាំ ២០២៥ ទោះបីជាក្រុមហ៊ុនអាកាសចរណ៍​ពិបាកក្នុងការពង្រីក និងធ្វើឱ្យប្រសើរឡើងនូវកងហោះហើររបស់ខ្លួន ដោយសារតែ​បញ្ហាខ្សែ​ច្រវ៉ាក់ផ្គត់ផ្គង់យន្តហោះនៅក្នុងឧស្សាហកម្មផលិតយន្តហោះ។ ការផ្ទុក សំដៅលើចំនួនអ្នកដំណើរនៅលើ​ជើងហោះហើរ៕