ក្រុមហ៊ុន​​ថៃរំពឹងពីភាពប្រសើរឡើងវិញ​នៃការនាំចេញមក​កម្ពុជា ​ក្រោយកិច្ចព្រមព្រៀងសន្តិភាព​

ក្រុមហ៊ុនផលិត និងចែកចាយទឹកផ្លែឈើរបស់ថៃ Malee Group ​បាន​រំពឹង​ពីភាពប្រសើរឡើងវិញ​នៃការនាំចេញទំនិញ​មក​កម្ពុជា​ ក្រោយមេដឹកនាំប្រទេសទាំង២ ចុះហត្ថលេខាលើកិច្ចព្រមព្រៀងសន្តិភាព​កាលពីថ្ងៃអាទិត្យ។ នេះបើតាមការចុះផ្សាយរបស់កាសែតបាងកកប៉ុស្តិ៍នៅថ្ងៃពុធនេះ។

នាយកប្រតិបត្តិក្រុមហ៊ុន Malee Group លោក Ekarin Pinij បានមានប្រសាសន៍ថា ក្រុមហ៊ុនបាននាំចេញទឹកផ្លែឈើ និងផលិតផលទឹកដោះគោមកកាន់ប្រទេសកម្ពុជា ប៉ុន្តែប្រតិបត្តិការទាំងនេះ បាន​​រង​ផលប៉ះពាល់ពីការបិទព្រំដែន។

ក្នុងបរិបទភាព​តានតឹងព្រំដែន យោធាធៃបាន​សម្រេចបិទច្រកព្រំដែនគោកជាមួយ​កម្ពុជានៅខែមិថុនា ដោយ​បន្តអូសបន្លាយមកដល់បច្ចុប្បន្ន ​ខណៈ​កម្ពុជាប្រកាន់ជំហរបើកវិញ លុះត្រាំតែភាគីថៃ បើកជាមុន។ ការបិទនេះ រំពឹងថានឹង​បង្កការខាតបង់ដល់អាជីវកម្មថៃប្រមាណ ១០០ ប៊ីលាន​បាត ឬ ៣,១ ប៊ីលាន​ដុល្លារ គិតត្រឹមចុង​ឆ្នាំនេះ ប្រសិន​បើគ្មានដំណោះស្រាយ។

ទោះយ៉ាងណាក្ដី លោក Ekarin បាន​ជឿជាក់ថា ភាពតានតឹងរវាងប្រទេសជិតខាង គឺគ្រាន់តែបណ្ដោះ​អាសន្ន​ប៉ុណ្ណោះ។ ទោះបីជាមាន​របាយការណ៍ថា ពលរដ្ឋកម្ពុជាបច្ចុប្បន្ន មាន​និន្នាការពហិការទំនិញថៃក៏ដោយ លោក​​បាន​និយាយថា ផលិតផលថៃទទួលបានការស្រឡាញ់ចូលចិត្តយ៉ាងល្អពីអ្នកប្រើប្រាស់កម្ពុជា។

លោក Ekarin បានកត់សម្គាល់ថា ក្រុមហ៊ុននៅតែមានទំនាក់ទំនងយ៉ាងជិតស្និទ្ធជាមួយដៃគូរបស់ខ្លួន​ក្នុងប្រទេសកម្ពុជា ហើយនៅតែប្ដេជ្ញាប្រតិបត្តិការលើទីផ្សារ។

ក្រៅពីបញ្ហា​នៅកម្ពុជា លោក​បានបន្ថែមថា ការបិទច្រកព្រំដែននៅមីយ៉ាន់ម៉ាមួយចំនួន​ ក៏បានប៉ះពាល់ដល់ការនាំចេញទៅកាន់ទីផ្សារ​នោះផងដែរ។ មុនកម្ពុជា និងថៃ ធ្លាក់ចូលទៅក្នុងភាព​តានតឹងព្រំដែនចុងក្រោយ កម្ពុជារួមចំណែក ៤​ ភាគរយ នៃការនាំចេញរបស់ក្រុមហ៊ុន Malee ខណៈមីយ៉ាន់ម៉ារួមចំណែក ១ ភាគរយ៕