ចិន នៅតែជាដៃគូវិនិយោគកំពូលរបស់ ឡាវ

បើយោងតាមលោក Khamjane Vongphosy រដ្ឋមន្ត្រីក្រសួងផែនការ និងវិនិយោគឡាវបានឲ្យដឹងថា ចិននៅតែជាដៃគូវិនិយោគកំពូលរបស់ប្រទេសឡាវ ដោយ​មានការ​វិនិយោគ​លើគម្រោងជាង ៩០០ នៅគ្រប់វិស័យទាំងអស់ និងសរុបជាទឹកប្រាក់មានប្រមាណជាង ១៣ ពាន់លានដុល្លារ ។

ការលើកឡើងនេះកើតមានឡើងនៅក្នុងកិច្ចប្រជុំផ្លាស់ប្តូរយោបល់លើកទី ៧ នៅក្នុងទីក្រុងវៀងច័ន្ទន៍ រវាងរដ្ឋាភិបាលឡាវ និងពាណិជ្ជករចិន ដោយមានការចូលរួមពីអនុរដ្ឋមន្ត្រី តំណាងសភាពាណិជ្ជកម្មចិន និងអ្នកពាក់ព័ន្ធធុរកិច្ច ចិន-ឡាវ ស្តីពីបទពិសោធន៍ បញ្ហាប្រឈម និងអនុសាសន៍របស់សហគ្រាសចិនដែលកំពុងប្រតិបត្តិការនៅក្នុងប្រទេសឡាវ ។

ការវិនិយោគរបស់ចិន បានចូលទៅកាន់គ្រប់ផ្នែកទាំងអស់លើគ្រប់វិស័យរបស់ឡាវ ដោយរួមមាន ការរុករក​រ៉ែ វិស័យថាមពល សេវាកម្ម ឧស្សាហកម្ម សិប្បកម្ម​ ដឹកជញ្ជូន និងសេវាសុខភាពសារធារណៈជាដើម ។

ស្របពេលជាមួយគ្នានេះ កាលពីឆ្នាំ ២០២២ ក្រុមហ៊ុនចិនចំនួន ៣០​ បានវិនិយោគនៅទូទាំងប្រទេសឡាវ ដែលមានតម្លៃសរុបដល់ចំនួន ៣៣៩ លានដុល្លារ ។

ដោយឡែក ក្រៅពីវិនិយោគិន ប្រទេសចិនក៏ជាទីផ្សារនាំចេញកំពូលរបស់ប្រទេសឡាវផងដែរ ។​ ក្នុងអំឡុងពេលនៃការរាតត្បាតនៃជំងឺកូវីដ ១៩​ ទោះបីជាមានការធ្លាក់ចុះសេដ្ឋកិច្ចក៏ដោយ ប៉ុន្តែតម្លៃពាណិជ្ជកម្មរវាងឡាវ និងចិននៅតែបន្តកើនឡើង ខណៈកាលពីឆ្នាំមុនបានកើនដល់ ៣១ ភាគរយ ៕​

ប្រែសម្រួល៖ នាង រតនៈ

ប្រភព៖ Laotian times

ចុចអាន៖ កត្តាមួយចំនួននាំឲ្យទេសចរ ចិន មិនសូវទៅលេងកម្សាន្តនៅ ថៃ ដូចមុន