ព័ត៌មានអន្ដរជាតិ

ត្រាំ៖ អាមេរិកនឹងបើកការចរចាពន្ធជាមួយកម្ពុជា ថៃ ជាថ្មី ក្រោយបទឈបបាញ់

បានផុស

១២ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីថ្ងៃចន្ទថា សហរដ្ឋអាមេរិកនឹងចាប់ផ្ដើមបើកការចរចាពាណិជ្ជកម្មពាក់ព័ន្ធនឹងពន្ធខ្ពស់ជាថ្មីជាមួយកម្ពុជា និងថៃ ក្រោយប្រទេសអាស៊ីអាគ្នេយ៍ទាំង២ ព្រមព្រៀងលើបទឈប់បាញ់ ក្នុងជម្លោះប្រដាប់អាវុធតាមព្រំដែន ដែលបង្កឡើងដោយការឈ្លានពានរបស់ថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោក ត្រាំ បានសរសេរនៅលើបណ្ដាញសង្គម Truth Social យ៉ាងដូច្នេះថា៖ «ទើបតែបាននិយាយជាមួយនាយករដ្ឋមន្រ្តីស្ដីទីថៃ និងនាយករដ្ឋមន្រ្តីកម្ពុជា។ ខ្ញុំមានសោមនស្សរីករាយក្នុងការប្រកាសថា ក្រោមការចូលរួមរបស់ប្រធានាធិបតី ដូណាល់ ត្រាំ ប្រទេសទាំង២បានសម្រេចបានបទឈប់បាញ់ និងសន្តិភាព»។

ដោយសារតែការបញ្ចប់ «សង្រ្គាមនេះ» លោក ត្រាំ បាននិយាយបន្តយ៉ាងដូច្នេះថា៖ «ខ្ញុំបានណែនាំឱ្យក្រុមចរចាពាណិជ្ជកម្មរបស់ខ្ញុំ ឱ្យចាប់ផ្ដើមជាថ្មីនៃការចរចាពាណិជ្ជកម្ម»។

គួរគូសបញ្ជាក់ថា កម្ពុជា និងថៃ បានធ្លាក់ចូលទៅក្នុងការប៉ះទង្គិចប្រដាប់អាវុធដ៏តានតឹងតាមព្រំដែនចាប់តាំងពីថ្ងៃព្រហស្បតិ៍សប្ដាហ៍មុន (២៤ កក្កដា) ដោយសារតែការឈ្លានពានរបស់យោធាថៃ ដែលច្រានចោលបទឈប់បាញ់ជាច្រើនដង។

សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃប្រទេសកម្ពុជា អំឡុងសន្និសីទកាសែត ក្រោយការចរចាបទឈប់បាញ់នៅក្រុងគូឡាឡំពួរ ម៉ាឡេស៊ី កាលពីថ្ងៃចន្ទ ២៨ កក្កដា ដែលអមដោយនាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម និងនាយករដ្ឋមន្រ្តីស្តីទីថៃ លោក Phumtham Wechayachai។

យ៉ាងណាមិញ បន្ទាប់ពីការចរចានៅម៉ាឡេស៊ី ដែលចូលរួមដោយសហរដ្ឋអាមេរិក និងចិន កាលពីម្សិលមិញថ្ងៃចន្ទ ទីបំផុតកម្ពុជា និងថៃ ក៏បានសម្រេចនូវកិច្ចព្រមព្រៀងបទឈប់បាញ់ ដែលចូលជាធរមានគិតត្រឹមម៉ោង ២៤:00 ថ្ងៃទី ២៨ កក្កដា ក្រោយការបាញ់ប្រហារគ្នាអូសបន្លាយរយៈពេល ៥ ថ្ងៃ ដែលធ្វើឱ្យជនស៊ីវិល ៣០០ ០០០ នាក់ ត្រូវជម្លៀសខ្លួនទាំងសងខាង និង ៣៨ នាក់ ត្រូវបានសម្លាប់។

មែនទែនទៅ ថៃ និងកម្ពុជា ត្រូវបានលោក ត្រាំ កំណត់ដាក់ពន្ធខ្ពស់ ៣៦ ភាគរយ ដោយគ្រោងនឹងចូលជាធរមានថ្ងៃសុក្រ ទី ១ សីហា ខាងមុខនេះ។ មុនសម្រេចបាននូវបទឈប់បាញ់ លោក ត្រាំ បានគំរាមថា បើប្រទេសទាំង២មិនបញ្ឈប់ទេ លោកនឹងមិនចរចាពាណិជ្ជកម្មដាច់ខាត ដែលនេះមានន័យថា អាមេរិកអាចនឹងដាក់ពន្ធ ៣៦ ភាគរយ លើប្រទេសទាំង២៕