ព័ត៌មានអន្ដរជាតិ

ក្រោយចាក់វ៉ាក់សាំងរួច មានស្នាមកន្ទួលលើរាងកាយ ឬកន្លែងមុខម្ជុលរីកធំមួយសប្ដាហ៍ គ្រូពេទ្យជំនាញថាកុំភ័យ

បានផុស

៥ years មុន

នៅ

ថ្ងៃចន្ទ ១២ មេសា ២០២១

ដោយ

ជាទូទៅផលប៉ះពាល់ភាគច្រើននៃវ៉ាក់សាំងកូវីដមានលក្ខណៈស្រដៀងគ្នានឹងការចាក់ថ្នាំផ្សេងទៀត ដូចជាឈឺនៅកន្លែងចាក់ថ្នាំ អស់កម្លាំង និងគ្រុន។ ការសិក្សាថ្មីមួយនិយាយថា មានប្រតិកម្មប្លែកមួយត្រង់ដៃគឺជាការឡើងស្នាមកន្ទួល ដែលមនុស្សកម្រជួបប្រទះ ហើយលេចឡើងនៅកន្លែងចាក់ថ្នាំរហូតដល់មួយសប្ដាហ៍ឬក្រោយពេលចាក់រួច។ វាអាចរីកធំធាត់ប្រហែលជា ៩៥ភាគរយ ដែលភាគច្រើននៃករណីនេះ បានផ្សារភ្ជាប់ជាមួយនឹងវ៉ាក់សាំង Moderna ប៉ុន្តែគ្មានគ្រោះថ្នាក់អ្វីនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្នាមកន្ទួលលើស្បែកបន្ទាប់ពីចាក់វ៉ាក់សាំង មិនត្រូវបានគេគិតថាមានគ្រោះថ្នាក់ទេ។ ការសិក្សាស្រាវជ្រាវថ្មីដែលត្រូវបានចេញផ្សាយប្រចាំសប្ដាហ៍នៃវិទ្យាស្ថានស្រាវជ្រាវវិទ្យាសាស្ត្ររោគសើស្បែកអាមេរិកបានរកឃើញថា ការពន្យារពេលនៃការឆ្លើយតបប្រតិកម្មលើស្បែកចំពោះវ៉ាក់សាំង អាចកើតឡើងពី ១ ទៅ ៨ ថ្ងៃ បន្ទាប់ពីចាក់ថ្នាំ។ ភាគច្រើនវាកើតឡើងបន្ទាប់ពីចាក់វ៉ាក់សាំងដូសដំបូង ប៉ុន្តែមិនរារាំងមនុស្សពីការចាក់ដូសទីពីរឡើយ។

វេជ្ជបណ្ឌិត Esther Freeman ប្រធានផ្នែករោគសើស្បែកសុខភាពសកលនៃមន្ទីរពេទ្យរដ្ឋ Massachusetts សហរដ្ឋអាមេរិកបាននិយាយថា ” មនុស្សអាចមានស្នាមកន្ទួលពេញរាងកាយ ហើយនេះជារឿងគួរឲ្យភ្ញាក់ផ្អើលនិងគួរឲ្យខ្លាចបន្តិច ប៉ុន្តែអ្នកជំងឺទាំងនេះបានធូរស្បើយឡើងវិញ និងអាចវិលត្រឡប់មកចាក់វ៉ាក់សាំងដូសទីពីរតាមពេលកំណត់បាន ” ។

ស្នាមកន្ទួលលើស្បែកខុសពីប្រតិកម្មអាឡ័កស៊ីធ្ងន់ធ្ងរចំពោះវ៉ាក់សាំង ដូចជាប្រតិកម្មអាណាហ្វីឡាក់ទិច ដែលជាការហើមនិងអាចគំរាមកំហែងដល់អាយុជីវិតមនុស្ស។ ចំពោះកន្ទួលជាធម្មតាវាកើតឡើងក្នុងរយៈពេលប៉ុន្មាននាទីនៃការចាក់ ដែលនេះជាមូលហេតុ CDC បានណែនាំឲ្យមនុស្សគ្រប់គ្នារង់ចាំ ១៥ ទៅ ៣០ នាទីបន្ទាប់ពីចាក់វ៉ាក់សាំងរួច។

លោក Freeman បន្ថែមថា ” ទោះយ៉ាងណាកន្ទួលដែលចាប់ផ្ដើមនៅពេលក្រោយចាក់ មិនបង្ហាញពីបញ្ហាធ្ងន់ធ្ងរទេ។ ចំពោះអ្នកដែលមានកន្ទួលចាប់ផ្ដើមពី ៤ ម៉ោងឡើងទៅបន្ទាប់ពីទទួលថ្នាំបង្ការនេះ ជាលទ្ធផលសូន្យភាគរយនៃពួកគេដែលអាចប្រឈមនឹងប្រតិកម្មអាណាហ្វីឡាក់ទិចឬប្រតិកម្មធ្ងន់ធ្ងរដទៃទៀត” ៕

ប្រែសម្រួល៖ សាង ស្រីល័ក្ខ

ប្រភព៖eatthis

ចុចអាន៖ក្រោយអ្នកចាក់វ៉ាក់សាំង Pfizer និង Moderna មានប្រតិកម្មអាឡ័កស៊ីធ្ងន់ធ្ងរ អ្នកជំនាញចាប់ផ្ដើមរកមូលហេតុ

ចុចអាន៖អ្នកជំនាញថា ការពាក់ម៉ាសអាចកាត់បន្ថយហានិភ័យប្រតិកម្មអាឡ័កស៊ីធ្ងន់ធ្ងរ

Related Topics:វ៉ាក់សាំងកូវីដ-១៩