អ៊ីរ៉ង់ លែងបង្កើនជាតិអ៊ុយរ៉ាញ៉ូមហើយ ក្រោយវាយប្រហារពី អាមេរិក និង អ៊ីស្រាអែល

រដ្ឋមន្ត្រីការបរទេសអ៊ីរ៉ង់បាននិយាយកាលពីថ្ងៃអាទិត្យទី១៦ ខែវិច្ឆិកា ថា ទីក្រុងតេអេរ៉ង់លែងបង្កើនជាតិអ៊ុយរ៉ាញ៉ូមនៅកន្លែងនុយក្លេអ៊ែរក្នុងប្រទេសទៀតហើយ បន្ទាប់ពីការវាយប្រហារតាមអាកាសរបស់អ៊ីស្រាអែល និងសហរដ្ឋអាមេរិក ដោយបំផ្លាញទីតាំងសំខាន់កាលពីខែមិថុនា។ តែយ៉ាងណា ពួកគេនឹងមិនបោះបង់ចោលសិទ្ធិរបស់ខ្លួន ក្នុងការបង្កើនជាតិអ៊ុយរ៉ាញ៉ូម ឬបច្ចេកវិទ្យានុយក្លេអ៊ែរឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេស លោក Abbas Araghchi បានឆ្លើយតបទៅនឹងសំណួររបស់អ្នកកាសែត Associated Press នៅក្នុងសន្និសីទមួយនៅទីក្រុងតេអេរ៉ង់ថា មិនមានការបង្កើនជាតិអ៊ុយរ៉ាញ៉ូម ដែលមិនបានប្រកាសនៅក្នុងប្រទេសអ៊ីរ៉ង់ទេ។ កន្លែងទាំងអស់ស្ថិតនៅក្រោមការការពារ និងការត្រួតពិនិត្យរបស់ទីភ្នាក់ងារថាមពលអាតូមិកអន្តរជាតិ។

នៅពេលសួរថាតើលក្ខខណ្ឌអ្វីខ្លះ ដែលនឹងអនុញ្ញាតឲ្យមានការចរចាជាមួយសហរដ្ឋអាមេរិក និងប្រទេសដទៃទៀតបន្តឡើងវិញ លោក Araghchi មានប្រសាសន៍ថា «ជំហររបស់អ៊ីរ៉ង់នៅតែមិនផ្លាស់ប្តូរ» សិទ្ធិរបស់អ៊ីរ៉ង់ក្នុងការបង្កើនជាតិអ៊ុយរ៉ាញ៉ូម សម្រាប់ការប្រើប្រាស់បច្ចេកវិទ្យានុយក្លេអ៊ែរដោយសន្តិវិធី រួមទាំងការបង្កើនជាតិអ៊ុយរ៉ាញ៉ូម គឺមិនអាចប្រកែកបាន។

លើសពីនេះ រដ្ឋមន្ត្រីការបរទេសបាននិយាយជាចុងក្រោយទៀតថា ពួកគេនៅតែបន្តរក្សាសិទ្ធិ ហើយពួកគេសង្ឃឹមថាសហគមន៍អន្តរជាតិ រួមទាំងសហរដ្ឋអាមេរិកផងដែរ ទទួលស្គាល់សិទ្ធិរបស់ពួកគេ។ ប៉ុន្តែលោកបានសម្តែងទស្សនៈអវិជ្ជមាន លើការបន្តឡើងវិញនៃកិច្ចចរចានុយក្លេអ៊ែរជាមួយសហរដ្ឋអាមេរិក។ លោកថា វិធីសាស្រ្តរបស់រដ្ឋបាលអាមេរិកមិនបង្ហាញពីការត្រៀមខ្លួនសម្រាប់ការចរចាស្មើភាពគ្នា និងយុត្តិធម៌ដើម្បីសម្រេចបានផលប្រយោជន៍ទៅវិញទៅមកនោះទេ។

សូមជម្រាបជូនថា អ៊ីរ៉ង់បានបង្កើនជាតិអ៊ុយរ៉ាញ៉ូមរហូតដល់ភាពបរិសុទ្ធ ៦០% ជិតដល់កម្រិតអាវុធ បន្ទាប់ពីប្រធានាធិបតី ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ក្នុងឆ្នាំ ២០១៨។ យ៉ាងណាក៏ដោយ ទីក្រុងតេអេរ៉ង់នៅតែអះអាងជំហរថា កម្មវិធីរបស់ខ្លួនគឺសន្តិភាពពេញលេញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ត្រាំ កាត់បន្ថយពន្ធលើអាហារជាង ២០០ មុខ ក្រោយការកើនឡើងតម្លៃនៅ អាមេរិក