រថយន្តដឹកសិស្សធ្លាក់ពី​លើ​ច្រាំងថ្មនៅ​កូឡុំប៊ី ស្លាប់​មនុស្ស១៧នាក់

យ៉ាងហោចណាស់មនុស្ស១៧​នាក់បានស្លាប់ និង​២០​នាក់ផ្សេងទៀតរងរបួស បន្ទាប់ពីរថយន្តក្រុងដឹកសិស្សសាលាបានធ្លាក់ពីលើច្រាំងថ្មចោទនៅក្នុងតំបន់ជនបទមួយនៃភាគខាងជើងប្រទេសកូឡុំប៊ី កាលពីយប់ថ្ងៃអាទិត្យ​ទី​១៤​ខែ​ធ្នូ​ឆ្នាំ​២០២៥។

យោង​តាម​ទីភ្នាក់ងារ​ព័ត៌មាន​រ៉យទ័រ អភិបាលខេត្ត Antioquia លោក Andrés Julián បាន​បង្ហោះ​នៅលើ​បណ្ដាញ​សង្គម ​X ថា គ្រោះថ្នាក់នេះបានកើតឡើង ខណៈពេលដែលរថយន្តក្រុងកំពុងធ្វើដំណើរពីទីក្រុង Tolú ជាប់សមុទ្រការីប៊ីន ទៅកាន់ទីក្រុង Medellín សម្រាប់​ដំណើរកម្សាន្តរបស់សាលា។

លោក​អភិបាលខេត្តបានបន្ថែមថា រថយន្តក្រុងនោះកំពុងដឹកសិស្សានុសិស្សមកពីវិទ្យាល័យ Antioqueño ដែលបានប្រារព្ធពិធីបញ្ចប់ការសិក្សារបស់ពួកគេនៅ​ឯ​ឆ្នេរខ្សាច់។

ភ្នាក់ងារ​សង្គ្រោះបន្ទាន់ត្រូវបានដាក់ពង្រាយទៅកាន់តំបន់ដាច់ស្រយាលនេះ ដើម្បីជួយសង្គ្រោះជនរងគ្រោះ និងស្រង់សាកសព ចំណែកឯអ្នករបួសត្រូវបានបញ្ជូនទៅមន្ទីរពេទ្យក្បែរនោះ។ មូលហេតុនៃគ្រោះថ្នាក់នេះមិនទាន់ត្រូវបានដឹងភ្លាមៗនៅឡើយទេ។

លោក Julián បាននិយាយដោយសម្តែងការចូលរួមរំលែកទុក្ខចំពោះក្រុមគ្រួសារជនរងគ្រោះថា «នេះជាដំណឹងដ៏សោកសៅ​បំផុតសម្រាប់សហគមន៍ទាំងមូលក្នុងអំឡុងខែធ្នូនេះ»។

គ្រោះថ្នាក់ចរាចរណ៍កើត​មាន​ច្រើន​នៅក្នុងតំបន់ភ្នំរបស់ប្រទេសកូឡុំប៊ី ដែលផ្លូវកោង និងច្រាំងថ្ម​ដ៏ចោតបង្កហានិភ័យធ្ងន់ធ្ងរ ជាពិសេសសម្រាប់រថយន្តក្រុង និងយានយន្តធុនធ្ងន់៕

ប្រែសម្រួល៖ ឈាង