បេក្ខជនបោះឆ្នោតថៃ ក៏ស្ថិតក្នុងចំណោមអ្នកដែលពាក់ព័ន្ធក្រុមគ្រឿងញៀននិង Scammer ដែរ

ក្រោយផ្ទុះរឿងអាស្រូវនៃអ្នកនយោបាយថៃនិងសមាជិកសភាចំនួន១០រូប មានជាប់ពាក់ព័ន្ធនឹងក្រុម Scammer, ល្បែងអនឡាញនិងក្រុមជួញដូរគ្រឿងញៀនដែលទម្លាយដោយក្រសួងយុត្តិធម៌នោះ ពេលនេះរដ្ឋាភិបាលទីក្រុងបាងកក បញ្ជាក់ថា ឈ្មោះរបស់អ្នកទាំងនោះនឹងត្រូវប្រកាសក្នុងពេលឆាប់ៗ។

យ៉ាងណា ដ្បិតតែមិនទាន់ប្រកាសឈ្មោះមែន ប៉ុន្តែរដ្ឋមន្ត្រីក្រសួងសេដ្ឋកិច្ចឌីជីថលនិងសង្គម Chaichanok Chidchob អះអាងថា ក្នុងចំណោមនោះ ក៏មានបេក្ខជនដែលកំពុងឈរឈ្មោះក្នុងការបោះឆ្នោតដែរ។

តាមការផ្សាយរបស់ Bangkok Post នៅថ្ងៃសៅរ៍ទី១០ខែមករាឆ្នាំ២០២៦ លោករដ្ឋមន្ត្រីមិនទាន់ទម្លាយឈ្មោះអ្នកដែលជាប់ពាក់ព័ន្ធគឺព្រោះតែមិនទាន់ប្រមូលព័ស្តុតាងបានគ្រប់១០០% ប៉ុន្តែបច្ចុប្បន្នមានព័ស្តុតាងរឹងមាំច្រើនហើយ រួមទាំងប្រវត្តិនៃប្រតិបត្តិការផ្ទេរប្រាក់ផងដែរ។

ក្រោយពេលប្រកាសឈ្មោះ អាជ្ញាធរនឹងពង្រីកការស៊ើបអង្កេត ដើម្បីរកមន្ត្រីបន្ថែមទៀត ដែលសង្ស័យជាប់ពាក់ព័ន្ធក្រុម Scammer, ល្បែងអនឡាញនិងក្រុមជួញដូរគ្រឿងញៀន។

មុននេះ រដ្ឋមន្ត្រីក្រសួងយុត្តិធម៌ថៃ Rutthaphon Naowarat ក៏ប្រកាសដែរថា ឆាប់ៗ នឹងមានការវាយឆ្មក់ហើយចាប់ខ្លួនអ្នកទាំង១០ ក្នុងប្រតិបត្តិការរបស់ប៉ូលិសថៃ សហការជាមួយប៉ូលិស Cyber។

អាជ្ញាធរថៃសន្និដ្ឋានថា លុយដែលបានមកពីសកម្មភាពខុសច្បាប់ទាំងនេះ គឺត្រូវបានយកមកប្រើប្រាស់ដើម្បីទិញសន្លឹកឆ្នោត ជួយដល់បក្សនយោបាយ ឬបេក្ខជនមួយចំនួន ដើម្បីឲ្យពួកគេមានអំណាច និងការពារអាជីវកម្មខុសច្បាប់ទាំងនោះវិញនៅពេលក្រោយ៕

អត្ថបទ៖ សុខ សុវណ្ណ