មនុស្សរាប់សែននាក់រត់ភៀសខ្លួន ហើយរាប់ពាន់នាក់ ត្រូវបានរត់ពន្ធចេញពីប្រទេស អាហ្វហ្គានីស្ថាន

មនុស្សរាប់សែននាក់ បានភៀសខ្លួនចេញពីផ្ទះសម្បែងនៅក្នុងប្រទេសអាហ្វហ្គានីស្ថាន ខណៈ រាប់ពាន់នាក់ ត្រូវបានគេរត់ពន្ធចេញពីប្រទេសជារៀងរាល់ថ្ងៃ ចំពេលមានការវាយលុករបស់ក្រុមតាលីបង់ ដែលជាហេតុបង្កឲ្យមានការភ័យខ្លាចអំពីវិបត្តិជនភៀសខ្លួនថ្មី។

អ្នករត់ពន្ធមនុស្សនៅទីក្រុង Zaranj ដែលជាច្រកព្រំដែន អាហ្វហ្គានីស្ថាន-អ៊ីរ៉ង់ត្រូវបានក្រុមតាលីបង់ដណ្តើមយក កាលពីសប្តាហ៍មុន បាននិយាយថា ចំនួនមនុស្សដែលចង់ចាកចេញពីប្រទេសនេះ បានកើនឡើងយ៉ាងគំហុក ក្នុងរយៈពេលប៉ុន្មានខែចុងក្រោយនេះ ចំពេលមានការភ័យខ្លាចថា ពួកឥស្លាមនិយមនឹងដណ្តើមយកអំណាចវិញក្នុងពេលឆាប់ៗ។

ថ្លែងទៅកាន់ MailOnline អ្នករត់ពន្ធម្នាក់និយាយថា ថ្ងៃណាល្អ គាត់បាននាំមនុស្សចំនួន១៥០នាក់ឆ្លងកាត់ព្រំដែនទៅទីក្រុង តេហេរ៉ង់ បើប្រៀបធៀបទៅនឹង ៥០ នាក់ក្នុងរយៈពេលប៉ុន្មានឆ្នាំចុងក្រោយនេះ។ 

ពួកគេទាំងនោះសង្ឃឹមថា អាចរត់គេចពីអ៊ីរ៉ង់ចូលក្នុងប្រទេសទួរគី បន្ទាប់មកបន្តទៅអឺរ៉ុបនិងចក្រភពអង់គ្លេសដែលជាកន្លែង ពួកគេមានបំណងទាមទារសិទ្ធិជ្រកកោន។

ការធ្វើដំណើរទាំងមូល គឺអាស្រ័យលើស្ថានភាពនៅតាមដងផ្លូវ។ ពេលខ្លះពួកគេទៅដល់ទីក្រុង តេហេរ៉ង់ ក្នុងរយៈពេលបីថ្ងៃ និងពេលខ្លះទៀតដល់ ប្រាំថ្ងៃ។

ពួកគេត្រូវចំណាយប្រាក់ប្រហែល ១៣០ ដុល្លារអាមេរិក ក្នុង ម្នាក់ ដើម្បីចូលប្រទេស​ អ៊ីរ៉ង់។

ទិន្នន័យរបស់អង្គការសហប្រជាជាតិបានបង្ហាញថា មនុស្ស ៤០០,០០០ នាក់ បានភៀសខ្លួនចេញពីផ្ទះរបស់ពួកគេនៅខាងក្នុងប្រទេសអាហ្វហ្គានីស្ថាន ចាប់តាំងពីដើមឆ្នាំនេះមក ខណៈជិត ៣០០,០០០ នាក់បានភៀសខ្លួនតាំងពីខែឧសភា ស្របពេលការប្រយុទ្ធគ្នារវាងរដ្ឋាភិបាលនិងក្រុមតាលីបង់បានផ្ទុះឡើង។

អង្គការសហប្រជាជាតិនិយាយថា ភាគច្រើននៃអ្នកទាំងនោះនៅតែស្ថិត ក្នុងប្រទេសប៉ុន្តែដោយសារតែយុទ្ធជនឥស្លាមនិយមលុកលុយយ៉ាងលឿនស្ទើរតែគ្រប់តំបន់ ហើយកងកម្លាំងរដ្ឋាភិបាលដកថយនោះ មនុស្សជាច្រើនកំពុងព្យាយាមចាកចេញពីប្រទេស៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រដ្ឋាភិបាលអាហ្វហ្គានីស្ថាន សុំចែកអំណាចជាមួយក្រុម តាលីបង់