នាវាពិឃាតអាមេរិកឆ្លងកាត់ច្រកសមុទ្រតៃវ៉ាន់, ចិនថ្កោលទោសថាជា ទង្វើបង្ករឿង

ក្រសួងការពារជាតិចិនបានតវ៉ាប្រឆាំងនឹងការធ្វើដំណើរឆ្លងកាត់ របស់នាវាចម្បាំងកងទ័ពជើងទឹកអាមេរិកនិងនាវាឆ្មាំសមុទ្រ នៅដែនទឹករវាងប្រទេសចិននិងកោះតៃវ៉ាន់។

សេចក្តីថ្លែងការណ៍មួយដែលត្រូវបានបង្ហោះនៅលើគេហទំព័ររបស់ក្រសួងកាលពីថ្ងៃសៅរ៍ បានហៅទង្វើនេះថា ទង្វើបង្ករឿង ហើយបាននិយាយថា វាបង្ហាញថា សហរដ្ឋអាមេរិកគឺជាការគំរាមកំហែងធំបំផុតចំពោះសន្តិភាពនិងស្ថិរភាព និងជាអ្នកបង្កើតហានិភ័យសន្តិសុខនៅច្រកសមុទ្រតៃវ៉ាន់។

សេចក្តីថ្លែងការណ៍ដដែលបាននិយាយថា “យើងសូមសម្តែងការប្រឆាំងយ៉ាងដាច់អហង្ការ និងសូមថ្កោលទោសយ៉ាងខ្លាំង”។

កងនាវាចរអាមេរិកបាននិយាយថា នាវាពិឃាតនាំផ្លូវមីស៊ីល USS Kidd និងនាវាឆ្មាំសមុទ្រ Munro បានធ្វើដំណើរឆ្លងកាត់ច្រកសមុទ្រកាលពីថ្ងៃសុក្រ នៅក្នុងដែនទឹកអន្តរជាតិ។

ទោះបីជាយ៉ាងណាក៏ដោយ លំហាត់បែបនេះ ត្រូវបានគេមើលឃើញថាជាការព្រមានដល់ប្រទេសចិន ដែលថ្មីៗ បានធ្វើសមយុទ្ធនៅជិតកោះតៃវ៉ាន់ ហើយមិនដែលគិតបោះបង់ចោលការប្រើប្រាស់កម្លាំងឡើយ ប្រសិនបើចាំបាច់ដើម្បីនាំកោះនេះមកស្ថិតក្រោមការគ្រប់គ្រងរបស់ខ្លួន។

សេចក្តីថ្លែងការណ៍របស់កងនាវាចរទី៧ ដែលមានមូលដ្ឋាននៅប្រទេសជប៉ុនបាននិយាយថា “ការធ្វើដំណើរស្របច្បាប់របស់នាវា ឆ្លងកាត់តាមច្រកសមុទ្រតៃវ៉ាន់ បានបង្ហាញពីការប្តេជ្ញាចិត្តរបស់អាមេរិកចំពោះតំបន់ឥណ្ឌូ-ប៉ាស៊ីហ្វិកដោយសេរីនិងបើកចំហ”។

គួរបញ្ជាក់ថា សេចក្តីថ្លែងការណ៍កាលពីថ្ងៃសៅរ៍ បានកើតឡើងមួយថ្ងៃ បន្ទាប់ពីទីភ្នាក់ងារសារព័ត៌មានរ៉យទ័របានដកស្រង់សម្តីមន្ត្រីជាន់ខ្ពស់មន្ទីរបញ្ចកោណ ដែលនិយាយថា កិច្ចពិភាក្សារវាងមន្រ្តីយោធាចិននិងអាមេរិក កំពុងប្រព្រឹត្តទៅជាលើកដំបូងចាប់តាំងពីប្រធានាធិបតីអាមេរិកលោក ចូ បៃដិន ឡើងកាន់តំណែងកាលពីខែមករា៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ លោកស្រី Harris ប្រាប់វៀតណាមថា កងទ័ពជើងទឹកអាមេរិក នឹងរក្សាវត្តមាននៅ សមុទ្រចិនខាងត្បូង